ކޮވިޑް 19 ޖެހިގެން އިތުރު ދިވެއްސަކު މަރުވެ، ރާއްޖެއިން މިބަލީގައި މަރުވި މީހުންގެ އަދަދު 39 އަށް އަރައިފިއެވެ.
ހެލްތު ޕްރޮޓެކްޝަން އެޖެންސީން ބުނީ، މިއަދު މިބަލީގައި މަރުވި މީހަކީ އުމުރުން 88 އަހަރުގެ ދިވެހި ފިރިހެނެއް ކަމަށެވެ. އަދި މިމީހާ މަރުވީ މިއަދު ހަވީރު 3:50 އެހާކަށްހާއިރު ހުޅުމާލެ މެޑިކަލް ފެސިލިޓީގައި ފަރުވާދެމުން ދަނިކޮށް ކަމަށްވެސް އެޗް.ޕީ.އޭއިން ބުނެއެވެ.
މިމީހާއާއިއެކު ރާއްޖެއިން މިބަލީގައި މަރުވި މީހުންގެ ޖުމްލަ އަދަދުވަނީ 39 އަށް އަރާފައެވެ. އަދި މިހާތަނަށް މިބަލީގައި މަރުވި މީހުންގެ ތެރޭގައިވެސް ގިނައީ ދިވެހިންނެވެ. އެގޮތުން މިހާތަނަށް 32 ދިވެހިން މަރުވެފައިވާއިރު، 7 ބިދޭސީންވަނީ މަރުވެފައެވެ.
ރާއްޖެއިން މިބަލި ޖެހުނު މީހުންގެ އަދަދު 11،893 އަށް އަރާފައިވާއިރު، މިހާރު މިބައްޔަށް ފަރުވާކުރަނީ 838 މީހުންނަށެވެ. އަދި ބަލި ޖެހުނު މީހުންގެ ތެރެއިން 11،010 މީހުންވަނީ ބަލިން ރަގަޅުވެފައެވެ.
