ކްރިމިނަލް ކޯޓުގައި އިންޓަޕޯލުގެ ޖާސޫސެއް؟

ކްރިމިނަލް ކޯޓުގައި އިންޓަޕޯލުގެ ޖާސޫސެއް ހަރަކާތްތެރިވަމުންދާކަމަށް ވަރަށް މުއުތަބަރު ފަރާތަކުން މި ނޫހަށް މައުލޫމާތު ދީފިއެވެ. ދިވެހިރާއްޖޭގެ ޖުޑީޝަރީގެ ކަންކަން ދޮންމީހުންނަށް ފޮނުވާ ޖާސޫސު ކޮށްދޭކަމަށް ތުހުމަތު ކުރެވެނީ 2020 ވަނަ އަހަރު އެކޯޓަށް ހޮވުނު ދީބާނާޒު ފަޙްމީއެވެ. ދީބާނާޒު ވަނީ ކްރިމިނަލް ކޯޓަށް ހޮވުމުގެ ކުރިން އިންޓަޕޯލުގެ ސިންގަޕޫރު ގޮފީގައި މަސައްކަތް ކޮށްފައެވެ.

ގާޒީ ދީބާނާޒު ފަޙްމީ އިންޓަޕޯލަށް ޖާސޫސްކޮށްދެނީ ގިނަ އަދަދެއްގެ ފައިސާގެ ބަދަލުގައި ކަމަށް މައުލޫމާތު ލިބިފައިވެއެވެ. މި ފައިސާގެ ބަދަލުގައި ކްރިމިނަލް ކޯޓަށް ހުށަހެޅޭ ސިއްރު އަދި ހައްސާސީ މައުލޫމާތުތައް އެއްކުރުމަށްފަހު ސިންގަޕޫރުގެ އިންޓަޕޯލަށް ފޮނުވައެވެ. މިގޮތުން ކްރިމިނަލް ކޯޓުގައި ހުންނަ ފައިލުތައް މުވައްޒަފުން ނޫން މީހުންނަށް ދައްކާކަން ވަނީ ކޯޓުގެ މުވައްޒަފުންނަށް ފަޅާއަރާފައެވެ. މި ފައިލުތައް ހޯދައިގެން ސިންގަޕޫރަށް ފޮނުވާކަމަށް މައުލޫމާތު ލިބިފައިވެއެވެ. ކްރިމިނަލް ކޯޓަށް ހުށަހެޅޭ ސިއްރު ލިޔުންތައް އެކި ގޮތްގޮތުން ހޯދައި މި ލިޔުންތައް ރާއްޖެއިން ބޭރަށް ސިންގަޕޫރަށް އީމެއިލް ކުރާކަން ވަނީ ފަޅާ އަރާފައެވެ. މިކަން ކްރިމިނަލް ކޯޓުގެ މުވައްޒަފުންނަށް އެނގެއެވެ.

ދީބާނާޒު ޕީޖީ އޮފީހުގައި އުޅުނު އިރު ސަރުކާރުގެ ހަރަދުގައި ކޯހެއް ހަދަން ނިއުޒީލޭންޑަށް ގޮސް އެ ކޯހުން ފާސްނުވުމުގެ ސަބަބުން އެ ކޯހަށް ސަރުކާރުން ހަރަދު ކުރި ފައިސާ ދިނުމަށް އެންގުމުން މި ވީހާދުވަހު އޮތީ އެފައިސާ ނުދައްކައެވެ. އެފައިސާ ސަރުކާރަށް ދައްކަން ސިވިލް ކޯޓުން ހުކުމް ކުރުމުން އެ ފައިސާ ދައްކާފައިވަނީވެސް އިންޓަޕޯލަށް ޖާސޫސްކޮށްގެން ލިބޭ ފައިސާއިން ކަމުގައިވެސް މި ނޫހަށް މައުލޫމާތުދިން ފަރާތުން ވަނީ ފާޙަގަކޮށްފައެވެ.

ޕީޖީ އޮފީހުގެ މަތީ މަގާމެއްގައި ހުރިއިރު ދީބާނާޒުވަނީ ކުރީގެ ރައީސް މައުމޫނަށް ޖާސޫސުކޮށްދީފައެވެ. 2008 ވަނަ އަހަރުގެ އިންތިހާބުގައި އެފަހަރު ހޮވުނު ރައީސް ނަޝީދު، އިންތިހާބު ހިނގަމުން ދަނިކޮށް ވޯޓުލާ މަރުކަޒަކަށް ދިޔަ މައްސަލާގައި ރައީސް މައުމޫނުގެ އެންގުމަށް ރައީސް ނަޝީދަށް ދައުވާކޮށް ޖަލަށްލުމަށްވެސް ދީބާނާޒު ވަރަށް މަސައްކަތްކުރިކަމަށް މައުލޫމާތު ލިބެއެވެ. ނަމަވެސް އެއިރުގެ ޕީޖީ އަހްމަދު މުއިއްޒު އެ ދައުވާ ކުރަން އެއްބަސްނުވުމުން އެކަން ނުވީއެވެ.

