ކޮވިޑް 19 ވައިރަސް ޖެހިގެން އައިސީޔޫގައި ފަރުވާދެމުން ދިޔަ އިތުރު ދިވެއްސަކު މަރުވެއްޖެއެވެ.
ހެލްތު ޕްރޮޓެކްޝަން އެޖެންސީން ބުނީ، މިބަލީގައި ރޭ މަރުވި މީހަކީ އުމުރުން 52 އަހަރުގެ ދިވެއްސެއް ކަމަށެވެ. އެ މީހާ މަރުވީ ރޭ 11:32 އެހާކަށްހާއިރު ކަމަށާއި، ރޭ މަރުވި މީހަކީ ހުޅުމާލެ މެޑިކަލް ފެސިލިޓީގެ އައިސީޔޫގައި ފަރުވާދެމުން ދިޔަ މީހެއް ކަމަށްވެސް އެޗް.ޕީ.އޭއިން ބުނެއެވެ.
މިއީ ފާއިތުވި 24 ގަޑިއިރުގެ ތެރޭގައި ރާއްޖެއިން މިބަލީގައި މަރުވި ދެވަނަ މީހާއެވެ. އަދި މިމަހުގެ ތެރޭގައި މިބަލީގައި މަރުވި 5 ވަނަ މީހާއެވެ.
މިމީހާއާއިއެކު ރާއްޖެއިން މިބަލީގައި މަރުވި މީހުންގެ އަދަދުވަނީ 44 އަށް އަރާފައެވެ. މިހާތަނަށް މަރުވި މީހުންގެ ތެރޭގައި ހިމެނެނީ 36 ދިވެހިންނާއި، 8 ބިދޭސީންނެވެ.
މިހާރު އަނެއްކާވެސް ރާޢްޖެއިން ޕޮޒިޓިވްވި ކޭސްތައް ފެންނަ މިންވަރުވަނީ އިތުރުވާން ފަށާފައެވެ. އެގޮތުން އިއްޔެވެސް ރާއްޖެއިން 50 ކޭސްވަނީ ފެނިފައެވެ.
މިހާތަނަށް ރާއްޖެއިން މިބަލި ޖެހުނު މީހުންގެ އަދަދު 12،204 އަށް އަރާފައިވާއިރު، މިހާރު ބައްޔަށް ފަރުވާދެމުންދަނީ 865 މީހުންނަށެވެ. އޭގެތެރެއިން 47 މީހުންނަށް ފަރުވާދެނީ ހޮސްޕިޓަލްތަކުގައި އެޑްމިޓްކޮށްގެންނެވެ.
