އަދުގެ ސަރުކާރުން މަސްތުވާތަކެތީގެ މައްސަލައަށް ހައްލެއް ހޯދުމަށް ކުރިއަށްގެންދާ މަސައްކަތްތަކުގެ ދަށުން މިދިޔަ ދޮޅުމަހެއްހާ ދުވަހުގެ ތެރޭގައި 47 މިލިއަނަށްވުރެ ގިނަ ރުފިޔާގެ ޑްރަގް އަތުލައިގަނެވުނުކަމަށް ހޯމްލޭންޑް މިނިސްޓަރު އަލީ އިހުސާން މިރޭ ވިދާޅުވެއްޖެއެވެ.
މިގޮތުން ފާއިތުވެދިޔަ ދޮޅުމަހެއްހާ ދުވަހުގެ ތެރޭގައި ކުރެވުނު މަސައްކަތްތަކުން އަގުގެ ގޮތުން 47 މިލިއަން ރުފިޔާއަށްވުރެ އަގުހުރި މަސްތުވާތަކެތި ރާއްޖޭގެ ކަންކޮޅުތަކަށް ދިއުން ހުއްޓުވުނުކަމަށް އިހްސާން ވިދާޅުވިއެވެ.
މި ސަރުކާރު ވެރިކަމާ ހަވާލުވިއިރު، މަސްތުވާ ތަކެތީގެ ވަބާއިން ރައްކާތެރިވުމުގެ ގޮތުން، ފަރުވާ ހޯދުމަށް 800 މީހުން ތިބިއިރު އޭގެ ތެރެއިން 300 އަށްވުރެ ގިނަ މީހުންގެ ފަރުވާ ފެށިފައިވާކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ޑްރަގް މައްސަލަތަކުގެ އިތުރުން ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީ މަސައްކަތްތެރިންގެ މައްސަލަވެސް ހައްލުކުރުމަށް މުހިއްމު މަސައްކަތްތަކެއް ކޮށްފައިވާކަމަށެވެ. މިގޮތުން މިއަދާހަމަޔަށް މިފަދަ 1800 އަށްވުރެ ގިނަ މީހުން ރާއްޖެއިން ފޮނުވާލެވިފައިވާކަމަށް އިހުސާން ވިދާޅުވިއެވެ.