ދީބާނާޒު ދަންނަ ފަރާތަކުން މައުލޫމާތު ދިން ގޮތުގައި ދީބާނާޒަކީ ފަނޑިޔާރެއްގެ ސުލޫކު ހުންނަ ފަރާތެއް ނޫނެވެ. އެގޮތުން ވަގު ޓްއިޓަރ ހަދައިގެން ސިޔާސީ ކަންކަމަށް ޓްއިޓަރ ގައި ދީބާނާޒު ވަރަށް އެކްޓިވްއެވެ. އެގޮތުން ޓްއިޓްރ އެކައުންޓެއް ކަމުގައިވާ "AhusanDemahom (Prolix)@" އަކީ ދީބާނާޒު ގެ ވަގު ޓްއިޓަރ އެކައުންޓެވެ. މި އެކައުންޓުގެ ޓްވީޓް ތަކަށް ބަލާލުމުންވެސް ދީބާނާޒަކީ މައުމުނިޒަމްގެ މީހެއްކަން އެނގެއެވެ.

ދީބާނާޒަކީ ކުށްވެރިންނަށް ހަރުކަށީ އަދަބުދީ އެމީހުން ރިހެބިލިޓޭޓް ކުރުމާ ވަރަށް ދެކޮޅު މީހެއް ކަމަށް އޭނާ ދަންނަ މީހުން ބުނެއެވެ. ޕީޖީ އޮފީހުގައި އުޅުނު އިރު ފޭދޫ ކުޑަކުއްޖަކަށް ޒިނޭ ކުރުމުގެ ދައުވާ އުފުލުމުގެ އަޑިގައި ހުރީވެސް މީނާއެވެ. ރޭޕް ކޭސްތަކުގެ ވިކްޓިމުންނަށް ދައުވާކުރުމަކީވެސް މީނާ ކޮށްފައިވާ ލާއިންސާނީ ކަންކަމެވެ.

ދީބާނާޒު ގެންގުޅޭ ވަގު ޓްއިޓްރ އެކައުންޓަށް ބަލާލުމުން މީނާގެ އަސްލު ހަގީގަތް ކޮންމެވެސް މިންވަރަކަށް ފާޅުވެއެވެ. ރައީސް މައުމޫނުގެ ވެރިކަން ނިމުމަކަށް ގެނައީ ރައީސް ނަޝީދު ކަމުގައިވާތީ އެކަމުގެ ހިތްހަމަނުޖެހުންތައް މި އެކައުންޓުން ފާޅުކުރެއެވެ. ހަސަން ކުރުސީއަށްވެސް ދީބާނާޒުގެ ވަގު އެކައުންޓުން މައްލަވަކުރެއެވެ. ރައީސް ނަޝީދަށް ބޮމުގެ ހަމަލާއަށްފަހު ގެޔެއް ހާއްސަ ކުރުމުން އެކަމާވެސް ދީބާނާޒުގެ ވަގު ޓްއިޓަރއިން ވަރަށް ފާޑު ކިޔާފައިވެއެވެ. ނަމަވެސް ދީބާނާޒުގެ މި ހިޔާލުތަކަކީ ފާޅުގައި ހާމަކުރަން ކެރޭ ކަންކަމެއް ނޫނެވެ.

ކްރިމިނަލް ކޯޓުގެ މުވައްޒަފަކު މައުލޫމާތުދިން ގޮތުގައި މި ފަހަކަށްއައިސް ދީބާނާޒު އުޅެނީ ކްރިމިނަލް ކޯޓުގެ އިސްގާޒީގެ މަގާމު ހޯދަން ވެގެންނެވެ. އެގޮތުން ކޯޓުގެ ހިންގުމަށް އެކި ގޮތްގޮތުން ދީބާނާޒު ހުރަސްތައް ކުރިމަތިކުރާކަމަށްވެއެވެ. މިކަމުގައި ދީބާނާޒަށް އެހީތެރިވަމުންދަނީ ކްރިމިނަލް ކޯޓުގައި މަސައްކަތްކުރާ ނާދިރާ އަބްދުﷲ ކަމުގައި އެފަރާތުން މައުލޫމާތު ދީފައިވެއެވެ. އެގޮތުން ނާދިރާ އަބްދުﷲއާ ގުޅިގެން ދީބާނާޒުދަނީ ކޯޓު ހިންގިޔަ ނުދީ ކޯޓު ހުއްޓުމަކަށް ގެނައުމުގެ މަސައްކަތްކުރަމުންނެވެ.