މަސްޢޫދު ޙިލްމީއަށް ޙަމަލާދިން މައްސަލަ ސާބިތުނުވީ، ދައުލަތުގެ ހެކިންގެ ހެކިބަސް ދަޢުވާލިބޭ ފަރާތާއި އެއްކޮޅަށް ލިބުމުންކަމަށް މައްސަލައިގެ ދިފާޢީ ވަކީލު ޝަޒީމް ވަހީދު ވިދާޅުވެއްޖެއެވެ.
އިރުވަރު ނޫހަށް މައުލޫމާތުދެއްވަމުން ވަކީލު ޝަޒީމް ވިދާޅުވީ، ލ. ފޮނަދޫގައި މަސްޢޫދު ޙިލްމީއަށް ދަގަނޑުބުރިއަކުން ޙަމަލާދިންކަމުގައި ބުނެ ދައުލަތުން ދަޢުވާކުރި މައްސަލާގައި ދަޢުވާލިބޭ ފަރާތުގެ މައްޗަށް ކުށް ސާބިތުނުވާކަމަށް ޙުކުމްކޮށްފަވަނީ، ކުށް ސާބިތުކުރެވޭ މިންވަރަށް ހެކި ނެތުމުންނެވެ. މިމައްސަލައިގައި މަސްޢޫދު ހިލްމީ ދިފާޢީ ހެއްކެއްގެ ގޮތުން ހުށައެޅި އޭނާގެ އަންހެނުންގެ ހެކިބަސް ވެސް އޮތީ މަސްއޫދު ހިލްމީ އާ ދެކޮޅަށް ކަމަށް ވަކީލު ވިދާޅުވިއެވެ.
މައްސަލާގެ ފަސް ފަހަތް:
މަސްޢޫދު ޙިލްމީއަކީ ލ. ފޮނަދޫ މީހަކާއި އިނދެގެން ލ. ފޮނަދޫގައި ދިރިއުޅޭ ތ. ވިލުފުށީ މީހެކެވެ. މަސްޢޫދު ޙިލްމީއަށް ހަމަލާދިން ކަމަށް ތުހުމަތުކުރެވޭ މީހާއަކީ މަސްޢޫދު ޙިލްމީގެ ރެސްޓޯރެންޓްގައި މަސައްކަތްކުރި ކުރީގެ އޭނާގެ ސްޓާފެކެވެ. ނަމަވެސް އެ ރެސްޓޯރެންޓްގެ އަންހެން މުވައްޒަފަކާ މަސްޢޫދު ޙިލްމީއަށް ހަމަލާދިން ކަމަށް ބުނާ ފަރާތާ ގާތް ގުޅުމެއް އޮތް ކަމަށްބުނެ އޭނާ ވަޒީފާއިން ވަކިކުރިކަމަށްވެއެވެ. އޭގެ ފަހުން މި ދެމީހުންގެ ދޭތެރޭގައި ރުޅިވެރިކަން އޮންނަ ކަމަށް ފޮނަދޫ މީހުން ބުނެއެވެ.
މަސްޢޫދު ޙިލްމީއަށް ދަގަނޑު ބުރިއަކުން މީހަކު ޙަމަލާދިންކަމުގައި ބުނެ އޭނާ ފުލުހުންނަށް މައްސަލަ ހުށަހެޅިއެވެ. ހާދިސާ ހިނގި ގޮތްކަމުގައި މަސްޢޫދު ޙިލްމީ ބުނަނީ އޭނާގެ އަނބިމީހާއާއެކު ސައިކަލުގައި ފިނިބުރެއް ޖަހާލަން ނުކުމެ އުޅެނިކޮށް، ފަހަތުން ސައިކަލެއްގައި ދުއްވާފައި އައި މީހަކު މަސްޢޫދު ޙިލްމީ ދުއްވިކަމުގައި ބުނާ ސައިކަލާއި އަރާ ހަމަކޮށް، ދަގަނޑުބުރިއަކުން ޖަހާފައި ދިޔައީ ކަމުގައި ބުނެއެވެ. މަސްޢޫދު ޙިލްމީގެ ސައިކަލުގެ ފަހަތުގައި އިނީ މަސްޢޫދު ޙިލްމީގެ އަންހެނުންނެވެ. މަސްޢޫދު ޙިލްމީއަށް ހަމަލާދިން މަންޒަރު ވީޑިއޯ ކުރީ މަސްޢޫދު ޙިލްމީގެ އަންހެނުންކަމުގައި މަސްޢޫދު ޙިލްމީ ބުނެއެވެ.
