ކޮވިޑާއި ގުޅިގެން ޤުރުއާން ކްލާސްތަކާއި ޕްރީސްކޫލްތަކަށް ދިމާވެފައިވާ މާލީ ދަތިތައް ހައްލުކުރުމަށް ޒަކާތު ފަންޑުން 1.5 މިލިއަން ރުފިޔާގެ އެހީ ދީފިއެވެ.
އެޑިޔުކޭޝަން މިނިސްޓްރީން ބުނީ، ޤުރުއާން ކްލާސްތަކާއި ޕްރީސްކޫލްތަކަށް އިސްލާމިކް މިނިސްޓްރީގެ ޒަކާތު ފަންޑުން ދިނުމަށް ކަނޑައެޅި 1.5 މިލިއަން ރުފިޔާގެ ފައިސާގެ އެހީދޭން ކަނޑައެޅި ފަރާތްތަކާއި މިއެހީ ޙަވާލުކޮށްފައިވާ ކަަމަށެވެ.
މި ފައިސާއިން ޕްރީ ސްކޫލްތަކަށް 1 މިލިއަން ރުފިޔާ ދީފައިވާއިރު، ޤުރުޢާން ކްލާސްތަކަށް 5 ލައްކަ ރުފިޔާ ދީފައިވެއެވެ.
އެގޮތުން ޒަކާތު ފަންޑުން ދޭ ފައިސާގެ އެހީއަށް އެދި ހުށަހެޅި 25 ޕްރީސްކޫލަށާއި، 23 ޤުރުއާން ކްލާހަށް ފައިސާގެ އެހީ ދީފައިވާ ކަމަށްވެސް އެމިނިސްޓްރީން މައުލޫމާތުދެއެވެ.
އެ މިނިސްޓްރީން ބުނީ، ޒަކާތު ފަންޑުން އެހީދޭނެ ފަރާތްތައް ކަނޑައެޅީ މިކަމަށް އެދި ހުށަހެޅި ފަރާތްތަކުގެ ތެރެއިން އުސޫލުގައިވާ ގޮތުގެ މަތިން އެންމެ ގިނަ މާކްސް ލިބުނު ފަރާތްތަކަށް ކަމަށެވެ.
ޒަކާތު ފަންޑުން ދިން މި އެހީއަކީ، ކޮވިޑާއި ގުޅިގެން ޤުރުއާން ކްލާސްތަކާއި، އަމިއްލަ ޕްރީސްކޫލްތަކާއި، ކޮމިއުނިޓީ ސްކޫލްތަކަށް ދިމާވި މާލީ ދަތިތަކަށް އެހީތެރިވެދިނުމުގެ ގޮތުން ދިން އެހީއެކެވެ.
