ޢިލްމުވެރިންނާއި ރައްޔިތުން ކެކިއަރަން ފެށުމުން ޢުޤޫބާތު ޤާނޫނަށް އިޞްލާޙުގެނައުމުގެ އިތުރު ބިލެއް ހުށައަޅަނީ

ދިވެހިރާއްޖޭގެ ޤާނޫނުލްޢުޤޫބާތު ނުވަތަ ޕީނަލް ކޯޑް އަށް އިޞްލާޙުގެނައުމަށް ސަރުކާރުން މަޖްލީހަށް މިހާރު ހުށައަޅާފައިވާ ބިލުގައި ހިމަނާފައިވާ ބައެއް ކަންކަމާ ގުޅިގެން ދީނީ ޢިލްމުވެރިންނާއި ރައްޔިތުންގެ ގިނަ ބަޔަކު "ކެކިއަރައި" ނުރުހުން ފާޅުކުރަމުން ގެންދިއުމާއެކު އެ ޤާނޫނަށް އިޞްލާޙުގެނައުމަށް އިތުރު ބިލެއް ހުށައަޅަން ސަރުކާރުން ނިންމައިފިއެވެ.

ބަންޑާރަ ނައިބުގެ އޮފީހުން މިރޭގެ އިރާކޮޅު ނެރެފައިވާ ނޫސްބަޔާނެއްގައި މިކަން ހާމަކޮށް ބުނެފައި ވަނީ، ޢުޤޫބާތު ޤާނޫނަށް އިޞްލާޙު ގެނައުމުގެ ބިލު ހުށަހެޅުމާ ގުޅިގެން ޢާންމުންގެ މެދުގައި އުފެދިފައިވާ ކަންބޮޑުވުންތަކަށް ޙައްލެއް ހޯދުމަށްޓަކައި ދިވެހިރާއްޖޭގެ ޤާނޫނުލްޢުޤޫބާތަށް އިޞްލާޙު ގެނައުމުގެ އިތުރު ބިލެއް، ރައްޔިތުންގެ މަޖިލީހަށް ހުށަހެޅުމަށްޓަކައި ރައީސުލްހުމްހޫރިއްޔާގެ އޮފީހަށް މިއަދު ފޮނުވާފައި ވާކަމަށެވެ.

ރައީސުލްޖުމްހޫރިއްޔާގެ އޮފީހަށް ފޮނުވުނު އައު ބިލުގެ ތަފްޞީލު ހާމަކުރަމުން އެ ނޫސްބަޔާނުގައި ބުނެފައިވާ ގޮތުގައި، ސަރުކާރުން މި ބިލު ހުށަހެޅުމުގެ ބޭނުމަކީ ދިވެހިރާއްޖޭގެ ޤާނޫނުލްޢުޤޫބާތުގެ 611 ވަނަ މާއްދާގައި މިހާރުވެސް އެކުލެވޭ ކުށެއް ކަމުގައިވާ "އިސްލާމްދީނާ އިދިކޮޅު ޢަމަލުތައް" އިތުރަށް ތަފްޞީލުކޮށް، އެ ކުށުގެ ޢަމަލުގެ ތެރޭގައި، އިސްލާމްދީނަށް ފުރައްސާރަކުރުމުގެ ޢަމަލުތައް ވަކިން ހިމަނައި، އިސްލާމްދީނަށް ފުރައްސާރަކުރުމަކީ ކުށެއްކަން ސާފުވާގޮތަށް އެ މާއްދާގައި ބަޔާންކުރުމަށްޓަކައި އެ ޤާނޫނަށް ގެންނަންޖެހޭ އިޞްލާޙު ގެނައުމެވެ.

އެގޮތުން، މުއާޞަލާތީ ވަސީލަތެއް ބޭނުންކޮށްގެން ނުވަތަ އެނޫންވެސް ގޮތަކަށް ޢާންމުންގެ ކުރިމަތީގައި، އިސްލާމްދީނަށް ތައުހީނުކުރުމުގެ ނިޔަތުގައި، ބަހުން ނުވަތަ ޢަމަލުން، އިސްލާމްދީނަށް ފުރައްސާރަކުރުމަކީ ކުށެއް ކަމުގައި ކަނޑައެޅިގެން ބަޔާންކުރުމަށް ބިލުގައި ހުށަހަޅާފައިވާނެކަމަށް އޭޖީ އޮފީހުގެ ބަޔާނުގައި ހާމަކޮށްފައި ވެއެވެ.