ހެކި ހާމަކުރުމުގެ މަރުޙަލާ
ދަޢުވާލިބޭ މީހާގެ މައްޗަށް ދައުލަތުން ދަޢުވާ އިއްވުމުން ދަޢުވާލިބޭ މީހާ މުޅި ދަޢުވާގެ އަޞްލަށްކުރީ އިންކާރެވެ. ދައުލަތުން ހެކި ހާމަކުރުމުގެ މަރުޙަލާގައި ދަޢުވާ ސާބިތުކުރުމަށްޓަކައި، މަސްޢޫދު ޙިލްމީ، މަސްޢޫދު ޙިލްމީގެ އަންހެނުން، މެޑިކޯ ލީގަލް ރެކޯޑު ތައްޔާރުކުރި ޑޮކްޓަރ، ސީން އޮފް ކްރައިމް އޮފިސަރ ރިޕޯޓު ތައްޔާރުކުރި ފަރާތް، މޮބައިލް ފޮރެންސިކް ރިޕޯޓު އަދި ވީޑިއޯ އިމޭޖް އެނަލިސެސް ރިޕޯޓް ހުށަހެޅިއެވެ.
ދަޢުވާ ލިބޭ ފަރާތުން ދިފާޢީ ހެކީގެ ގޮތުގައި ހުށަހަޅާފަވަނީ، ހާދިސާ ހިނގި ތަނުގެ ނެތްކަމުގެ ދިފާޢު ސާބިތުކޮށްދިނުމުގެ ގޮތުން ޝަފަހީ 4 ހެއްކެކެވެ. އެހެކިން ބަލައި ނުގަތުމަށް ދައުލަތުން އެއްވެސް އިޢުތިރާޒެއްވެސް ނުކުރެއެވެ.
ހެކިންގެ ހެކިބަސް:
ދަޢުވާލިބޭ މީހާގެ މައްޗަށް ދަޢުވާކޮށްފަވާ ކުށް ސާބިތުނުވީ ހެކި ނެތިގެންނެވެ. މަސްޢޫދު ޙިލްމީ ބުނެފަވަނީ، އޭނާއަށް ޙަމަލާދިނީ ދަގަނޑު ބުރިއަކުންނެވެ. ޙަމަލާދިނީ ދަޢުވާ ލިބޭ ފަރާތުން ކަމަށް ބުނެއެވެ. މަސްޢޫދު ޙިލްމީގެ އަންހެނުން ބުނެފަވަނީ، ދަޢުވާ ލިބޭ ފަރާތުން ދަގަނޑުބުރި މަޅާލިތަން ފެނުނު ނަމަވެސް، "ޖެހިތަނެއް" ނުދެކޭކަމަށެވެ. އެމަންޒަރު އައިފޯން 13 ޕްރޯ މެކްސް ފޯނަކުން ވީޑިއޯވެސް ކޮށްފަވާނެކަމަށެވެ.
ޚަބީރުންގެ ހެކިބަސް:
މެޑިކޯ ލީގަލް ރެކޯޑް ތައްޔާރުކުރި ޑޮކްޓަރ ހެކިބަސް ދެމުން ބުނެފަވަނީ، މަސްޢޫދު ޙިލްމީ އަށް ލިބިފަވާ އަނިޔާއަކީ ތޫނު އެއްޗަކުން ދިން ޙަމަލައެއް ނޫނެވެ. މަސްޢޫދު ޙިލްމީ އަށް އަނިޔާ ލިބިފަވަނީވެސް މަސްޢޫދު ޙިލްމީގެ ވައަތަށްކަމުގައި ޑޮކްޓަރ ބުނެފައިވެއެވެ. މަސްޢޫދު ޙިލްމީ ޑޮކްޓަރަށް ދައްކަން ޞިއްޙީ މަރުކަޒަށް ގޮސްފަވަނީ އެރޭ 10 ޖެހިފަހުންކަން އެރިޕޯޓަށް ބެލުމުން އެނގެއެވެ.
ސީން އޮފް ކްރައިމް އޮފިސަރސް ރިޕޯޓު ތައްޔާރުކުރި ފަރާތް ހެކިބަސް ދެމުން ބުނެފަވަނީ، މަސްޢޫދު ޙިލްމީއަށް ޙަމަލަދިން ފަހުން ކުޑަ އިރުކޮޅެއްތެރޭގައި މަސްޢޫދު ޙިލްމީ ހުރި ގެއަށް ދިޔަކަމަށެވެ. އޭރު މަސްޢޫދު ޙިލްމީއަށް ލިބިފައިވާ އަނިޔާއަކީ ކަނާތް މަށައިގެން ދިޔުންކަމަށެވެ. އަނިޔާ އެނަލައިޒްކޮށް 9:25 ހާއިރު ނިމުނުކަން އެނގެއެވެ.
