ބޭންކް އޮފް މޯލްޑިވްސްއިން އަތޮޅުތެރޭގައި ކުރަމުންދާ އިންވެސްޓްމަންޓް އިތުރަށް ފުޅާކުރުމުގެ ގޮތުންނާއި މުޖުތަމައަށް ފޯރުކޮށްދޭ އެހީތެރިކަމުގެ ދަށުން އދ. ދިގުރަށުގައި ސެލްފް ސަރވިސް ބޭންކިންގ ސެންޓަރެއް ހުޅުވައި ޚިދުމަތް ދޭން ފަށައިފިއެވެ.
ބީ.އެމް.އެލްއިން ބުނީ، މިސެންޓަރުން ފައިސާ ނެގުމުގެ އިތުރުން އަމިއްލަ ފަރުދުންނާއި، ވިޔަފާރިތަކަށް 24 ގަޑިއިރު ފައިސާ ޖަމާކުރުމާއި، ފައިސާ ދެއްކުމާއި ޓްރާންސްފަރ ކުރުމުގެ ޚިދުމަތް ލިބޭނެ ކަމަށެވެ.
ދިގުރަށުގައި ދޭން ފެށި މިޚިދުމަތާއެކު، އދ. އަތޮޅުގެ 3 ރަށަކުން މިހާރު މިޚިދުމަތް ލިބޭނެއެވެ. އަދި އެބޭންކުން އަންނަނީ އދ.މަހިބަދޫގައި ބްރާންޗުގެ ޚިދުމަތްވެސް ދެމުންނެވެ.
ބީއެމްއެލްއިން ބުނީ، 24 ގަޑިއިރު ޚިދުމަތް ދިނުމަށް ހަމަޖެހިފައިވާ މި ސެންޓަރުގައި އެންމެ ޒަމާނީ ޚިދުމަތްތައް އެކުލެވިގެންވާ އޭ.ޓީ،އެމް ބެހެއްޓިފައި ހުންނާނެ ކަމަށެވެ.
އަދި ކަސްޓަމަރުންނަށް އަމިއްލަ ރަށުގައި ތިބެ ފަސޭހަކަމާއެކު ފައިސާގެ މުއާމަލާތް ކުރުމާއި، ކޮންމެ ވަގުތަކު ފަސޭހަކަމާއެކު ބޭންކިންގ ޚިދުމަތް ހޯދުމުގެ ފުރުސަތު އަމިއްލަ ފަރުދުންނާއި، ވިޔަފާރިތަކަށް ފަހިކުރުމަށް މެދުކެނޑުމެއްނެތި މަސައްކަތްކުރަމުންދާ ކަމަށްވެސް އެ ބޭންކުން ބުނެއެވެ.
މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 38 ބްރާންޗް، 62 ސެލްފް ސަރވިސް ބޭންކިންގ ސެންޓަރ، 125 އޭޓީއެމް، 200 އަށްވުރެ ގިނަ ކޭޝް އޭޖެންޓުންގެ އިތުރުން އެންމެ ޒަމާނީ އޮންލައިން ބޭންކިންގ ޚިދުމަތާއެކު ބޭންކް އޮފް މޯލްޑިވްސްގެ އަމާޒަކީ، އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކިކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށް ބީއެމްއެލްއިން ބުނެއެވެ.