ބަންޑާރައި ނައިބުގެ އޮފީހުން ނެރެފައިވާ ބަޔާންނަށާއި، ޢިލްމުވެރިންނާ އަދި ރައްޔިތުންގެ ކަންބޮޑުވުން ހުރި ގޮތާއި އެކަމުގެ ސަބަބު، އަދި މިހިނދު ޢަމަލުކުރެވެމުންދާ ގުޅުންހުރި ޤާނޫނުތަކުގައި އިސްލާމްދީނާ ޚިލާފު ޢަމަލުތަކާއި އިސްލާމް ދީނަށް ތައުހީނުކުރުމުގެ ޢަމަލުތަކާ ގުޅިގެން ކުށް ކަނޑައެޅިފައިވާ އެޅުމަށް ބަލާއިރު، މަޖްލީހަށް ހުށައެޅިފައިވާ އިޞްލާޙާ ގުޅިގެން އުފެދިފައިވާ ކަންބޮޑުވުމާއި ނުތަނަވަސްކަމަށް، ހުށައަޅާ އިތުރު ބިލުގެ ސަބަބުން، އެދެވޭ ޙައްލެއް އަންނާނެކަމަށް ޤަބޫލުނުކުރެއްވޭކަމަށް މި ނޫހާ ވާހަކަ ދެއްކެވި ޢިލްމުވެރިންނާއި ޤާނޫނީ ފަންނުގެ ބޭފުޅުންވެސް ފާހަގަކުރެއްވި އެވެ.

ޢިލްމުވެރިން ފާހަގަކުރެއްވި ގޮތުގައި މިހިނދު މަޖްލީހަށް ހުށައެޅިފައިވާ ބިލުގައި ހިމެނޭ އެންމެ ބޮޑު ކަންބޮޑުވުމަކީ، އިސްލާމް ދީނުގެ މުހިންމު އަސާސެއްކަމުގައިވާ "ދީނީ ޝިޢާރު ފާޅުކުރުން" (ހެޔޮކަންތައްތަކަށް އަމުރުކޮށް، ނުބައިކަންތައްތައް ނަހީކުރުމާއި، އިސްލާމްދީނުގެ ޢަޤީދާއާއި، ޙުކުމްފުޅުތަކާއި، އަމުރުފުޅުތަކާއި، ވާޖިބުތަކާއި، އޭގެ ދަށުން ތަރުތީބުވެގެން އަންނަ އެންމެހައި ކަންތައްތަކެއް މީސްތަކުންނަށް ބަޔާންކޮށްދީ، އިސްލާމްދީން ޤާއިމުކުރުން) މި އަސާސް ކުށަކަށް ވެގެންދާގޮތަށް އެ ބިލުގައި ކުށްކަނޑައަޅާފައި ވުންކަމުގައި ވާއިރު، ބިލުގައި ހިމަނާފައިވާ އެފަދަ މާއްދާތައް އިޞްލާޙުކުރުމެއް ނެތި އެހެން ކަންކަން މަނާކުރުމަށް އިތުރު ބިލެއް ހުށައެޅިނަމަވެސް ޙަޤީޤީ ޙުޠޫރަތްތެރިކަން ނެތިގެން ނުދާކަމަށެވެ.

އަދި މިހިނދު މަޖްލީހަށް ހުށައަޅާފައިވާ ބިލުގައި ޤާނޫނަށް ގެންނަން ހިމަނާފައިވާ އިޞްލާޙުތަކުން ދީނާ ޚިލާފު ޢަމަލުތައް ޤާނޫނަކުން ޙިމާޔަތްކޮށްދޭ ދިނުމަށްވެސް، އިތުރު ބިލުގެ ސަބަބުން އެއްވެސް ބަދަލެއް ނާންނާނެތީއެވެ.