މޮބައިލް ފޮރެންސިކް ރިޕޯޓު ތައްޔާރުކުރި ފަރާތް ހެކިބަސް ދެމުން ބުނެފަވަނީ، އެނަލައިޒް ކުރެވުނީ އައިފޯން 11 ގެ ފޯނެކެވެ. އެފޯނުން 2 ވީޑިއޯ އެއް ފެނެއެވެ. ހެކި ހޯދައި ނަޤުލުކުރުމަށްޓަކައި ކޯޓު އަމުރެއް ނެތެވެ. ވީޑިއޯ އިމޭޖް އެނަލިސެސް ރިޕޯޓު ތައްޔާރުކުރި ފަރާތުން ހެކިބަސް ދެމުން ބުނެފައިވަނީ، ވީޑިއޯ އިން ފެންނަނީ މީހަކު ދަގަނޑު ބުރިއެއް ކަހަލަ އެއްޗެއް މަޅާލުމުން ތަނެއްގައި ޖެހޭ މަންޒަރެވެ. ވީޑިއޯ އިން ފެންނަނީ ދަޢުވާލިބޭ ފަރާތްކަމެއް ޔަޤީންކަމާއެކު އެރިޕޯޓު ތައްޔާރުކުރި ފަރާތަށް ބުނެދެވިފައިނުވެއެވެ.
ދިފާޢީ ހެކިންގެ ހެކިބަސް:
ދަޢުވާލިބޭ ފަރާތުން ހުށަހަޅާފައިވާ ދިފާޢީ ހެކިންގެ ހެކިބަހަށް ބަލާއިރު، ދަޢުވާގައި ބަޔާންކުރާ ކުށުގެ ހާދިސާ ހިނގިއިރު، ދަޢުވާލިބޭ ފަރާތްހުރި ހެކިވެރިންނާއެކު ލ. ފޮނަދޫ ގެއެއްގައި ބެޑްރޫމް ސެޓެއް ރާވާށެވެ. އެގެއިން ބޭރަށް ހެކިވެރިންގެ ލޯމަތިން ދަޢުވާ ލިބޭ ފަރާތް ބޭރަށް ގޮސް ގެއްލޭ ހިސާބަށް ނުދާކަމުގައި ހެކިން ބުނެއެވެ.
ދައުލަތުގެ ހެކިންގެ ހެކިބަސް ދަޢުވާ ލިބޭ މީހާއާއި އެއްކޮޅަށް ލިބިފަވުން:
މަސްޢޫދު ޙިލްމީއަށް ޙަމަލަދިނީ ދަޢުވާލިބޭ މީހާކަމުގައި ބުނެ ސާފު އެއްވެސް ހެއްކެތް ލިބިފައިނެއް ކަމަށް ދިފާޢީ ވަކީލު ބުނެއެވެ. މަސްޢޫދު ޙިލްމީއަކީ ދަޢުވާލިބޭ މީހާއާއި ޒާތީ ދެކޮޅުވެރިކަމާއި، ރުޅިވެރިކަމުގެ މަޙައްލެއްގައި ހުރި މީހެއްކަމުގައިވާތީ، މަސްއޫދު ޙިލްމީގެ ހެކިބަހަކީ ދަޢުވާލިބޭ މީހާގެ މައްޗަށް ހެކިބަސްދެވޭ ޙާލަތުގައި ހުރި މީހެއް ނޫން ކަމަށް ވަކީލު ވިދާޅުވިއެވެ.
މަސްޢޫދު ޙިލްމީގެ އަންހެނުންގެ ހެކިބަސް ލިބުނީ ދަޢުވާ ލިބޭ މީހާއާއި އެއްކޮޅަށެވެ. މަސްޢޫދު ޙިލްމީގެ އަންހެނުން، މަސްޢޫދު ޙިލްމީއަށް ޙަމަލާދިން މަންޒަރު ވީޑިއޯކުރި ކަމަށްބުނާ ފޯނު މޮޑެލް އާއި ފުލުހުން އެނަލައިޒްކުރި ފޯނު މޮޑެލްއާވެސް ދިމާނުވެއެވެ. މަސްޢޫދު ޙިލްމީގެ އަންހެނުން ބުނެފަވަނީ، އެމަންޒަރު ވީޑިއޯ ކުރީ އެޕަލް "13 ޕްރޯ މެކްސް" އައިފޯނަކުންކަމަށެވެ. އެހެން ނަމަވެސް، ދުނިޔޭގެ ބާޒާރަށް އައިފޯނުން އެޕަލް 13 ޕްރޯމެކްސް ފޯނު ނެރެފަވަނީވެސް، މަސްޢޫދު ޙިލްމީއަށް ޙަމަލާދިނުމުގެ ހާދިސާ ހިނގިތާ، ގާތްގަނޑަކަށް "ދެމަސް" ފަހުންނެވެ.
