އުމުރުން 16 އަހަރުގެ އަންހެން ކުއްޖަކަށް ޢާއިލާ މިހަކު ޖިންސީ ގޯނާ ކުރި މައްސަލައެއްގައި ކުއްޖާގެ މަންމަގެ ބަޔާން ފުލުހުންނަށް ދީފައިވަނިކޮށް، އެބަޔާނުގައި އެކުއްޖާގެ މަންމަ ލައްވައި ސޮއިކުރުވުމަކާއި ނުލައި ފުލުހުން އެމައްސަލަ ޕީޖީ ކޮށްފިކަމުގެ މަޢުލޫމާތު އިރުވަރު ނޫހަށް ލިބިއްޖެއެވެ.
ކުއްޖާގެ މަންމަ ސޮއިކޮށް ޕްރޮސެކިއުޓަރ ޖެނެރަލް ޙުސައިން ޝަމީމު އަށް ފޮނުވާފައިވާ ސިޓީގައި ބަޔާންކޮށްފައިވަނީ، ކުއްޖާއަށް ތަކުރާރުކޮށް ޖިންސީ ގޯނާކޮށްފައިވަނީ ކުއްޖާގެ ޢާއިލީ މީހެއްކަމަށާއި، އެމައްސަލަ ބަލައި ދިނުމަށް ފުލުހުންނަށް ހުށަހެޅުމުން، ފުލުހުން އެމައްސަލަ ތަޙްޤީޤުކުރި އެންމެ އެކަށޭނެ ގޮތެއްގައި ނޫންކަމުގައި އެކަމުގެ ޝަކުވާ، 11 ޖުލައި 2021 ދުވަހު ކަމާ ގުޅުންހުރި ފޯމުން ޕްރޮސެކިއުޓަރ ޖެނެރަލްގެ އޮފީހަށް ހުށަހަޅާފައިވާ ކަމަށެވެ.
ކުއްޖާގެ މަންމަ ޕީޖީ އޮފީހަށް ޝަކުވާ ހުށަހެޅި ފަހުން، ފުލުހުންވަނީ ތަޙްޤީޤު ނިންމައި މައްސަލަ ޕީޖީ ކޮށްފައިކަމުގައި ކުއްޖާގެ މަންމަ ބުނެއެވެ. އެހެން ނަމަވެސް، ކުއްޖާގެ މަންމަގެ ބަޔާނުގައި ސޮއި ކުރުވާފައިވެސް ނުވާކަމުގައި ކުއްޖާގެ މަންމަ ބުނެއެވެ. ކުއްޖާގެ މަންމަގެ ބަހަކީ ކުށް ސާބުތުކުރުމުގައި މުހިންމު ހެކިބަހެކެވެ.
