އިޒުރޭލުން ފަލަސްތީނުގައި މިހާރު ހިންގަމުންގެންދާ އަނިޔާވެރި ލާއިންސާނީ އަމަލުތަކާ ދެކޮޅަށް މަޝްހޫރު ދެ ފުޓުބޯޅަ ކުޅުންތެރިންކަމަށްވާ ލިވަޕޫލްގެ ސަލާހާއި މާނޭ ނިކުމެއްޖެއެވެ.
ސަލާހު ކުރި ޓްވީޓެއްގައި ބުނެފައިވަނީ، މިހާރު ހިނގަމުން އަންނަ ހަމަނުޖެހުންތައް ހުއްޓާލުމަށް ހުރިހާ ލީޑަރުން އެކުގައި މަސައްކަތް ކުރަން ޖެހޭ ކަމަށާއި މިކަން ކުރުމަށް އޭނާ މިދިޔަ 4 އަހަރު ދުވަހު ދިރިއުޅެމުން އަންނަ ވަޒަން ކަމުގައިވާ އިނގިރޭސިވިލާތުގެ ބޮޑު ވަޒީރަށް ގޮވާލާ ކަމަށެވެ. އަދި ކުށެއްނެތް މަޢުސޫމް މީހުން މެރުން ހުއްޓާލަން ޖެހޭ ކަމަށާއި މިހާރު ކަންތައް މާ މައްޗަށް ގޮސްފައިވާ ކަމަށްވެސް ސަލާހް ބުނެފައިވެއެވެ.
މިއާއެކު ސަލާހު ވަނީ މަސްޖިދުލް އަޤްޞާ މިސްކިތުކައިރީ ހުރެ އޭނާ ނަގާފައިވާ ފޮޓޯއެއް އޭނާގެ ސޯޝަލް މީޑިއާ އެކައުންޓުތަކުގައި ބޭނުންކުރަން ފަށާފައެވެ.
I’m calling on all the world leaders including on the Prime Minister of the country that has been my home for the past 4 years to do everything in their power to make sure the violence and killing of innocent people stops immediately. Enough is enough. @BorisJohnson
— Mohamed Salah (@MoSalah) May 11, 2021
ސަލާހުގެ އިތުރުން އޭނާއާއެކު ލިވަޕޫލަށް ކުޅެމުންއަންނަ ސާޑިއޯ މާނޭވެސް ވަނީ އިޒުރޭލުން މިހާރު ހިންގަމުންގެންދާ ޖަރީމާތައް ކުއްވެރިކޮށް އޭނާވެސް ފަލަސްތީނުގެ ރައްޔިތުންނާ އެކީގައި ހުރިކަމަށް ބުނެފައެވެ. އަދި ފަލަސްތީނަށް އެންމެންވެސް ދުއާ ކޮށްދިނުމަށް މާނޭ ވަނީ އެދިފައެވެ.
މިސްރުގެ މުޙައްމަދު ސަލާހާއި ސެނަގޯލްގެ ސާޑިއޯ މާނޭއަކީ އިސްލާމީ އުުސޫލުތައް ދަނޑުމަތީގަޔާއި ދަނޑު ބޭރުގައިވެސް ހިފަހައްޓާ ނަމޫނާ މުސްލިމު ދެ ކުޅުންތެރިންނެވެ. މި ދެކުޅުންތެރިންވެސް ގޯލް ޖެހުމަށްފަހު ސަޖިދަ ކުރާކަން ފާހަގަކޮށްލެވެއެވެ.
