ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ގެ ޑިރެކްޓަރ ޖެނެރަލް ޓެޑްރޯސް ކޮވިޑް-19 އަށް ޕޮޒިޓިވްވެފައިވާ މީހެއްގެ ކްލޯޒް ކޮންޓެކްޓަކަށް ވެފައިވާކަމަށް ވިދާޅުވެއްޖެ އެވެ.
ޓެޑްރޯސް ވިދާޅުވީ ކޮންޓެކްޓަކަށް ވީނަމަވެސް އަދި ހާލު ރަނގަޅުކަމަށާއި ބަލީގެ އަލާމާތެއް ނުފެންނަކަމަށެވެ.
"ކޮވިޑް-19 އަށް ޕޮޒިޓިވްވެފައިވާ މީހަކާ ކޮންޓެކްޓްވެފައިވާކަން ވަނީ އެނގިފައި. ހާލު ރަނގަޅު އަދި ބަލީގެ އެއްވެސް އަލާމާތެއް ނުފެނޭ. ޑަބްލިޔުއެޗްއޯގެ ޕްރޮޓޮކޯލްއާ އެއްގޮތަށް މިހުރީ އަމިއްލައަށް ކަރަންޓީނުވެގެން އަދި މަސައްކަތްކުރަމުންދާނީ ގެއިން." ޓެޑްރޯސް ވިދާޅުވި އެވެ.
މިދިޔަ އަހަރުގެ ޑިސެމްބަރ މަހުގެ ފަހުކޮޅު ޗައިނާގެ ވުހާން އިން ކޮވިޑް-19 ފެނުނުފަހުން މިއަދާ ހަމައަށް 46 މިލިއަނަށްވުރެ ގިނަ މީހުންނަށް ވައިރަސް ޖެހިފައިވާއިރު މިލިއަނަކަށްވުރެ ގިނަ މީހުންގެ ފުރާނަ ވަނީ މިހާތަނަށް އައިއިރު ގޮސްފައެވެ. މިބަލި ކޮންޓްރޯލްކުރުމުގައި ޓެޑްރޯސް ގެންގުޅުއްވާ ސިޔާސަތުތަކަށް އެމެރިކާ އާއި ޔޫރަޕްގެ ގައުމުތަކުން އަންނަނީ ފާޑުކިޔުންތައް އަމާޒުކުރަމުންނެވެ. ވަކިން ޚާއްސަކޮށް ބަލި ކޮންޓްރޯލްކުރުމުގައި އަޅަންޖެހޭ ފިޔަވަޅުތައް ޑަބްލިޔުއެޗްއޯ އަށް ދުނިޔެއަށް އަންގައިދީފައިނުވާކަމަށް ބުނެ ވަނީ ފާޑުކިޔުންތައް އަމާޒުވެފައެވެ.
މިފަހުން ޔޫރަޕިއަން ޔޫނިއަން (އީޔޫ)ން ވަނީ ޑަބްލިޔުއެޗްއޯގެ މެނޭޖްމަންޓަށް ބަދަލުތަކެއް ގެނެސް އިސްލާހީ ފިޔަވަޅުތަކެއް އެޅުމަށްވެސް ގޮވާލާފައެވެ.
