ޖުޑީޝަލް ސާވިސް ކޮމިޝަން (ޖޭއެސްސީ) ނައިބު ރައީސްގެ މަގާމަށް ހައި ކޯޓުގެ ފަރާތުން އެ ކޮމިޝަނުގައި އިންނަވާ ފަނޑިޔާރު މުހައްމަދު ނިޔާޒު އައްޔަންކޮށްފިއެވެ.
މި މަޤާމުގައި ކުރިން ހުންނެވީ ފަނޑިޔާރު ހުސްނުއް ސުއޫދުއެވެ. މި މަގާމު ހުސްވީ ފަނޑިޔާރު ޝުޖޫންގެ ބަދަލުގައި ހުސްނުއް ސުއޫދު ޖޭއެސްސީއަށް އައްޔަނު ކުރެއްވުމުންނެވެ.
ނިޔާޒަކީ މީގެކުރިން ހައިކޯޓުގެ ފަނޑިޔާރުކަންވެސް ކުރެއްވި ބޭފުޅެކެވެ. ނިޔާޒު ވަނީ މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލު ކުރައްވާފައެވެ.
ޖޭއެސްސީގައި ރައީސުލްޖުމްހޫރިއްޔާ އައްޔަންކުރައްވާ މެންބަރަކާއި، ރައްޔިތުންގެ މަޖިލީހުގެ ރައީސާއި، ސިވިލް ސާވިސް ކޮމިޝަން (ސީއެސްސީ) ގެ ރައީސާއި، ރައްޔިތުންގެ މަޖިލީހުން ކަނޑައަޅާ އެ މަޖިލީހުގެ މެންބަރަކާއި، މަޖިލީހުން ކަނޑައަޅާ އާންމުންގެ މީހެއްގެ އިތުރުން އުއްތަމަ ފަނޑިޔާރާއި، ސުޕްރީމް ކޯޓުން ކަނޑައަޅާ ފަނޑިޔާރެއްވެސް އިންނަވާނެއެވެ. އަދި ހައި ކޯޓުން އިންތިހާބުކުރާ އެ ކޯޓުގެ ފަނޑިޔާރަކާއި، ދަށު ކޯޓުތަކުން އިންތިހާބުކުރާ ދަށު ކޯޓެއްގެ ފަނޑިޔާރެއްވެސް ޖޭއެސްސީގައި ތިއްބަވައެވެ. ގާނޫނީ ވަކީލުންގެ ތެރެއިން އިންތިހާބު ކުރާ ވަކީލެއްގެ އިތުރުން ދައުލަތުގެ ބަންޑާރަ ނައިބު ވެސް އިންނަވަ އެވެ.
މީގެ ކުރިން ރާއްޖޭގެ ސިޔާސީ މަސްރަހުގައި ޖޭއެސްސީ އެކުލެވިގެންވާ ގޮތް ބަދަލުކުރުމުގެ ވާހަކަ ވަރަށް ގަދަޔަށް ދެކެވުނެވެ.
