ވަންދޫ ކައުންސިލްގެ ކުޅިވަރު ހަފްތާގައި ހިމެނޭ ފުޓްސަލް މުބާރާތުގެ ފައިނަލުން ނެވިންއާއި ފަން ބޯއީސް ޖާގަ ހޯދައިފިއެވެ.
ނެވިން މުބާރާތުގެ ފައިނަލުން ޖާގަ ހޯދީ ކުޅުނު ހުރިހާ މެޗަކުން މޮޅުވެ 1 ވަނަ ޓީމުގެ ގޮތުގައެވެ. ޒުވާން ކުޅުންތެރިން ހިމެނޭ ފަން ބޯއީސް ފައިނަލުން ޖާގަ ހޯދީ މިއަދު ކުޅުނު ސެމީފައިނަލްގައި އައްޑާ އާ ވާދަކޮށް 7-3 ލަނޑުން މެޗް ކާމިޔާބުކޮށްގެންނެވެ.
މި މެޗްގެ މޮޅު ކުޅުންތެރިޔަކަށް ހޮވުނީ ފަން ބޯއީސްއަށް 5 ލަނޑު ޖަހައިދިން އާދަމް ނާސިހު(އާދަންނާ) އެވެ. ފަންބޯއީސްގެ އަނެއް ގޯލްތައް ޖަހައިދިނީ އަލީ ޒައިންއާއި އިބްރާހިމް ޒިހާނުއެވެ. މި މެޗްގައި އާދަންނާ ޖެހި 5 ލަނޑާއެކު މި މުބާރާތުގައި ޖުމްލަ 11 ލަނޑު ހަމަކޮށް ލަނޑު ލިސްޓުގެ އެންމެ ކުރީގައި އުޅެނީ އޭނާއެވެ.
ވަންދޫ ކައުންސިލްގެ ކުޅިވަރު ހަފްތާ ކުރިއަށްގެންދަނީ ވަންދޫ އައިލެންޑް ޑިވަލޮޕްމަންޓް ސޮސައޮޓީ "ވިޑްސް" ޖަމްއިއްޔާއާ ހަވާލުކޮށްގެންނެވެ. ކުޅިވަރު ހަފްތާގައި ފުޓްސަލްގެ އިތުރުން އަންހެނުންގެ ވޮލީއާއި ކުޑަކުދިންގެ ވޮލީގެ އިތުރުން ކުޑަކުދިންގެ ފުޓްސަލް ކުރިއަށްދާނެ ކަމަށް ވިޑްސް ޖަމްއިއްޔާއިން މައުލޫމާތުދެއެވެ.
