ހަނދާނަން އަންނަނީ މަރްހޫމް އުސްތާޛު ފަތުހުﷲ ޖަމީލުގެ ފޮރިން މިނިސްޓަރުކަމުގެ ރަން ޒަމާނެވެ. އެއީ ދުނިޔޭގެ ޚާރިޖީ ޖައްވުގައި ދިވެހިންނާއި ދިވެހި ރާއްޖޭގެ ނަން ވިދުވާލަ ދެއްވި ހިކުމަތްތެރި ސްޓޭޓްސްމަނެކެވެ. ޑިޕްލޮމެކެވެ. އެމަނިކުފާނު ހާސިލުކުރެއްވި ތާރީޚީ ކާމިޔާބީތަކާ ހަމައަށް އެހެން ދިވެހި ދަރިއަކަށް ވާސިލްވެވިދާނެ ކަމަށް އޭރު ގަބޫލުކުރެވިފައެއް ނުވެއެވެ. އެހެންނަމަވެސް މިއަދު އެ ހަގީގަތް ބަދަލުވެއްޖެއެވެ. އެމަންޒަރު ބަދަލު ވެއްޖެއެވެ.
ރާއްޖޭގެ ފޮރިން މިނިސްޓަރުކަމާ ޢަބްދުﷲ ޝާހިދު ހަވާލުވެވަޑައިގެންނެވުމަށް ފަހު ރައީސް ޔާމީންގެ ވެރިކަމާ ބީރައްޓެހިކޮށް، އެކަހެރިކޮށް އޮތް ރާއްޖެ ދުނިޔޭގެ ގައުމުތަކާ އަލުން ގުޅުވާލަދެއްވީ ވަރުބަލިފުޅު ވުމެއްނެތި ދުނިޔޭގެ ހަތަރު ބިތައް ކުރެއްވި ދަރުފުޅުތަކުގެ ނަތީޖާއެއްގެ ގޮތުންނެވެ. އެހަރިކޮށް އޮތް ރާއްޖެ ބައިނަލްއަގުވާމީ ގުޅުންތައް ބަދަހި ގުޅުމަކުން ގޮށްޖައްސަވާލެއްވިއެވެ. ހިކުމަތްތެރިކަމާއި ހަރަކާތްތެރިކަމާއި ޑިޕްލޮމެސީގެ ރިވެތި އުސޫލުތަކުގެ ތެރެއިން ރޭވުންތެރިކަމާއެކުގައެވެ.
އދ.ގެ އާންމު މަޖިލީހުގެ ރައީސް ކަމަށް އެމަނިކުފާނު އިންތިހާވި ވަގުތުކޮޅަކީ ދިވެހި ޚާރިޖީ ތާރީޚު މުޅިން ބަދަލުވެގެން ދިޔަ ހަގީގަތެކެވެ. އެއީ ދުނިޔޭގެ ތާރީޚުގައި އެންމެ ގިނަ ދުވަހު ޚާރިޖީ ވަޒީރުކަން ކުރެއްވި މަރުހޫމް އުސްތާޛު ފަތުހުﷲ ޖަމީލަށް ވެސް ވާސިލް ވެވިފައިނުވާ އުސްމިނެކެވެ. ރިޔާސަތެކެވެ. އެ ފަޚުރު ހާސިލްކުރެއްވި އެ ރިޔާސަތުގައި އިށީނދެވަޑައިގެން މުގުރުން ލީޑަރޝިޕް ދެއްކެވި ލީޑަރަކީ އަބްދުﷲ ޝާހިދެވެ.
