މަސްދޯންޏެއް ބިންދައިގެންގޮސް ދެބުރި ވަކިވެއްޖެއެވެ.
މަސްވެރިންގެ ހަބަރުތައް ގެނެސްދޭ ނޫހެއްކަމަށްވާ މަސްވެރިން އެވްވީން ބުނެފައިވަނީ ބިންދައިގެން ގޮސްފައިވަނީ އައްޑޫސިޓީ ހިތަދޫ "މޯހިރު" ދޯނި ކަމަށެވެ. މި ދޯނި ބިންދައިގެން ދިޔައީ ގއ. އަތޮޅު އެތެރެވަރީގައި އެން ދަމަން އުޅުމުގެ ތެރޭގައިކަމަށް މަޢުލޫމާތު ލިބެއެވެ. މިހާދިސާ ހިނގާފައިވަނީ ގއ. އަތޮޅު ގެމަނަފުއްޓާ ދިމާލަށް އޮންނަ ހަނޑަހަ ކައިރިންނެވެ. މި ދޯންޏަކީ ފައިބަރު މަސްދޯންޏެކެވެ.
މި ހާދިސާ ހިނގި ސަރަހައްދުގައި ގެމަނަފުށީގައި ދުއްވާ "ޑެއިޒީ ވިއު" ދޯންޏާއި މިފްކޯގެ މަސްކިރާ ބޯޓެއްކަމަށްވާ "ކަލަމިންޖާ 402″ މިހާރު ދަނީ ހަރަކާތްތެރިވަމުންނެވެ.
އެމްއެންޑީއެފުން ބުނީ މިހާދިސާގެ މަޢުލޫމާތު ލިބިފައިވަނީ މިއަދު ހެނދުނު 7:11 ގައި ކަމަށާއި މިހާދިސާ ހިނގުމާއެކު އެމްއެންޑީއެފް ސަދަން އޭރިޔާއިން ހަރަކާތްތެރިވާން ފަށާފައިވާކަމަށެވެ.
