ޙަމާސްގެ މާސްޓަރމައިންޑް މުޙައްމަދު ދީފް!

ޙަމާސް ޖަމާޢަތަކީ ފަލަސްޠީނުގެ ޣައްޒާ ކޮންޓްރޯލްކުރާ އެންމެ ބޮޑު ޖަމާޢަތެވެ. ފަލަސްތީނުގެ މިނިވަންކަމަށްޓަކައި ކެތްތެރިކަމާއެކު އެންމެ ވަރުގަދައަށް ޖިހާދުކުރާ ޖަމާޢަތެވެ. މިޖަމާޢަތަކީ މެދުއިރުމަތީގެ އިސްލާމީ ބޮޑެތި ޤައުމުތަކުގެ އެހީތެރިކަމާއެކު ހިންގަމުން އަންނަ ޖަމާޢަތެކެވެ. އީރާންގެ އެހީތެރިކަމާއެކު ޙަމާސްގެ ޢަސްކަރީ ގޮފިންވަނީ ގިނަ ކާމިޔާބީތަކެއް ހޯދާފައެވެ. އިޒްރޭލަށް ފަލަސްޠީނުގެ މައްޗަށް އަތްގަދަކޮށްލަން ނުކެރިގެންއުޅެނީ، މާތް ރަސްކަލާނގެ ވާގިފުޅާއެކު މުޖާހިދުންކުރަމުން އަންނަ ޖިހާދުގެ ސަބަބުންނެވެ.

ފަލަސްޠީނުގެ މިނިވަންކަމަށްޓަކައި މުޖާހިދުންކުރަމުން އަންނަ އަގުހުރި ޖިހާދުގައި މިއަދާއި ހަމައަށް އެތަށް މުޖާހިދެއް ޝަހީދުވެ ގޮސްފިއެވެ. ޙަމާސް ޖަމާޢަތުގެ ބާނީ ނުވަތަ ފައުންޑަރ ޝެއިޚް އަޙްމަދު ޔާސީންވެސް ވަނީ 2004 ވަނަ އަހަރު އިޒްރޭލުންދިން ވައިގެ ޙަމަލާއެއްގައި ޝަހީދުކޮށްލާފައެވެ. ޙަމާސް ޖަމާޢަތުގައި މިވަގުތުހުރި އެންމެ ކުޅަދާނަ މުޖާހިދަކީ މުޅި ފަލަސްޠީނު އެމުޖާހިދަކަށްޓަކައި ފަޚުރުވެރިވާ މުޙައްމަދު ދީފްއެވެ. މުޙައްމަދު ދީފަކީ ޖެހިލުންކުޑަ، އެހާމެ ކުޅަދާނަ މުޖާހިދެކެވެ. ދީނާއި ޤައުމުގެ މިނިވަންކަމަށްޓަކައި މުޅި ޢުމުރު ހޭދަކުރަމުންދަނީ ޖިހާދުކުރުމުގައެވެ. އިޒްރޭލުން އެންމެ ބޮޑަށް މަރާލަން ބޭނުންވާ މީހަކު މުޙައްމަދު ދީފްކަމާމެދު އެއްވެސް ޝައްކެތް ނެތެވެ. އެމެރިކާއިން އެންމެ ހޯދަން ބޭނުންވާ އެންމެ ނުރައްކާތެރި މީހުންގެ ލިސްޓުގައި 2015 ވަނަ އަހަރު މުޙައްމަދު ދީފް ހިމެނިއެވެ. އިޒްރޭލުން މުޙައްމަދު ދީފު މަރާލަން އުޅޭތާ 25 އަހަރު ވެއްޖެއެވެ. މިހާތަނަށް 5 ފަހަރެއްގެ މަތިން މުޙައްމަދު ދީފް މަރާލުމަށްޓަކައި ބޮމުގެ ޙަމާލާތަށް، އިޒްރޭލުންދީފައިވީ ނަމަވެސް، ކޮންމެ ޙަމަލާއަކުން އޭނާ ސަލާމަތްވެއެވެ. މިސަބަބާހުރެ ޙަޤީޤަތުގައި، މުޅި އިޒްރޭލް ސަރުކާރާއި ޢަސްކަރިއްޔާ އަދި އެމީހުންގެ ޖާސޫސީ އިދާރާ މޮސާޑުވަނީ ފޭލްވެފައެވެ. 2014 ވަނަ އަހަރު އޮގަސްޓުމަހު 19 ވީދުވަހު އިޒްރޭލުން ޢައްޒާއަށް ދިން ވައިގެ ޙަމަލާއަކީ، މުޙައްމަދު ދީފު މަރާލުމަށް ދުރާލައި ރާވައި އެއްކުރެވެންހުރި މަޢުލޫމާތުތަކެއް އެއްކޮށްގެން ދިން ޙަމަލާއެކެވެ. ޙަމަލާއަށްފަހު، ކާމިޔާބީ ޙާޞިލުކުރެވިއްޖެކަމުގައި އިޒްރޭލުގެ ޢަސްކަރިއްޔާއިންވެސް ނިންމިއެވެ. އެހެން ނަމަވެސް، އެޙަމަލާގައި މުޙައްމަދު ދީފު ސަލާމަތްވިއެވެ. މަރުވެގެންދިޔައީ، މުޙައްމަދު ދީފުގެ އަނބިމީހާ އާއި ދަރިންނެވެ. އެކަން އިޒްރޭލަށް އެނގުނީ އަދި މާފަހުންނެވެ.

