ހަދަމުންދިޔަ ރިސޯޓެއް ކަމަށްވާ ކ. ބޮލިދުއްފަރު ގޮނޑުދޮށުން ފެނުނު ކިނބޫ ފިލައިފިއެވެ.
މި ކިނބޫ ފެނުނީ މިއަދު ހަވީރު އެރަށު ގޮނޑުދޮށުން މޫދު ތެރެއިންނެވެ. އެރަށުން ވާހަކަދެއްކި މީހަކު ބުނީ ކިނބޫ ފެނުމުން އެކަން ފުލުހުންނަށާއި ސިފައިންނަށް އެންގިކަމަށެވެ. ނަމަވެސް ކިނބޫ އެތަނުން ދިޔައިރުވެސް ސިފައިންނާއި ފުލުހުންނަށް ނާދެވުނު ކަމަށް އެމީހާ ބުންޏެވެ.
"ގާތްގަނޑަކަށް 15 ފޫޓް ހުންނާނެ އެ ކިނބުލުގެ ދިގުމިނުގަ. ބޭރުން އައި އެއްޗެއް އެއީ. ބޭރުން އައިސް ގޮނޑުދޮށު އުޅެލާފަ އިރުއޮއްސެން ކައިރިވެފަ ހުއްޓަ ބޭރަށްގޮސް ގެއްލިއްޖެ. ރާޅު ޖަހާ ފަށަށްވެސް އެރި. އެކަމަކު ރަށުތެރެއަށް އަރަން މަސައްކަތެއް ނުކުރޭ. އަޅުގަނޑުމެން އުޅުނިން އޭތި ހިފަންވެސް، އެކަމަކު މާ ބޮޑުވީމަ ނުރައްކަލަށްވެދާނެތީ އެތަނަށް އެރޭކަށް ނުކެރުނު." އެރަށުން ވާހަކަދެއްކި މީހަކު ބުންޏެވެ.
https://twitter.com/MvCrisis/status/1613567732225835010
މިކަމާގުޅިގެން އެމްއެންޑީއެފުން ބުނީ ކިނބުލެއް ފެނިގެން އެފަދަ ރިޕޯޓެއް އެމްއެންޑީއެފަށް ލިބިފައިނުވާ ކަމަށެވެ. މީގެކުރިން ރާއްޖޭގެ ބައެއް ރަށްރަށުގެ ފަޅުތެރެއިންނާއި ކަނޑުތެރެއިން މި މޫސުމުގައި ކިނބޫ ފެނިފައި އެބަހުއްޓެވެ. ކިނބުލެއް ފެނުމުން މީގެކުރިން ސަލާމަތީ ބާރުތަކުން އެމީހުންގެ ބެލުމުގެ ދަށަށް އޭތި ގެންނަން މަސައްކަތް ކުރެއެވެ. އެއީ ކިނބުލަކީ އިންނާސުންނަށް ނުރައްކާތެރި އެއްޗަކަށް ވާތީއެވެ.
