އިންގްލިޝް ޕްރިމިއާ ލީގުގެ ޗެމްޕިއަންކަން މެންޗެސްޓަރސިޓީ ކަށަވަރު ކުރި މެޗްގައި އެސްޓަން ވިލާއިން މެޗް ދޫކޮއްލިކަމަށް އިނގިރޭސި މީޑިއާ ތަކުން ބުނެފިއެވެ.
މިކަން އިނގިރޭސީ މީޑިއާގެ ސަމާލުކަމަށްވެސް މިހާރު ވަނީ އައިސްފައެވެ. އިނގިރޭސި ބައެއް މީޑިއާ ރިޕޯޓްތައް ބުނާ ގޮތުން އެސްޓަން ވިލާއިން ސިޓީ މޮޅުވާނެ ގޮތަށް ހުރިހާ ކަމެއް މަގުފަހިކޮށްދިނެވެ. މިގޮތުން އެންމެ ގަދަޔަށް ދެކެވެމުން އަންނަ ވާހަކައަކީ މުޅި މެޗްގައި ވެސް އެންމެ މޮޅަށް ކުޅެމުން އައި އެސްޓަން ވިލާގެ ކޯޓިނިއޯ ގޯލެއް ޖެހިތާ ދެމިނެޓް ފަހުން ބަދަލުކުރި ވާހަކައެވެ. މުޅި މެޗް ބަދަލުވެގެން ދިޔައީ އެހިސާބުން ކަމަށް މީޑިއާއިން ވަނީ ސިފަކޮށްފައެވެ.
އިނގިރޭސި ޕްރިމިލީ ލީގުގެ ފަހުމެޗްތައް ރޭ ކުޅުނު އިރު ޗެމްޕިއަންކަމަށް ވާދަކުރަމުން އައީ ސިޓީއާއި ލިވަޕޫލެވެ. ސިޓީ ކުރީގައި އޮތީ އެންމެ ޕޮއިންޓެއްގެ ތަފާތަކުންނެވެ. މެޗްތައް ކުޅެމުން ދިޔައީ އެއްވަގުތެއްގައެވެ. ލިވަޕޫލް މޮޅުވެ ސިޓީއަށް މޮޅު ނުވެވިއްޖެ ނަމަ ލީގު ލިބޭނީ ލިވަޕޫލަށެވެ. ފަހު މެޗް ވުވްލްސްއާ ވާދަކޮށް ލިވަޕޫލުން ކާމިޔާބުކުރީ 1-3 ލަނޑުންނެވެ. ސިޓީން މެޗް ކާމިޔާބުކުރީ 2-3 ލަނޑުންނެވެ. މިމެޗް ސިޓީ ހާސްކޮށްލުމަށްފަހު ފުރަތަމަ 2 ލަނޑު ޖެހީ އެސްޓަން ވިލާއިންނެވެ. ފުރަތަމަ ގޯލް މެޗްގެ 27 ވަނަ މިނެޓްގައި ޖެހީ ޑިފެންޑަރު ކޭޝްއެވެ. ސިޓީގެ ހުރިހާ ސަޕޯޓަރުން މާޔޫސްވެގެން ދިޔައީ 69 ވަނަ މިނެޓްގައި ލިވަޕޫލްގެ ކުރީގެ ކުޅުންތެރިޔާ ކޯޓިނިއޯ ގޯލެއް ޖަހާ ދެލަނޑުގެ ލީޑެއް ނެގުމުންނެވެ. މި މެޗްގައި ކޯޓިނިއޯ ދިޔައީ އެސްޓަން ވިލާގެ މެދުތެރެއިން މޮޅަށް ކުޅެ ސިޓީއަށް ނުރައްކާ ކުރަމުންނެވެ. މެޗްގެ މެދުތެރޭގެ ކޮންޓްރޯލް އޮތީ ކޯޓިނިއޯގެ އަތުގައެވެ. އެވަގުތާ ހަމައަށް ސިޓީން ވިލާގެ ގޯލާ އަމާޒުކޮށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ. މިއާއެކު ސިޓީގެ ސަޕޯޓަރުންގެ މޫނުމަތިން އުންމީދު ގެއްލިގެން ދިޔައެވެ. ބައެއް ސަޕޯޓަރުން މާޔޫސްވެ ރުއި މަންޒަރު ޓީވީތަކުން ދެއްކިއެވެ. ނަމަވެސް ކޯޓިނިއޯ ގޯލް ޖެހިތާ ދެމިނެޓް ފަހުން އޭނާ ވަނީ ބަދަލުކޮސްފައެވެ. އޭނާގެ ބަދަލުގައި ފުރަތަމަ މަދު މެޗްތަކަކުން ފެންނަ ނަކަމްބާއެވެ.