މިވޭތުވެދިޔަ 25 އަހަރުތެރޭގައި މުޙައްމަދު ދީފުވަނީ ރެކޯޑު ޢަދަދަކަށް އިޒްރޭލު ސިފައިން މަރައި، ރަހީނުކޮށްފައިކަމުގައި އިޒްރޭލުގެ ޢަސްކަރިއްޔާއިން ބުނެއެވެ. މުޙައްމަދު ދީފް ޙަމާސް ޖަމާޢަތާއި ގުޅުނީ 1990 ވަނަ އަހަރުއެވެ. އެއަށްފަހު، ތަމްރީނު ފުރިހަމަކޮށް، ޖިހާދުގެ މައިދާނަށް ނިކުތެވެ. 1994 ވަނަ އަހަރު އިޒްރޭލުގެ ސިފައިންގެ 3 މީހަކު އިޒްރޭލުގެ ތެރެއިން ރަހީނުކޮށްގެން ގެންގޮސް، ޣައްޒާއަށް ގެންގޮސް މަރާލުމުގައި އެންމެ އިސް ރޯލެއް ކުޅުނީ މުޙައްމަދު ދީފުކަމުގައި އިޒްރޭލުން ބުނެއެވެ. އަދި، ހަމަ އެއަހަރު އިޒްރޭލުގެ ސިޓީއެއްކަމުގައި އަޝްކެލޯންގައި ބަހުގައި ބޮމެއް ގޮއްވާލައި އޭގައި ތިބި 50 އިޒްރޭލު މީހުން މަރާލުމާއި، 2000 ވަނަ އަހަރު ޖާނުން ފިދާވުމަށްޓަކައި ތައްޔާރުކޮށް 5 މީހަކު އިޒްރޭލަށް ފޮނުވުމުގެ މައި މޭސްތިރިއަކަށްވެސް ހުރީ މުޙައްމަދު ދީފްކަމުގައި އިޒްރޭލުން ބުނެއެވެ. 1995 ވަނަ އަހަރު ޖައްފާ ރޯޑްގައި ދުއްވި ބަހެއްގައި ގޮއްވާލައި އިޒްރޭލުގެ 45 މީހުން މަރާލުމުގެ މާސްޓަރ މައިންޑަކީވެސް މުޙައްމަދު ދީފުކަމުގައި ބުނެއެވެ. ކޮންމެ އަކަސް މިއަދު މުޙައްމަދު ދީފުއަކީ، އިޒްރޭލާއި ދެކޮޅަށް އެންމެ ބިޔަ ބޮޑެތި ޙަމަލާތަށް ދިން ޙަމާސްގެ ޢިއްޒުންދީނު އަލްޤައްސާމު ބްރިގޭޑްސްގެ ސްޕްރީމް މިލިޓަރީ ކޮމާންޑަރެވެ.

ޙަމާސް އިން ޢަސްކަރީގޮތުން އިޒްރޭލަށް ދޭ ކޮންމެ ޙަމަލާއެއް ރާވައި ހިންގަނީ މުޙައްމަދު ދީފުގެ ބެލުމުގެ ދަށުންނެވެ. އިޒްރޭލަށް އޮތް އެންމެ ބޮޑު ގޮންޖެހުމަކީ، މުޙައްމަދު ދީފު ވީތަނެއް ހޯދައި ބޮން އެޅުމެވެ. އެމީހުންނަށް އެނގޭހާވެސް އެއްޗަކީ، މުޙައްމަދު ދީފު މަރާލުމުގައި ލިބުނު ނާކާމިޔާބުތަކަކީ މިވީހާތަނަށް އެމީހުންނަށް ލިބުނު އެންމެ ބޮޑު ނާކާމިޔާބަށެވެ. މީގެ އެތަކެއް އަހަރުކުރިން މުޙައްމަދު ދީފުގެ ކެރިއަރު ފެއްޓިފައިވަނީ ގާބުރިއަކުންނެވެ. އެއަށްފަހު، އިޒްރޭލުގައި ޖާނުން ފިދާވުމުގެ އެތަކެއް ޙަމަލާތަކެއް ދިނެވެ. މިއަދު މުޙައްމަދު ދީފަކީ، ޙަމާސްގެ މިލިޓަރީ ވިންގުގައި މިސައިލް އުފައްދާ އެންމެ އިސް މީހާއެވެ.