ބުދަ ދުވަހު ޖެނީވާގައި ބޭއްވި ދިވެހިރާއްޖޭގެ ޔުނިވަރސަލް ޕީރިއޮޑިކް ރިވިއު ސެޝަންގައި އެޓަރނީ ޖެނަރަލް އިބްރާހިމް ރިފްއަތު ދެއްކެވި ވާހަކަފުޅަކީ ދިވެހިރާއްޖޭގައި މަރުގެ އަދަބު ކަނޑައެޅުން ހުއްޓާލުން، އެއީ މުސްތަޙީލުކަމެއްކަން ބައިނަލްއަޤްވާމީ މުޖުތަމަޢަށް ސާފުކޮށްދެއްވުމަށް ދެއްކެވި ވާހަކަފުޅެއް ކަމަށް އޭޖީ އޮފީހުން އެކަމާއި ގުޅޭގޮތުން ނެރެފައިވާ ބަޔާނެއްގައި ބުނެފި އެވެ.
އެޓަރނީ ޖެނެރަލް ރާއްޖޭގެ މަރުގެ އަދަބު އުވާލެވޭނީ އާންމުންގެ ޚިޔާލު އެކަމަށް ހޯދައިގެންކަމަށް ރިވިއު ސެޝަންގައި ވިދާޅުވުމުން ގިނަ ބަޔެއްގެ ފާޑުކިޔުން ވަނީ އޭޖީ އަށް އަމާޒުވެފައެވެ. އެކަމާއި ގުޅިގެން އޭޖީ އޮފީހުން ވަނީ ރިވިއު ސެޝަންގައި އޭޖީ ދެއްކެވި ވާހަކަފުޅު ތަފްސީލުކޮށްދިނުމަށްފަހު ބަޔާނެއް ނެރެފައެވެ. އެބަޔާނުގައި ބުނެފައިވަނީ ދިވެހިރާއްޖޭގައި މަރުގެ އަދަބު ކަނޑައެޅުން ހުއްޓާލުން، އެއީ މުސްތަޙީލުކަމެއްކަމަށެވެ.
ރިވިއު ސެޝަންގެ ކުރިން، ޤައުމުތަކުން ދިވެހިރާއްޖެއަށް ފޮނުވާފައިވާ ސުވާލުތަކުގައިވެސް، ދިވެހިރާއްޖޭގެ ޤާނޫނުތަކުން މަރުގެ އަދަބު އުވާލުމާ ގުޅޭގޮތުން ޤައުމުތަކަކުން ސުވާލުތަކެއް ކޮށްފައިވާ ކަމަށް ބަޔާނުގައި ބުނެފައިވެއެވެ. އަދި އެ ސެޝަންގައިވެސް، ދިވެހިރާއްޖޭގައި މަރުގެ އަދަބު ދިނުން ހުއްޓާލުމަށާއި، ދިވެހިރާއްޖޭގެ ޤާނޫނުތަކުން މަރުގެ އަދަބު އުވާލުމާ ގުޅޭގޮތުން ގިނަ ހުށަހެޅުންތަކެއް ދިވެހިރާއްޖެއަށް ލިބޭނެކަމަށް ލަފާ ކުރެވުނު ކަމަށް ބުނެފައިވެ އެވެ.
އެހެންކަމުން ދިވެހިރާއްޖޭގައި މަރުގެ އަދަބު ދިނުމާއި، ޤާނޫނުތަކުން މަރުގެ އަދަބު އުވާލުމާ ގުޅޭގޮތުން ރާއްޖޭގެ ސިޔާސަތު މި ސެޝަންގައި ދިވެހިރާއްޖެއިން ބަޔާންކުރުމަކީ، މުހިއްމުކަމެއް ކަން ފާހަގަކޮށް އޭޖީ އޮފީހުން ބުނީ އޭޖީގެ ސްޓޭޓްމަންޓްގައި ބަޔާންކޮށްފައި ވަނީ، އެހެން ހުށަހެޅުންތައް ދިވެހިރާއްޖެއަށް ލިބުމުގެ ކުރިން، މިކަމުގައި ދިވެހިރާއްޖޭގެ ސިޔާސަތު ބައިނަލްއަޤުވާމީ މުޖުތަމަޢަށް ސާފުކޮށް ހާމަކޮށްދިނުމުގެ ގޮތުން ކަމަށެވެ.
މި ސްޓޭޓްމެންޓުގައި އޭޖީ ވިދާޅުވެފައިވަނީ ރާއްޖޭގެ ގާނޫނުލްއުގޫބާތުން މަރުގެ އަަދަބު މުޅިން އުވައި ލެވޭނީ އާންމުންގެ ޚިޔާލާއި ގާނޫނުތަކަށް ގެންނަން ޖެހޭ ބަދަލުތައް ގެނައުމަށް ފަހު ކަމަށެވެ.
އޭޖީ އޮފީހުން އިތުރަށް ބުނީ ރާއްޖޭގައި މަރުގެ އަދަބު ތަންފީޒުކުރަން ފެށުމަށްވުރެ ކުރިން ފުރަތަމަ އިސްކަންދޭނީ، ވަކިފަރާތަކަށް ނުޖެހޭ، މިނިވަން، އަދި ރައްޔިތުންގެ އިތުބާރާއި ޔަޤީންކަން ލިބިފައިވާ ޢަދުލު އިންޞާފުގެ ނިޒާމެއް ޤާއިމްކުރުމަށް ކަމަށެވެ. މަރުގެ އަދަބު އުވާލުމާ ގުޅޭގޮތުން މި ސަރުކާރުން ގެންގުޅޭ ސިޔާސަތަކީ ބައިނަލްއަޤްވާމީ މައިދާނުގައި މީގެ ކުރިންވެސް ހާމަކޮށްފައިވާ ސިޔާސަތެއްކަން އެ އޮފީހުން ވަނީ ފާހަގަކޮށްފައެވެ.