ރާއްޖޭގެ މަޝްހޫރު ޤާނޫނީ ވަކީލަކު ވިދާޅުވިގޮތުގައި، އޭޖީ އޮފީހުގެ ބަޔާނުގައި ހާމަކޮށްފައިވާ ކަންކަމަށް ބަލާއިރު ޕީނަލް ކޯޑު އެމެންޑް ކުރުމުގެ ގޮތުން ރައީސް އޮފީހަށް ހުށައެޅި ބިލުގެ ސަބަބުން ޤާނޫނީ އައު ނަތީޖާއެއް ނުނިކުންނާނެއެވެ. އަދި މަޖްލީހުގައި މަސައްކަތް ފެށިފައިވާ ބިލުން ނުކުންނާނެ ޤާނޫނީ ނަތީޖާއަކަށްވެސް ބަދަލެއް ނާންނާނެއެވެ.

ވަކީލު ފާހަގަކުރެއްވި ގޮތުގައި، މުވާޞަލާތީ ވަޞީލަތެއް ބޭނުންކޮށްގެން ނުވަތަ އެނޫންވެސް ގޮތަކަށް ޢާންމުންގެ ކުރިމަތީގައި އިސްލާމްދީނަށް ތައުހީނުކުރުމުގެ ނިޔަތުގައި، ބަހުން ނުވަތަ ޢަމަލުން، އިސްލާމްދީނަށް ފުރައްސާރަކުރުމަކީ ކުށެއް ކަމުގައި ކަނޑައެޅުމަކީ އެ ބިލުގެ ބޭނުންކަމުގައި އެ ބަޔާނުގައި ހާމަކޮށްފައި ވީނަމަވެސް، މިހާރު ޢަމަލުކުރެވެމުންދާ ޢާންމު ޤާނޫނާއި ޚާއްޞަ ޤާނޫނުގައި އެފަދަ ޢަމަލުތައްވެސް ހިމެނޭނެ މަފްހޫމުގައި ކުށްކަނޑައަޅާފައި ވީއިރު އެފަދަ ކުށްތަކަށް ތަޙްޤީޤުކޮށް އަދަބުދިނުމަށް އެއްވެސް ޤާނޫނީ ހުރަހެއް މިހިނދުވެސް ނެތްމެއެވެ.

އެހެނީ، ދިވެހި ރައްޔިތުންގެ ދީނީ އެއްބައިވަންތަކަން ނަގާލުމަށް މަސައްކަތް ކުރުމާއި، މީހުންގެ މެދުގައި ދީނީގޮތުން ޚިލާފު އުފެދޭ ބާވަތުގެ ވާހަކަދެއްކުމާއި އެފަދަ ގޮތްގޮތަށް ޢަމަލުކުރުމާއި، މިއިން އެއްވެސް ކަމެއް ކުރުމާއި ނުވަތަ ކުރަން އުޅުމާއި، އިސްލާމްދީން ނޫން އެހެން ދީންތަކުގެ މީހުން އަޅުކަންކުރާނެ ތަންތަން ހެދުމާއި، އިސްލާމްދީން ނޫން އެހެން ދީންތަކުގެ ޝިޢާރުކަމަށް ބެލެވޭ ތަކެތި ވިއްކުމާއި ގެންގުޅުމާއި އިޝްތިހާރުކުރުމާއި، އިސްލާމްދީން ފިޔަވައި އެހެން ދީންތައް ރާއްޖޭގައި ކުރިއެރުވުމަށް ނުވަތަ ފެތުރުމަށް ބޭރުގެ ފަރާތްތަކުން އެހީ ހޯދުމާއި ލިބިގަތުމާއި، އިސްލާމްދީން ފިޔަވައި އެހެން ދީންތަކުގެ ފޮތްތައް ދިވެހިރާއްޖެ ގެނައުމާއި، އެފަދަ ފޮތްތައް އިޝްތިހާރުކުރުމާއި، ދިވެހިންނަށް ދެއްކުމާއި، އެފަދަ ފޮތްތަކުގެ މަޢުރަޟުތައް ބޭއްވުމާއި، ވިއްކުމާއި، ދިނުމާއި، ދިވެހިރާއްޖޭގައި ޢާންމުކޮށް ފެންނަގޮތަށް ގެންގުޅުމަކީވެސް ކުށެއްކަމަށް ޤާނޫނުން މިހާރުވެސް ކަނޑައަޅައި ބަޔާންކޮށްފައި ވާކަމަށެވެ.