ސިޓީން މެޗް އަނބުރާލީ ފަސް މިނެޓް ތެރޭގައި 3 ގޯލް ޖަހައިގެންނެވެ. މެޗްގެ ސިޓީގެ ފުރަތަމަ ގޯލް ކޯޓިނިއޯ ބަދަލުކުރިތާ 6 މިނެޓް ފަހުން މެޗްގެ 76 ވަނަ މިނެޓްގައި ޖެހީ ބަދަލުކުޅުންތެރިއެއްގެ ގޮތުގައި ކުޅެންއެރި ގުންޑޮގާން އެވެ. އޭގެ 2 މިނެޓްފަހު ސިޓީން އެެއްވަރު ކުރީ މިޑްފީލްޑަރު ރޮޑްރީގޯ ޖެހި ގޯލުންނެވެ. ސިޓީން ލީގު ހޯދި ގޯލް 81 ވަނަ މިނެޓްގައި ޖެހީ ފުރަތަމަ ގޯލްވެސް ޖެހި ގުންޑޮގާން އެވެ. މި 3 ގޯލްވެސް ސިޓީން ޖެހީ މެދުތެރެއިން މޮޅަށް ކުޅެ އުފެއްދި ހަމަލާތަކުންނެވެ. އެހެން ކަމުން މުޅި މެޗް ބަދަލުވެގެން ދިޔައީ ކޯޓިނިއޯ ބަދަލުކުރި ހިސާބުންކަމަށް މީޑިއާތަކުން ބުނެއެވެ. އަދި އަނިޔާއެއް ނުވެ ސީޒަންގެ އިތުރު މެޗެއް ނެތް އިރު އޭނާ ބަދަލުކުރުން ގިނަ ބަޔަކު ގެންދަނީ ސުވާލު އުފައްދަމުންނެވެ. އަދި ރޭގެ މެޗަށް އެސްޓަން ވިލާގައި މޮޅު ކުޅުމެއް ދައްކަމުން އަންނަ އާޖެންޓީނާގެ 1 ވަނަ ގޯލް ކީޕަރު މާރޓިނޭޒް ޓީމުގައި ނުހިމެނުންވެސް މީޑިއާއިން އިންނަނީ ސުވާލު އުފައްްދަމުންނެވެ.
އިނގިރޭސި މީޑިއާތަކުން ބުނާ ގޮތުން ސިޓީން ލީގު ކާމިޔާބުކުރުމުން އެސްޓަން ވިލާއަށް 15 މިލިޔަން ޕައުންޑް ލިބެއެވެ. މިއީ މިދިޔަ އަހަރު އެސްޓަން ވިލާއިން ސިޓީއަށް 100 މިލިޔަންއަށް ވިއްކާލި ޖެކް ގްރީލިޝް ވިއްކާލުމުގެ އެއްބަސްވުމުގައި ހިމެނޭ މާއްދާއެއްކަމަށް މީޑިއާ ރިޕޯޓްތައް ބުނެއެވެ. އެހެން ކަމުން މި ޑީލަށްޓަކައި މެޗުން މޮޅުވާން ސިޓީއަށް މަގުފަހިކޮށްދިނީ ކަމަށް ބުނެ ސޯޝަލް މީޑިއާގައި ގެންދަނީ ކަންބޮޑުވުން ފާޅުކުރަމުންނެވެ. މި ތުހުމަތުތަކަށް ވިލާގެ ކޯޗް އަދި ލިވަޕޫލްގެ ލެޖެންޑް ސްޓީވަން ޖެރޭޑް އެއްޗެއް އަދި އެެއްޗެއް ބުނެފައެއް ނުވެއެވެ.
