އިޒުރޭލު ޕާސްޕޯޓް މަނާކުރުމާ ގުޅިގެން ރައްޔިތުންގެ މަޖިލީހަށް ހުށަހަޅާފައިވާ މައްސަލަ އަވަސްކުރަން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ނިންމައިފި އެވެ.
މިއަދު ބޭއްވި ބައްދަލުވުމުގައި ކޮމިޓީގެ މުގައްރިރު, އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވީ ލިޔުމުން ޖަވާބު ހޯދުމަށްފަހު ކަމާބެހޭ އިދާރާތައް ހާޒިރުކުރަން މީގެ ކުރިން ދީފައިވަނީ ޑިސެންބަރުގެ ނިޔަލަށް ނަމަވެސް އެ ބިލުގެ މަސައްކަތް އަވަސްކުރުމަށް ތާރީހު މާދަމާއަށް އަވަސްކުރަން ޖެހޭ ކަމަށެވެ.
ހުޅުދޫ ދާއިރާގެ މެންބަރު މުހައްމަދު ޝާހިދު ވަނީ އެފަދައިން އަވަސްކުރަން ހުށަހަޅާފަ އެވެ. އެ ހުށަހެޅުމަށް ކެލާ ދާއިރާގެ މެންބަރު އަހުމަދު ޝަރީފު ތާއީދުކުރެއްވި އެވެ.
އެ އިސްލާހު ފާސްވެފައިވަނީ ކޮމިޓީގައި ބައިވެރިވެވަޑައިގެން މެންބަރުންގެ އިއްތިފާގުންނެވެ.
އިޒްރޭލު ޕާސްޕޯޓުގައި ރާއްޖެ އެތެރެނުވެވޭ ގޮތަށް އިމިގްރޭޝަންގެ ގާނޫނު އިސްލާހު ކުރަން މަޖިލީހަށް ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީ މެންބަރު މެންބަރު މީކާއިލް އަހުމަދު ނަސީމެވެ.
އެ ބިލަށް ސިޔާސީ ޕާޓީތަކުގެ އިތުރު އެޓާނީ ޖެނެރަލް (އޭޖީ)، އިކޮނޮމިކް މިނިސްޓްރީ, ޓޫރިޒަމް މިނިސްޓްރީ, ފޮރިން މިނިސްޓްރީ އަދި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ފަދަ ތަންތަނުގެ ބަސް ހޯދަން ކޮމިޓީއިން ފާސްކޮށްފައިވެ އެވެ.