އެއިން ކުށެއް ކޮށްފި ނުވަތަ ކުރަން އުޅުނު މީހެއްވެސް 2 އަހަރާއި 5 އަހަރާ ދެމެދުގެ މުއްދަތަކަށް އަދި އެފަދަ ޢަމަލަކަށް އެހީވާ މީހާއާއި އެފަދަ ކުށެއްގެ މަޢުލޫމާތު ސިއްރުކުރާ މީހާވެސް 2 އަހަރާއި 4 އަހަރާ ދެމެދުގެ މުއްދަތަކަށް ޖަލަށް ލެވޭނެކަމަށްވެސް ޤާނޫނު ނަމްބަރު 6/94 (ދިވެހިރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤާނޫނު) ގެ 35 ވަނަ މާއްދާއާއި 37 ވަނަ މާއްދާގައި ކަނޑައަޅައި ބަޔާންކޮށްފައި ވުމުންކަމަށްވެސް ވަކީލު ފާހަގަކުރެއްވިއެވެ.

އަދި މިހާރު ޢަމަލުކުރުވެމުންދާ ޤާނޫނު ނަމްބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 617 ވަނަ މާއްދާގައި ވެސް، މުއާޞަލާތީ ވަސީލަތެއް ބޭނުންކޮށްގެން ނުވަތަ ޢާންމުންގެ ކުރިމަތީގައި، އިސްލާމްދީނަށް ތައުހީނުކުރުމުގެ ނިޔަތުގައި އިސްލާމްދީނަށް ފާޑުކިޔައި، ދީނީ ތަޤްރީރުކުރުމާއި، އިސްލާމްދީނަށް ތައުހީނުކުރުމުގެ ނިޔަތުގައި އިސްލާމްދީނަށް ފާޑުކިޔައި، އެކިއެކި ލިޔުންތައް ތައްޔާރުކުރުމާއި، ބެހުމާއި، ވިއްކުމާއި، އުފެއްދުމަކީވެސް ޖިނާއީ ކުށްތަކުގެ ގޮތުގައި ކަނޑައަޅާފައި ވާތީކަމަށްވެސް ވަކީލު އިތުރަށް ފާހަގަކުރެއްވިއެވެ.

ދިވެހިދައުލަތުގެ ދުސްތޫރީ ނިޒާމް ޤާނޫނުއަސާސީ އިން އެކަށައަޅައި ބަޔާންކޮށްފައިވާ ކުރުމަށް ބަލާއިރު ބޭނުންވާ ކޮންމެ ކަމަކާ ގުޅޭގޮތުން ޤާނޫނުތައް ހެދުމާއި ޤާނޫނުތަކަށް ބަދަލުގެނައުމަކީ ރައްޔިތުންގެ މަޖްލީހަށް ލިބިފައިވާ ޚާއްޞަ ބާރެއްނަމަވެސް އެ ބާރު ދުސްތޫރީ ގޮތުން ލިއްބައިދީފައިވާ ޙައްދަކީ އިސްލާމް ދީނާއި އެ ދީނުގެ އަޞްލުތައްކަން، ޤާނޫނުއަސާސީގެ 10 ވަނަ މާއްދާގައި ކަނޑައަޅައި ބަޔާންކޮށްފައިވާކަން ފާހަގަކޮށްލެވެއެވެ. އަދި އެޙައްދު ފަހަނައަޅައި ޤާނޫނެއް ފާސްކުރިނަމަވެސް އެޤާނުނެއްވާނީ ބާޠިލު ޤާނޫނެއްކަމަށްވެސް ކޮންސްޓިޓިއުޝަނަލް ޕްރިންސިޕަލްސް ތަކުގެ ގޮތުގައި ޤާނޫނުއަސާސީގައި ބަޔާންކޮށްފައިވާ ތަފާތު މާއްދާތަކުގެ ނައްޞުންނާއި މާނައިންވެސް ހާމަވެ އެނގިގެންދޭމެއެވެ.