ތިނެއް ނޮވެމްބަރު ނުވަތަ ނަސްރުގެ ދުވަސް ދިވެހިން ފާހަގަކުރަމުންދާއިރު، މުޅި ދުނިޔޭގެ ކަޅި މިއަދު ހުއްޓިފައި ވަނީ އެމެރިކާގެ އިންތިހާބަށެވެ. އެމެރިކާގެ މިހާރުގެ ރައީސް ޑޮނަލްޑް ޓްރަމްޕު ވާދަކުރައްވަނީ ކުރީގެ ރައީސް ބަރަކު އޮބާމާގެ ނާއިބް ރައީސް ބައިޑެންއާއެވެ. ކެމްޕޭނުގެ ފޯރި އޮތީ މީގެ ކުރިން ދުވަހަކު ވެސް ނުފެންނަ މިންވަރަށް ޒާތީވެ، ރުޅިވެރިކަމުގެ ބަހުރުވައިން ނުތަނަވަސްކަން ވެރިކުރުވާފަ އެވެ. ޚާއްސަކޮށް ޓްރަމްޕުގެ މަލާމާތުގެ ބަހުރުވަ މީޑިޔާތަކުން ފާހަގަކޮށްފައިވެ އެވެ.
އިންތިހާބުގެ އެންމެ މުހިއްމު އެއް ދާއިރާ އަކީ ޚާރިޖީ ގުޅުންތަކާއި އެމެރިކާ ވަންތަކަން ވަރުގަދަކޮށް ގައުމިއްޔަތު ވަރުގަދަކުރުމެވެ. ދެ ފަރާތުންވެސް މި މަޢުލޫގައި ވަރަށް ގިނަ ވާހަކަތައް ދައްކާފައިވެއެވެ.
"އަހަރެންނަކީ އެމެރިކާ ވަންތަ ވިސްނުންހުރި ހަމައެކަނި ކެންޑިޑޭޓް. އެމެރިކާގެ ނަން ދެމެހެއްޓޭނީ އަހަރެންނަށް، އެމެރިކާގެ ބާރު ގަދަ ކުރެވޭނީ އަހަރެންނަށް، ދުޝްމަނުންނަށް ބިރެ ނެތި ރައްދު ދެވޭނީ އަހަރެންނަށް." ޓްރަމްޕް ވިދާޅުވެފައިވެއެވެ،
ބައިޑަންގެ ކެމްޕޭނުގައި ކުރީގެ އެމެރިކާގެ ރައީސް ބަރަކް އޮބާމާ ވިދާޅުވީ ޓްރަމްޕަކީ އެމެރިކާގެ ހަލާކު ކަމަށެވެ. އަދި ޕްރަމްޕުގެ ދޯހަޅި ސިޔާސަތުތަކާއި ބަސްމަގުގެ ސަބަބުން އެމެރިކާގެ ގައުމީ ސަލަމަތަށްވެސް އޮތީ ނުރައްކާވެފައިކަންވެސް އޮބާމާ ފާހަގަކުރެއްވިއެވެ.
ދިރާސާކުރާ ފަރާތްތަކުން ދެކޭ ގޮތުގައި ވޯޓުގުނަމުންދާ އިންތިހާބާމެދު އެންމެ ބޮޑަށް ފާރަވެރިވާ އެއް ޤައުމަކީ ޗައިނާއެވެ. އެއީ މިފަހަރުގެ ތާރީޚުގައި ދެގައުމުގެ ދެމެދުގައި ދުވަހަކުވެސް ގުޅުން ގޯސްނުވާ މިންވަރަށް މިހާރު އެދެގައުމުގެ ގުޅުން ގޯސްވެފައިވުމާއި ޓައިނާގެ އަސްކަރީ ގާބިލުކަން އިތުރު ކުރުމަށް އެމެރިކާއިން ހަތަރު ބިލިއަން ޑޮލަރުގެ ހަތިޔާރު އެގައުމަށް ވިއްކާފައިވާތީ ކަނޑުގެ ސަރަހައްދުގެ ނުތަނަވަސްކަމުގެ ސަބަބުންނެވެ. އަދި އެމެރިކާއިން ޗައިނާގެ އެންމެ ވާދަވެރި އިންޑިޔާއާ ހުރިހާ ދާއިރާއަކުންވެސް ގުޅުން ވަރުގަދަކޮށް، ޗައިނާގެ ބޮޑެތި އިންފްރާސްޓްރަކްޗާ ގާއިމްކޮށްފައިވާ ގައުމުތަކާ ގުޅުން ވަރުގަދަކުރުމަށް އެމެރިކާއާއި އިންޑިޔާގެ އެކުވެރިގައުމުތަކާއެކު ކުރާ މަސައްކަތްތައް ފުޅާކޮށްފައިވާތީ އެވެ.
