ބިދޭސީ މުވައްޒަފުންގެ އެކަމަޑޭޝަންގެ ޚިދުމަތް ދިނުމުގެ ވިޔަފާރި ހަރަކާތް ރަޖިސްޓަރީކުރުން ލާޒިމުކޮށް، ރަޖިސްޓްރީނުކުރާ ވިޔަފާރިތައް ޖޫރިމަނާކުރާ ގޮތަށް ނިންމައިފިއެވެ.
އިކޮނޮމިކް މިނިސްޓްރީއިން އިއްޔެވަނީ، ބިދޭސީ މުވައްޒަފުންގެ އެކަމަޑޭޝަންގެ ޚިދުމަތް ދިނުމުގެ ވިޔަފާރި ހިންގުމާއި ގުޅޭ ޤަވާއިދު ގެޒެޓްކޮށްފައެވެ.
މި ޤަވާއިދަކީ، ވިޔަފާރި ރަޖިސްޓްރީކުރުމުގެ ޤާނޫނުގެ 10 ވަނަ މާއްދާގެ ނ ގެ ދަށުން އެކުލަވާލާފައިވާ ޤަވާއިދެކެވެ.
މި ޤަވާއިދަށް އަމަލުކުރަން ފަށާނީ، އިއްޔެއިން ފެށިގެން 30 ދުވަސް ހަމަވާ ތާރީޚުގައެވެ.
މި ޤަވާއިދަށް އަމަލުކުރަން ފަށާތާ 30 ދުވަހުގެ ތެރޭގައި މިހާރު މިފަދަ ވިޔަފާރިތައް ހިންގާ ފަރާތްތަކުންވެސް ރަޖިސްޓްރީކޮށް ދަފުތަރު ކުރުމަށް ހުށަހަޅަންވާނެ ކަމަށް މި ގަވާޢިދުގައި ބުނެފައިވެއެވެ.
މިޤަވާއިދުގައި ބަޔާންކޮށްފައިވާ ގޮތަށް ރަޖިސްޓްރީނުކޮށް ހިންގާ ވިޔަފާރިތައް އިންސްޕެކްޓް ކުރުމަށްފަހު، ވިޔަފާރި ރަޖިސްޓްރީ ކުރުމުގެ ޤާނޫނާ ޚިލާފްވީކަމަށް ބަލައި، އެފަދަ ކޮންމެ ފަރާތެއް 10،000 ރުފިޔާއިން ޖޫރިމަނާކުރާނެ ކަމަށް ބުނެފައިވެއެވެ.
އަދި ރަޖިސްޓްރީކޮށްފައިވާ ވިޔަފާރިތަކުންވެސް އެކޮމޮޑޭޝަންގައި ހުންނަންޖެހޭ މިންގަނޑުގައިވާ ކަމެއް ފުރިހަމަނުކޮށްވާނަމަ، އެފަދަ ކޮންމެ ފަރާތެއްވެސް 5،000 ރުފިޔާއިން ޖޫރިމަނާކުރާނެއެވެ.
މި ޤަވާއިދު ހިންގަނީ، ތިން ދާއިރާއަކުން ބިދޭސީ މުވައްޒަފުންގެ އެކަމަޑޭޝަން ހަމަޖައްސައިދޭ ފަރާތްތައް ފިޔަވައި، ވިޔަފާރި އުސޫލުން ބިދޭސީ މުވައްޒަފުންގެ އެކަމަޑޭޝަން ޚިދުމަތް ދޭ ފަރާތްތަކަށެވެ.
އޭގެތެރޭގައި ވަޒީފާ ދޭ ފަރާތުގެ އަމިއްލަ ތަންތަނުގައި، އެ ފަރާތުގެ ނަމުގައި ރާއްޖެ ގެންނަ ބިދޭސީ މުވައްޒަފުންނަށް އެކަމަޑޭޝަން ހަމަޖައްސައިދޭ ފަރާތްތަކުންނާއި، ވަޒީފާ ދޭ ފަރާތުގެ ނަމުގައި ރާއްޖެ ގެންނަ ބިދޭސީ މުވައްޒަފުންނަށް ޚާއްސަކޮށްގެން، ހަމައެކަނި ވަޒީފާ ދޭ ފަރާތުގެ މުވައްޒަފުން ބޭތިއްބުމަށް ކުއްޔަށް ހިފައިފައިވާ ތަންތަނާއި، ރާއްޖޭގައި ބިދޭސީން ވަޒީފާ އަދާކުރުމާބެހޭ ޤަވާއިދުގައި ބަޔާންކޮށްފައިވާ ޕްރޮފެޝަނަލް ގިންތީގެ ބިދޭސީ މުވައްޒަފުން ކުއްޔަށް ދޭ ތަންތަން ރަޖިސްޓްރީކުރުން ހިމެނެއެވެ.
