ރިޔާސީ ޤަރާރު ތަންފީޒުކޮށް "އިންޑިއާ އައުޓް" ހުއްޓުވަން ގޮވާލާ ޒުވާނުން މުޒާހަރާކޮއްފި

ރިޔާސީ ޤަރާރު ތަންފީޒުކޮށް "އިންޑިއާ އައުޓް" ކެމްޕެއިން ހުއްޓުވަން ގޮވާލާ "މޯލްޑިވްސް ޔޫތު ފޯސް" އިން މުޒާހަރާކޮއްފިއެވެ.

މޯލްޑިވްސް ޔޫތު ފޯސް އިން މިއަދު މުޒާހަރާކޮށްފައިވަނީ އިންޑިއާ އައުޓް ކެމްޕެއިންގައި އިސްކޮށް އުޅުއްވާ ކުރީގެ ރައީސް ޔާމީންގެ ގެކޮޅު ކުރިމަތީގައެވެ. ތަފާތު އެކި ޝުއޫރުތައް ހިމެނޭ ޕޯސްޓަރު ތަކާއެކު ކުރި މި މުޒާހަރާގައި ރައީސް ޔާމީން ހައްޔަރުކުރުމަށްވެސް ގޮވާލާފައިވެއެވެ. އަދި ރައީސް ޔާމީންގެ ޝަރީއަތް އަވަސް ކުރުމަށާއި ނަފްރަތު އުފެދޭ ގޮތަށް ކަންކަން ނުކުރުމަށާއި އަދި ދޭދޭ ގައުމުތަކާއި ރާއްޖެއާއި ދެމެދު އޮތް ޒަމާންވީ ގުޅުންތަކަށް ބުރޫއަރާ ގޮތަށް އަމަލުނުކުރުމަށެވެ.

ރައީސް ޔާމީންގެ ގެކޮޅު ކުރިމަތީ ޒުވާނުން އަޑު އުފުލަން ފެށުމާއެކު އެމަނިކުފާނަށް ތާއީދު ކުރައްވާ ބައެއް ފަރާތްތަކުން ވަނީ އެސަރަހައްދަށް އެއްވެ ނުރުހުން ފާޅުކޮށްފައެވެ. ނަމަވެސް ފުލުހުން ވަނީ ދެ ބައި މީހުންގެ މެދަށްވަދެ ހަމަނުޖެހުމެއް ނުހިނގަނީސް އެސަރަހައްދު ކޮންޓްރޯލްކޮށްފައެވެ. އަދި ފުލުހުންގެ އަމުރަށް ކިޔަމަންވެ މޯލްޑިވްސް ޔޫތު ފޯސްއިން ވަނީ އެސަރަހައްދު ދޫކޮށް ގޮސްފައެވެ.

މޯލްޑިވްސްއިން ޔޫތު ފޯސްއިން މީގެ ދެދުވަސްކުރިން އާންމު ކުރި ވީޑިއޯއެއްގައި ބުނެފައިވަނީ ޤައުމު ކުރީގައި ވެރިކަން ކުރި ބޭފުޅަކު ޤައުމު ދަރުވާލުމަށްފަހު އަލުން ވެރިކަމަށް އަންނަން މަސައްކަތްކުރަމުންދާ ކަމަށާއި މިފަދަ އަނިޔާވެރި ވެރިޔަކަށް ދެން އެފުރުޞަތު ނުދެއްވާނެ ކަމަށެވެ. އަދި މޯލްޑިވްސް ޔޫތު ފޯސްއިން "އޭނާ ސައިޒް" ކުރާނެ ކަމަށް މި ވީޑިއޯގައި ބުނެފައިވެއެވެ. އެމަނިކުފާނު ސައިޒު ކުރާނެ ކަމަށް ބުނުމަކީ ރައީސް  ޔާމީންއަށް ދިން އިންޒާރެއް ކަމަށާއި މިއީ ޓެރަރިޒަމްގެ އަމަލެއް ކަމަށް ޕީޕީއެމްއިން ބުނެއެވެ. އަދި މި މައްސަލަ ފުލުހުންނަށްވެސް އެޕާޓީން ވަނީ ހުށައަޅާފައެވެ. މޯލްޑިވްސް ޔޫތުފޯސް އިން ބުނެފައިވަނީ "ސައިޒްކުރުން" މި ބަހުގެ މާނައަކީ ޤާނޫނީ އިމުގެ ތެރެއަށް ފެއްތުން ކަމަށެވެ. އަދި ރައީސް ޔާމީން "އިންޑިއާ އައުޓް" ކުރިއަށް ގެންދަވަނީ ރައީސުލްޖުމްހޫރިއްްޔާގެ ޤަރާރާއި ކޯޓު އަމުރަށް ގޮންޖެއްސެވުމަށްފަހު ކަމަށް މޯލްޑިވްސް ޔޫތު ފޯސްއިން ބުނެއެވެ.