އެމަނިކުފާނު އދ.ގެ އާންމު މަޖިލީހުގެ ރިޔާސަތާ ހަވާލުވެވަޑައިގެންވަމުން އެމަނިކުފާނުގެ އެއް އަހަރުގެ ދައުރު ސިފަކުރެއްވީ އުންމީދުގެ ރިޔާސަތުގެ ގޮތުގައެވެ. ގައުމުތަކުގެ މެދުގައި ހަމަހަމަކަމާއި ޒުވާން ޑިޕްލޮމެޓުންނަށް ފުރުސަތުތައް ފަހިކޮށް ދެއްވުމާއި ޖެންޑަރ ޗެމްޕިއަނެއްގެ ގޮތުގައި ހަލުވި ފިޔަވަޅުތަކެއް އަޅުއްވަމުން ލީޑަރޝިޕް ދައްކަވަމުން ގެންދެވީ ދިވެހިންގެ އިތުރުން ދުނިޔޭގެ ގިނަ ޑިޕްލޮމެޓުންގެ ތައުރީފު ހޯއްދަވަމުންނެވެ. އިތުބާރު މިލްކުކުރައްވަމުންނެވެ. ދިވެހިންނާއި ދިވެހިންގެ ނަމުގެ އަގު އުފުލަމުންނެވެ.
އެމަނިކުފާނުގެ އެއް އަހަރު ދުވަހުގެ ރިޔާސަތުގައި ދުނިޔޭގެ ސީނިއަރ ޑިޕްލޮމެޓުން އެމަނިކުފާނު ސިފަކުރެއްވީ ލީޑަރޝިޕިގެ "ނަމޫނާ، ހިކުމަތްތެރި" ސްޓޭޓްސްމަނެއްގެ ގޮތުގައެވެ. ޑިޕްލޮމެޓެއްގެ ގޮތުގައެވެ. މުރާލި، ހަރަކާތްތެރި ޝަހުސިއްޔަތެއްގެ ގޮތުގައެވެ.
ދިވެހި ޒުވާނުން އެންމެ ބޮޑަށް ފާހަގަ ކުރަނީ ދުނިޔެއާ އެމަނިކުފާނު ސޯޝަލް މީޑިޔާ މެދުވެރިކޮށް ސައްވީސް ގަޑިއިރު ގުޅިފައިވާލެއް ފުރިހަމަކަމެވެ. ކޮންމެ ހަރަކާތެއް، ކޮންމެ ވިސްނުންފުޅެއް ޓްވިޓާ އާއި އެނޫންވެސް ސޯޝަލް މީޑިޔާގެ އެޕްލިކޭޝަން މެދުވެރިކުރައްވައި ގެންދެވީ ދިވެހިންނަށް ފަޚުރުވެރިކަން ހޯއްދަވައިދެއްވަމުންނެވެ. އެމަނިކުފާނުގެ ކޮންމެ ޓްވީޓަކީވެސް ދިވެހި ރާއްޖޭގެ ނަމަށް ވެލިއު އެޑްވެގެން ދިޔަ ހިނދުކޮޅުތަކެކެވެ. ދިވެހިންގެ ތައުރީފާއި ޝުކުރު އެމަނިކުފާނަށް މެދުނުކެނޑި ލިބެމުން ދިޔައީ މިދެންނެވި ފަނޑުވުމެއް ނެތް ހަގީގަތްތަގެ ސަބަބުންނެވެ.
އދ.ގެ ތާރީޚުން ދުވަހަކުވެސް އެމަނިކުފާނުގެ ތަސްވީރު ދެނެއް ފުހެވިގެން ނުދާނެއެވެ. އދ ގެ އާންމު މަޖިލީހުގެ ފާރުގައި ޝާހިދުގެ ތަސްވީރު ޖީލުތަކަށް ދެމިގެން ދާ ގޮތަށް ފެންނަން ހުންނާނީ ކުދި ޖަޒީރާ ގައުމުތަކަށް ވެސް އދ. ގެ އިސް މަގާމުތައް، މޮޅަށް، ފަށުވިކޮށް އަދާކުރެވިދާނެކަމުގެ ސާފު ހެއްކެއްގެ ގޮތުގައެވެ. އެއީ ދިވެހިން އެމަނިކުފާނަށް ޝުކުރާއި ސާބަސް އަބަދުމެ އަދާކުރަން ޖެހޭނެ ސަބަބެކެވެ.
