ދުވާލަކު 120 މެޓްރިކް ޓަނުގެ މަސް ކިރުވޭ ބޯޓެއް މިފްކޯއިން ރާއްޖެ ގެނެސްފި އެވެ.
މިފްކޯއިން މިއަދު ރާއްޖެ ގެނައި "ޖަޒީރާ 103″ އަކީ ފަސޭހަކަމާއެކު މަސްކިރުވުމުގެ ވަސީލަތްތައް ގާއިމުކޮށްފައިވާ ބޯޓެކެވެ. މިފްކޯގެ ސީއީއޯ އިސްމާއީލް ފައުޒީ ވިދާޅުވީ ބޯޓު އޮޕަރޭޝަނަށް ގެނައުމުގެ ތައްޔާރީތައް މިހާރު ވަމުންދާ ކަމަށެވެ.
"ޖަޒީރާ 103 އަކީ ފަސޭހަ ކަމާއެކު މަސްކިރުމުގެ ވަސީލަތްތައް ގާއިމުކޮށްފައިވާ ބޯޓަކަށް ވުމުން، މަސްވެރިކަމުގެ މޫސުމުގައި އެންމެ ރަނގަޅަށް މަސްބާނާ ސަރަހައްދަކަށް ދަތުރުކޮށް މަސްވެރިން ބާނާ މަސް ކިރުމަށް އިތުރު ލުއިފަސޭހަތަކެއް ލިބިގެންދާނެ،" މިފްކޯގެ ސީއީއޯ އިސްމާއީލް ފައުޒީ ވިދާޅުވި އެވެ.
މިފްކޯގެ ކެޕޭސިޓީ އިތުރުކުރުމަށް ގެނެވޭ 4 ބޯޓްގެ ތެރެއިން ފުރަތަމަ ބޯޓް ވަނީ މިއަދު ހެދުނު މާލޭ ބަދަރަށް އައިސްފަ. ދުވާލަކަށް 120 ޓަނު މަސްގަނެ ފްރީޒް ކުރެވޭ މިބޯޓް ލޯކަލައިޒް ކުރުމުގެ މަރުހަލާ ނިމުމުން ބޯޓްގެ އޮޕަރޭޝަން ފެށުމަށް ވާންޖެހޭ ތައްޔާރީތައް މިދަނީ ވަމުން. @mifcomv pic.twitter.com/cISOzL7fH2
— Ismael (@ishmaeelu) April 6, 2023
ޖަޒީރާ 103 އަކީ ބޯޓްގެ ދެފަރާތުން އެއްފަހަރާ މަސްކިރޭގޮތަށް 2 ކްރޭން ހަރުކޮށް ދުވާލަކު 120 މެޓްރިކް ޓަނު މަސްގަނެ ފިނިކުރުމުގެ ގާބިލުކަން ލިބިފައިވާ ބޯޓެކެވެ. މި ބޯޓަކީ ޖުމްލަ 420 މެޓްރިކް ޓަނުގެ މަސް ސްޓޯކުރެވޭ ގޮތަށް ފަރުމާ ކޮށްފައިވާ ބޯޓެކެވެ.
މީގެ ކުރިން 2021 ވަނަ އަހަރު ވެސް މިފްކޯއިން ވަނީ 300 ޓަނުގެ ސްޓޯރޭޖު ކެޕޭސިޓީ ހުރި އަދި ދުވާލަކު 120 ޓަން ފްރީޒްކުރެވޭ އުޅަނދަކާއި މަސް އެކްސްޕޯޓުކުރުމަށް 2،400 ޓަނުގެ ކެރިއާ އުޅަނދެއް ގަނެފަ އެވެ.
މިފްކޯގެ ހިންގުމާ އިސްމާއީލް ފައުޒީ ހަވާލުވިފަހުން އެކުންފުންޏަށް ވަނީ ހެޔޮބަދަލުތަކެއް އައިސްފައެވެ. މިގޮތުން މަސްވެރިންނާ މިފްކޯއާ އޮންނަ ގުޅުން ވަރަށް ބޮޑަށް ބަދަހިވެ މަސްވެރިން އިތުބާރު ކުރާ ކުންފުންޏަކަށް މިފްކޯ މިހާރު ވަނީ ވެފައެވެ.