ޗައިނާ ޕޮލިސީ ސެންޓަރުގެ ދިރާސާތައް ބުނާ ގޮތުގައި އިންތިހާބު ކާމިޔާބުކުރުމުގެ ފުރުސަތު ބޮޑީ ބައިޑަންއަށެވެ. ސަބަބަކީ، ޓްރަމްޕުގެ ވެރިކަމުގައި އެމެރިކާއަށާއި އެމެރިކާގެ ރައްޔިތުންނަށް އޮތް ނުރައްކާ އިންތިހާއަށް ބޮޑު އެމެރިކާއާމެދު ދުނިޔޭގެ ނަފުރަތާއި ނުރުހުން ލިބޭލެއް ބޮޑުކަމުންނެވެ.
ތުރުކީވިލާތުން ޑޮނަލްޑް ޓްރަމްޕް ސިފަކުރަނީ ހައްދުފަހަނައަޅާފައިވާ ވިސްނުމުގެ ބޭފުޅެއްގެ ގޮތުގައެވެ. ޚާއްސަކޮށް މުސްލިމުންގެ ދުޝްމަނެއްގެ ގޮތުގައެވެ. ގަލްފާއި އަރަބި ގައުމުތަކުގެ މެދުގައި ނަފްރަތާއި ރުޅިވެރިކަމާއި ފިތުނަ އުފެއްދުމުގައި ނުރައްކާތެރި "ގޭމް ޕްލޭޔަރެއް"ގެ ގޮތުގައެވެ. އެހެންކަމުން އެގައުމުން ބުނަމުން ގެންދަނީ އިސްލާމީ އަދި މުސްލިމު އުންމަތަށް ހަމަނޭވާއެއް ލެވޭނީ އެމެރިކާގެ އިންތިހާބުގެ ނަތީޖާ ބައިޑަން ކޮޅަށް ބުރަވެގެން ކަމަށެވެ.
ގަލްފާއި އަރަބި ގައުމުތަކުންވެސް ބޮޑަށް ބުރަވަނީ ބައިޑަން ކޮޅަށެވެ. އެއީ މެދުމިނުގެ ސިޔާސަތަށް ތާއީދުކުރައްވާ ބޭފުޅަކަށްވާތީ ކަމަށް އެގައުމުތަކުން ދެކެއެވެ. އެމެރިކާއާއި އެއް އިންވެގެން އޮންނަ މެކްސިކޯގެ ނުފޫޒުގަދަ ގުރޫޕުތަކުން އަމިއްލަ ފައިސާއިން ބައިޑަންއަށް ކެމްޕޭންކޮށްފައިވެއެވެ. އެފްރިކާގެ ގައުމުތަކުން ދެކެނީ ޓްރްމްޕުގެ ސިޔާސަތުތައް ބޮޑަށް ވައްތަރީ "ބަސްނާހާ ކުޑަކުއްޖެއްގެ ވިސްނުމާ"އެވެ. އެހެންކަމުން އެ ގައުމުތަކުގެ ތާއީދުވެސް ބޮޑަށް ބުރަވަނީ ބައިޑަން ކޮޅަށެވެ.
އިރުމަތީ އޭޝިޔާއާއި އޭޝިޔާގެ ގައުމުތަކުގެ މީޑިޔާތަކުން ރިޕޯޓުކޮށްފައިވާ ގޮތުގައި ސަރަހައްދީ ގައުމުތަކުގެ މެދުގައި ނަފްރަތު އުފައްދަން އެމެރިކާއިން ކުރާ ފިތުނަވެރި މަސައްކަތަށް ނިމުން ގެނެވޭނީ ޓްރަމްޕު ބަލިކޮށްގެންނެވެ. އަދި އަސްކަރީ ގޮތުންނާއި ވިޔަފާރީގެ ގޮތުން ގައުމުތަކަށް މިނިވަންކަމާއެކު ކުރިއަރާ ދާން ވެސް އޭރުން ފަސޭހަވެގެންދާނެއެވެ.
