ރޯދަހިފާއިރު އަހަންނަށް ވަރަށް އުފާވެރި އިހުސާސެއް ކުރެވޭ ކަމަށް ރިއަލްމެޑްރިޑްގެ ފޯވާޑް ކަރީމް ބެންޒީމާ ބުނެފިއެވެ.
ޗެމްޕިއަންސް ލީގުގެ ކުއާޓާ ފައިނަލުގައި ޗެލްސީ ކޮޅަށް 3 ގޯލް ޖެހާ ހެޓްރިކް ހެދި މެޗު ފެށުމުގެ 16 މިނެޓު ކުރިން ރެއާލުގެ ފޯވާޑް ކަރިމް ބެންޒެމާ ހުރީ ރޯދަ ވީއްލާށެވެ. ރޯދަ ވީއްލިގޮތަށް ކުޅެންއަރައި ބެންޒީމާ ދެއްކި މޮޅު ކުޅުމަށް ގިނަބަޔަކު އަންނަނީ ތައުރީފް ކުރަމުންނެވެ. މި މެޗުން ރިއަލްމެޑްރިޑް މޮޅުވީ 3-1 ލަނޑުންނެވެ.
މެޗަށްފަހު ބެންޒީމާ ބުނެފައިވަނީ ރޯދަމަހުގެ ސަބަބުން އޭނާއަށް އެއްވެސް ނުރަނގަޅު އަސަރެއް ނުކުރާ ކަމަށެވެ. އަދި ރޯދައިގެ ސަބަބުން އުފާވެރިކަމުގެ އިހްސާސްތަކެއް ކުރެވެމުންދާކަމަށެވެ.
"އެއީ އަހަރެންގެ ދިރިއުޅުމުގެ ބައެއް އަދި އަހަރެމެން ދީނުގައި މަޖުބޫރުކަމެއް. އަހަންނަށް އެއީ ވަރަށް މުހިއްމު ކަމެއް .އަދި ރޯދަހިފާއިރު އަހަންނަށް ވަރަށް އުފާވެރި އިހުސާސެއް ކުރެވޭ." ބެންޒެމާ ބުނެފައިވެ އެވެ.
މި ރޯދަމަސް ދިމާވީ ޔޫރަޕްގެ ބޮޑެތި ލީގުތަކުގެ އެންމެ ފޯރިގަދަ މެޗްތައް ކުޅޭ ދުވަސްވަރާއެވެ. އިނގިރޭސި ޕްރިމިއާ ލީގުގެ މެޗްތައް ގިނައިން ގުޅެނީ އެޤައުމަށް ދުވާލު ވަގުތުގައެވެ. މިގޮތުން ރޯދަމަހުގެ ފުރަތަމަ ދުވަހު ލިވަޕޫލާއި ވަޓްފޯޑް ކުޅުނު މެޗް ކުޅުނީ އެޤައުމުގެ ގަޑިން މެންދުރު 1:30 ގައެވެ. މި މެޗް ކުޅުނު އިރު ލިވަޕޫލްގެ އެންމެ މުހިންމު ދެކުޅުންތެރިން ކަމަށްވާ މުޙައްމަދު ސަލާހާއި ސާޑިއޯ މާނޭ ތިބީ ރޯދައަށެވެ. މެޗަށްފަހު މި ދެކުޅުންތެރިންވެސް ބުނީ މެޗު ކުޅެންޖެހުމަކީ ރޯދަ ދޫކޮށްލަން ޖެހޭ ސަބަބެއް ނޫންކަމަށެވެ.