ދައުލަތަށް ޖަވާބު ނުދެވޭ ކަންތައްތަކެއް:
ދައުވާ ލިބޭ މީހާގެ މައްޗަށް ދައުލަތުން ދަޢުވާކުރީ މަސްޢޫދު ޙިލްމީއަށް ދަގަނޑުބުރިއަކުން ޙަމަލާދީގެންކަން ދަޢުވާގައި ބުނެއެވެ. ދަގަނޑުބުރިއަކުން ޙަމަލާދިންކަމުގައި ދައުލަތުން ބުނާއިރު، އެދަގަނޑުބުރި ކޮބާތޯ ދިފާޢީ ވަކީލުން ސުވާލުކުރުމުން، ދައުލަތުން ބުނެފަވަނީ ތަޙްޤީޤުގައި ދަގަނޑުބުރި ހޯދަންވެސް ފުލުހުން ކުރި އެއްވެސް މަސައްކަތެއް ބުނެދޭކަށް ނޭނގެއެވެ. ސީން އޮފް ކްރައިމް އޮފިސަރސް ރިޕޯޓު ތައްޔާރުކުރި ފަރާތުންވެސް ދަގަނޑުބުރި ހޯދަންކުރި މަސައްކަތެއް ބުނެނުދެވުނެވެ. ކުށުގެ ޢުންޞުރުތަށް ސާބިތުކޮށްދިނުމުގައި، މިޙާލަތުގައި ދައުލަތުން ސާބިތުކޮށްދޭންޖެހޭނީ، މަސްޢޫދު ޙިލްމީއަށް ޙަމަލާދިނުމުގައި ބޭނުންކުރީ ދަގަނޑުބުރިއެއްކަމެވެ. އެހެން ނަމަވެސް، އެކަން ސާބިތުވާވަރުގެ އެއްވެސް ހެއްކެތް ދައުލަތަށް ނުދެއްކުނެވެ.
މަސްޢޫދު ޙިލްމީއަށް ލިބިފަވާ އަނިޔާ އަކީ ކަނާތް މަށައިގެން ދިޔުންކަން އަނިޔާ އެނަލައިޒްކުރި ފުލުހުންގެ ހެކިބަހުން އެނގޭއިރު، މަސްޢޫދު ޙިލްމީ ބެލި ޑޮކްޓަރ ބުނެފަވަނީ، މަސްޢޫދު ޙިލްމީއަށް އަނިޔާވެފައިވަނީ ވާތަށެވެ. ހެކިބަހުގައި އުޑާ ބިމާހާ ތަފާތު ފުށުއެރުންތަކެއް ހުރިކަމަށް ދިފާޢީ ވަކޫލު ބުންޏެވެ. މަސްޢޫދު ޙިލްމީ ޞިއްޙީ މަރުކަޒަށް ދިޔައީ އަނިޔާ ލިބުނުތާ ގާތްގަނޑަކަށް 30 މިނެޓް ފަހުންނެވެ. އޭރު ފުލުހުންވެސް ބުނެފައިނުވާ އިތުރު އެހެން އަނިޔާއެއް މަސްޢޫދު ޙިލްމީއަށް ވެފައިވެއެވެ. އެއީ، ކިހިނަކުން ވެފައިވާ އަނިޔާއެއްކަމާމެދު ދިފާޢީ ވަކީލުން ސުވާލު އުފެއްދުމުން އެސުވާލަށް ދައުލަތުން ޖަވާބުނުދޭކަން ފާހަގަވިއެވެ.
މި މައްސަލަ މިހާރު ވަނީ އިސްތިއުނާފް ކޮށްފައެވެ. އަދި މައްސަލަ ބެއްލެވި ގާޒީގެ މައްސަލަ ވަނީ ޖޭއެސްސީއަށްވެސް ހުށައަޅާފައެވެ. މި މައްސަލަ ބަލައިގަތްކަމެއް އަދި ސާފެއް ނުވެއެވެ.
