ރިމާންޑް ޖަލުތަކުގައި ތިބޭ ޤައިދީންގެ ބޭސް ފަރުވާކުރުމުގެ ހުއްދަ ކޯޓުން ދިނުމުންވެސް، ބޭސް ފަރުވާއަށް ހޮސްޕިޓަލަށް ނުގެންދާކަމަށް ދިފާއީ ވަކީލުން ބުނެއެވެ. ރިމާންޑް ޖަލުތަކުގައި ތިބެނީ ޝަރީޢަތުން ގޮތެއް ނިމެންދެން ބަންދުކޮށްފައިތިބޭ ޤައިދީންނެވެ.
އެކަށީގެންވާ ބޭސް ފަރުވާނުލިބޭކަމުގެ ޝަކުވާތަކަކީ އެންމެ ޢާންމުކޮށް އިވޭ ޝަކުވާއެވެ. މިފަހަކަށް އައިސް ޝަރީޢަތުން ގޮތެއް ނިމެންދެން ބަންދުކުރާ މީހުން ބޭސް ފަރުވާއަށް ދޫކުރުމުގައި ދިވެހިރާއްޖޭގެ ހައިކޯޓުން ހަރުކަށި އުޞޫލުތަކެއް ޤާއިމުކުރުމާއެކު، ބަންދުގައިތިބޭ ޤައިދީންގެ ބޭސް ފަރުވާކުރުމުގެ ޙައްޤުން މަޙްރޫމްކުރާކަމުގެ ޝަކުވާދަނީ ގަދަވަމުންނެވެ. ދިވެހިރާއްޖޭގެ ހައިކޯޓުން 2021 ވަނަ އަހަރު ނިންމާފަވަނީ، ޤައިދީއަކު ބަންދުން ދޫކުރެވޭނީ، ޤާނޫނު ތަންފީޒުކުރާ އިދާރާއިން އެޤައިދީއަކަށް ފަރުވާކުރުމުގައި އިހުމާލުވެފައިވާނަމައެވެ. އެގަޒިއްޔާގެ ނިންމުމަށް ބަލާއިރު، ބަންދުގައި ތިބޭ މީހުންގެ ޢާއިލާއިން ބޭސް ފަރުވާކުރުމުގެ އިންތިޒާމް ހަމަޖެހޭނަމަ، ޑޮކްޓަރަށް ދެއްކުމަށްޓަކައި ކުލިނިކަށް ނުވަތަ ހޮސްޕިޓަލަށް ބަންދުމީހާ ހާޒިރުކުރުމަކީ މޯލްޑިވްސް ކަރެކްޝަނަލް ސަރވިސަސް އިން ކުރަންޖެހޭ ކަމެކެވެ.
ކުރިމިނަލް ކޯޓުގައި ހިނގަމުންދާ ޝަރީޢަތްތަކުގެ ތެރެއިން ބަންދުގައި ތިބި ގިނަ ޢަދަދެއްގެ ޤައިދީންގެ ޢާއިލާތަކުން މިހާރު އެދެނީ ޢާއިލީ ޚަރަދުގައި ބޭސް ފަރުވާކުރުމެވެ. އެއިންތިޒާމް ހަމަޖެހޭ ގޮތަކީ، ޢާއިލާގެ ފަރާތުން ބަންދުގައި ހުންނަ މީހާ ޑޮކްޓަރަށް ދައްކަން މެމޯއެއް ހަދައި، އެމެމޯ ކޯޓަށް ފޮނުވުމުން، މެމޯގައިވާ ތާރީޚާއި ގަޑިއަށް ބަންދުގައިހުރި މީހާ، މެމޯގައިވާ ޞިއްޙީ މަރުކަޒަށް ޙާޒިރުކޮށްދިނުމުގެ އަމުރެއް ކުރުމެވެ. އެހެން ނަމަވެސް، އެގޮތުގެ މަތީންވެސް ބޭސް ފަރުވާކުރެވޭނެ ގޮތެއް ފެނިފައިނުވެއެވެ.
ކޯޓުތަކާބެހޭ ޤާނޫނުގެ 77 ވަނަ މާއްދާ ބުނާ ގޮތުން، ކޯޓުން ކުރާ ކޮންމެ އަމުރަކަށް ތަބާވުމަކީ ދައުލަތުގެ ކޮންމެ މުއައްސަސާއެއްގެ މައްޗަށް ކޮންމެހެން ލާޒިމުކަމެކެވެ. ދާދި ފަހަކުންވެސް، މާލެ ޖަލުގައި ބަންދުގައި ހުރި ޤައިދީއަކު އެތެރެހަށީގެ އިންފެކްޝަން އުފެދުމުގެ ސަބަބުން އެތެރެހަށީގެ ޚާއްޞަ ޑޮކްޓަރަކަށް ދެއްކުމަށްޓަކައި މެޑިކާ ހޮސްޕިޓަލުން މެމޯ ހަދައި، ކޯޓަށް ފޮނުވުމުން، ކޯޓުން އެޤައިދީ މެޑިކާ ހޮސްޕިޓަލަށް ހާޒިރުކުރުމަށް މޯލްޑިވްސް ކަރެކްޝަނަލް ސަރވިސަސްގެ މައްޗަށް އަމުރު ނެރުނު ނަމަވެސް، އެއަމުރަށް މޯލްޑިވްސް ކަރެކްޝަނަލް ސަރވިސަސް އިން ތަބާވެފައެއް ނުވެއެވެ. ޢާއިލާއިން އެކަމުގެ ޝަކުވާކުރުމުން، މޯލްޑިވްސް ކަރެކްޝަނަލް ސަރވިސަސް އިން ބުނެފަވަނީ، ބަންދުގައި ހުރި މީހަކީ އެތެރެހަށީގެ ޑޮކްޓަރަށް ދައްކަންޖެހޭ މީހެއް ނޫނެވެ. އެކަމުގެ ޝަކުވާ ކުރިމިނަލް ކޯޓަށާއި ހިއުމަން ރައިޓްސް ކޮމިޝަނަށް އަދި ނޭޝަނަލް އިންޓެގްރިޓީ ކޮމިޝަނަށް މިހާރުވަނީ ހުށަހެޅިފައެވެ.
މީގެ އިތުރުން، 10 ފެބްރުއަރީ 2022 ދުވަހުގެ ހަވީރު 4 ޖަހާއިރަށް،ބޭސް ފަރުވާއަށް އޭޑީކޭ ހޮސްޕިޓަލަށް ހާޒިރުކުރުމަށްޓަކައި ހަމަޖެހިފަވާ ޤައިދީއަކު ހޮސްޕިޓަލަށް ހާޒިރުނުކޮށްދިން މައްސަލައެއްވެސް ހިއުމަން ރައިޓްސް ކޮމިޝަނަށްވަނީ ހުށަހެޅިފައެވެ. ކޯޓު އަމުރަކަށް ނުވަތަ އެންގުމަކަށް ތަބާނުވުމަކީ ކޯޓުގެ ޙުރުމަތް ކެނޑުންކަމުގައިވާއިރު، މޯލްޑިވްސް ކަރެކްޝަނަލް ސަރވިސަސް އާމެދު ފިޔަވަޅު އަޅަން ނުޖެހޭ ސަބަބަކީ ކޮބާ ހެއްޔެވެ!