އަދި މިޤަވާއިދުގެ 3 ވަނަ މާއްދާގައި ބަޔާންކޮށްފައިވާ ގޮތް ނޫން އެހެން ގޮތަކަށް މިވިޔަފާރީގެ ޚިދުމަތް ދޭ ފަރާތްތަކުން ވިޔަފާރި ރަޖިސްޓްރީކުރުމުގެ ގާނޫނުގެ ހަތަރުވަނަ މާއްދާގައި ބަޔާންކޮށްފައިވާ ގޮތްތަކުން ކުރެ ގޮތަކަށް ވިޔަފާރި ކުރާ ތަނެއްގެ ގޮތުގައި، އަމިއްލަ ފަރުދުންގެ ވިޔަފާރިއެއް ނުވަތަ ކުންފުންޏެއް ނުވަތަ ޕާޓްނަޝިޕެއް ނުވަތަ ކޯޕަރޭޓިވް ސޮސައިޓީއެއް ރަޖިސްޓްރީ ކުރުން ލާޒިމްވާނެ ކަމަށް މި ޤަވާއިދުގައި ބުނެފައިވެއެވެ.
މި ވިޔަފާރި ހަރަކާތް ރަޖިސްޓަރީ ކުރުމަށް ހުށަހަޅާނީ، އިކޮނޮމިކް މިނިސްޓްރީގެ ބިޒްނަސް ޕޯޓަލް mv.egov.business ގެ ‘Registration Activity Business ‘ގެ ޚިދުމަތް މެދުވެރިކޮށެވެ.
މި ގަވާއިދުގެ ދަށުން، ބިދޭސީ މުވައްޒަފުންގެ އެކަމަޑޭޝަން ޚިދުމަތް ދިނުމަށް އެދޭ ފަރާތްތަކުން ކަނޑައަޅާ ތަންތަނުގައި، އެ ޚީދުމަތް ދޭހައި ހިނދަކު، ރާއްޖޭގައި ބިދޭސީން ވަޒީފާ އަދާކުރުމާބެހޭ ޤަވާއިދުގައި ބަޔާންކޮށްފައިވާ މިންގަނޑުތަކަށް އެތަނެއް ފެތެން ޖެހޭނެއެވެ.
ޤަވާއިދުގެ ދަށުން ރަޖިސްޓްރީކޮށްގެން ހިންގާ، ބިދޭސީ މުވައްޒަފުންގެ
އެކަމަޑޭޝަން ޚިދުމަތް ދޭ ތަންތަނުގައި ބައިތިއްބާ ބިދޭސީ މުވައްޒަފުންނަކީ، ދިވެހިރާއްޖޭގައި ބިދޭސީން ވަޒީފާ އަދާކުރުމާ ބެހޭ ޤަވާއިދުގައި ބަޔާންކޮށްފައިވާ ގޮތުގެ މަތިން ހުއްދަ ހޯދުމަށްފަހު ރާއްޖޭގައި މަސައްކުރާ ބިދޭސީންކަން، ޚިދުމަތް ދޭ ފަރާތުން
ކަށަވަރުކުރަން ޖެހޭނެ ކަމަށްވެސް މިޤަވާއިދުގައި ބުނެފައިވެއެވެ.
މިފަދަ ވިޔަފާރި ހަރަކާތް ރަޖިސްޓްރީ ކުރުމަށް އެދޭ ކޮންމެ ފަރާތަކުން 500 ރުފިޔާގެ އިދާރީ ފީއެއް ދައްކަން ޖެހެއެވެ.
