ރާއްޖޭގެ ޖަލުތަކުގައި ބަންދު ކޮށްފައިވާ ގައިދީންގެ ފަރާތުން ލިބޭ އެންމެ ބޮޑު ޝަކުވާއަކީ ޑޮކްޓަރަށް ދެއްކުމުގައި ދިމާވާ މައްސަލަތައް ކަމަށް ކޮމިޝަނާ އޮފް ޕްރިޒަން އަހުމަދު މުހައްމަދުފުޅު ވިދާޅުވެއްޖެއެވެ.
ގައިދީން ޑޮކްޓަރަށް ދެއްކުމަށް ހާއްސަ ޕްރޮގްރާމް "ހޭހަން އޮޕަރޭޝަން" އާއި ގުޅިގެން ކަރެކްޝަނަލް ސާރވިސްއިން އާންމު ކުރި ވީޑިއޯ މެސެޖެއްގައި ކޮމިޝަނަރ އޮފް ޕްރިޒަންސް އަހުމަދު މުޙައްމަދުފުޅު އެންމެ ގިނައިން ގައިދީންގެ ފަރާތުން ލިބެމުންދާ އެންމެ ބޮޑު ޝަކުވާއަކީ ޑޮކްޓަރަށް ދެއްކުމަށް ދިމާވާ ލަސްތަކާއި ޑޮކްޓަރަށް ދެއްކުމާއި ހުރި ތަފާތު އެކި މައްސަލަތައް ކަމަށެވެ. އަދި ގައިދީންގެ އާއިލާއިން ފާޅުކުރާ އެންމެ ބޮޑު ކަންބޮޑުވުމަކީ އެއީ ކަމަށް ސީޕީ ވިދާޅުވިއެވެ.
"ޖަލުގެ ކަންކަން ބަލަހައްޓާ އޯވާ ސައިޓް ކުރާ ބައެއް މުވައްސަސާތަކުން ވެސް ތަފާތުއެކު ރިކޮމަންޑޭޝަންތައް މި ކަމުގައި ދީފައި އެބަހުރި. މި މައްސަލަ ހައްލު ކުރުމަށް ތަފާތު އެކި މަސައްކަތްތައް ކޮށްފައިވާތީ. އެގޮތުން އައިޖީއެމްއެޗް އާއިއެކު ހާއްސަ އެއްބަސްވުމެއްގައި ސޮއިކޮށް ޖަލަށް ޑޮކްޓަރުން ގެނެވޭނެ އިންތިމާޒު ހަމަޖައްސައިފިން. އަދި އޮންލައިންކޮށް ޑޮކްޓަރުންނަށް ދެއްކޭނެ ގޮތް ވެސް ހަދައިފިން." ސީޕީ އަހުމަދު ވިދާޅުވި އެވެ.
ޖަލުގައި ޑޮކްޓަރަށް ދެއްކުމުގައި ދިމާވާ މައްސަލަ ވަރަށް ބޮޑު ކަން ފާހަގަކުރައްވަމުން އަހުމަދު މުޙައްމަދު ވިދާޅުވީ ޖަލަކީ ގިނަ އަދަދެއްގެ މީހުން ބަންދުކޮށްފައިވާ ތަނަކަށްވާތީ ސިއްހީ ގޮތުން ދިމާވާ މައްސަލަތައް ވަރަށް ގިނަ ކަމަށެވެ.
އެކަން ހައްލުކުރުމަށް އޮޕަރޭޝަން ހޭހަން ގެ ނަމުގައި ފަށާފައިވާ އޮޕަރޭޝަންގައި ކަރެކްޝަންގެ ސީނިއާ ލެވެލްގައި ތިބި ހުރިހާ މުވައްޒަފުންހެން އެއްކޮށް ގައިދީން ޑޮކްޓަރުނަށް ދެއްކުމަށް މަސައްކަތް ކުރާނެ ކަމަށް އޭނާ ވިދާޅުވިއެވެ. މި މަސައްކަތުގެ ތެރެއިން އިތުރަށް ރަނގަޅުކުރަން ޖެހޭ ކަންކަން ދެނެގަނެވޭނެ ކަމަށް ވިދާޅުވި އެވެ.
"ހޭހަން އޮޕަރޭޝަނަކީ" ޖަލުގައި ތިބި ގައިދީންގެ ތެރެއިން ހާއްސަ ޑޮކްޓަރުންނަށް ދައްކަން ޖެހޭ މީހުން ޑޮކްޓަރުންނަށް ދެއްކުމަށްޓަކައި ހިންގޭ ހާއްސަ އޮޕަރޭޝަނެއް ކަމަށެވެ.
އޮޕަރޭޝަން ހޭހަން ފެށުމުގެ ގޮތުން ކޮމިޝަނަރ އޮފް ޕްރިޒަންސް ގެ މެސެޖު#operationheyhan pic.twitter.com/hceLnARkPm
— Maldives Correctional Service (@CorrectionsMv) October 29, 2022
ޖަލުގައި އެކަށީގެންވާ ބޭސްފަރުވާ ނުލިބުމުގެ ޝަކުވާތަކަކީ ޤައިދީންގެ ދިފާއީ ވަކީލުންގެ ވެސް އެންމެ ބޮޑު ޝަކުވާއެވެ. އަދި ޝަރީއަތްތަކުގައިވެސް ކުރާވ އެންމެ ބޮޑު ޝަކުވާއެވެ. މިފަދަ އެތައް މައްސަލަތަކެއް ހިއުމަން ރައިޓްސް ކޮމިޝަނަށްވެސް ވަނީ ހުށައަޅާފައެވެ.
