ހަރުކަށި ފިކުރަކީ ޤާނޫނުލް ޢުޤޫބާތުން ނުވަތަ ވަޢުޡު އިރުޝާދުން އެކަނި ރަނގަޅު ކުރެވޭނެ ކަމެއްނޫން ކަމަށާއި އެ ނުރައްކަލަށް ދިގުދެމިގެންވާ ޙައްލެއް ބޭނުން ނަމަ އެކަމަށް ސީދާ އަމާޒުކޮށްގެން ޢިލްމީ ގޮތުންނާއި ފިކުރީ ގޮތުން ގިނަ ގުނަ މަސައްކަތްތަކެއް ކުރަންޖެހޭ ކަމަށް ދީނީ ޢިލްމުވެރިޔާ ޑރ. މުޙައްމަދު ޝަހީމް ޢަލީ ސަޢީދު (ފޮޓޯ) ވިދާޅުވެއްޖެއެވެ.
ޓްވީޓާ މެދުވެރިކޮށް އާންމުކުރެއްވި މެސެޖްގައި ޑރ. ޝަހީމް މިފަދައިން ވިދާޅުފައި މިވަނީ ކުރީގެ ރައީސް މުހައްމަދު ނަޝީދު، ގައުމުގައި ކުއްލި ނުރައްކާ އިޢުލާންކޮށް، ހަރުކަށި ފިކުރަށް ތަބާވާ މީހުންގެ ތެރެއިން އެއްފަހަރާ ގިނަ ބަޔަކު ހައްޔަރު ކުރުމަށް ރައީސުލްޖުމްހޫރިއްޔާއަށް ބާރުއެޅުއްވުމުގެ ގޮތުން، އެމްޑީޕީ ގައުމީ މަޖިލީހުގެ ހަނި އަޣުލަބިއްޔަތަކުން ގަރާރެއް ފާސްކޮށްފައިވާ ދަނޑިވަޅެއްގައެވެ.
ރާއްޖޭގައި ހަރުކަށި ފިކުރަށް ބަތާވާ ތޭރަސަތޭކައެއްހާ މީހުން އުޅޭ ކަމަށް ފުލުހުން ދާދި ފަހުން ހާމަކޮށްފައިވާއިރު، ޑރ. ޝަހީމް ވިދާޅުވީ ހަރުކަށި ފިކުރަކީ ކޮބައިކަން ބުނެދީ އެފިކުރުގެ ނުބައި މަފްހޫމްތަކުގެ ޙަޤީޤަތް ރަނގަޅަށް ކިޔާދީގެން ހަރުކަށި ފިކުރު ނައްތާލެވޭނީ އެފިކުރުން ޤައުމު ސަލާމަތްކުރުމަށްޓަކައި އިސްލާމީ ފަލްސަފާގެ އަލީގައި ހަރުދަނާ ވަށާޖެހޭ ރޭވުންތަކެއް ތަންފީޒުކޮށްގެންނެވެ.
އަދި އެކަމުގައި އެމަނިކުފާނުގެ އެހީތެރިކަން ދައުލަތުގެ އެއްވެސް މުވައްސަސާއަކުން ބޭނުން ވެއްޖެނަމަ އެކަމަށް ތައްޔާރަށް ހުންނެވި ކަމަށް ވެސް ވިދާޅުވެފައިވެއެވެ.
