ކޯވީޑް-19އަށް ފަރުވާދެމުން އައި އިތުރު މީހަކު ނިޔާވެއްޖެއެވެ.
އެޗްޕީއޭއިން ބުނީ މިރޭ ނިޔާވެފައިވަނީ އައިޖީއެމްއެޗުގައި ފަރުދޭމުންދިޔަ ޢުމުރުން 72 އަހަރުގެ ދިވެހި ފިރިހެނެކެވެ. މިއީ ފާއިތުވެގެން މިދާ 3 ދުވަހުގެ ތެރޭގައި ރާއްޖެއިން ކޯވިޑް 19 ގައި ނިޔާވި 4 ވަނަ މީހާއެވެ.
އިއްޔެ ވަނީ ކޯވިޑަށް ފަރުވާ ދެމުންދިޔަ 2 މީހަކު ނިޔާވެފައެވެ. އަދި އޭގެ ކުރީ ދުވަހުވެސް ވަނީ ހުޅުމާލޭ މެޑިކަލް ފެސިލިޓީގައި ފަރުވާ ދެމުންދިޔަ މީހަކު ނިޔާވެފައެވެ. މިރޭ ނިޔާވި މީހާއާއިއެކު ކޯވިޑް-19 ގައި ރާއްޖެއިން ނިޔާވި މީހުންގެ އަދަދު ވަނީ 45 އަށް އަރާފައެވެ. މިހާތަނަށް ރާއްޖެއިން ނިޔާވިި 45 މީހުންގެ ތެރޭގައި ހިމެނެނީ 37 ދިވެހިންނާއި 8 ބިދޭސީންނެވެ.
ފާއިތުވެދިޔަ 3 ދުވަހު ރާއްޖޭގައި ޕޮޒިޓިވްވާ މީހުންގެ އަދަދު އެއްދުވަހުން އަނެއް ދުވަހަށް ދަނީ އިތުރުވަމުންނެވެ. މިއަދު ވެސް ވަނީ 110 މީހަކު ކޯވިޑަށް ޕޮޒިޓިވް ވެފައެވެ. މިއީ ފާއިތުވެދިޔަ މަހެއްހާ ދުވަހުގެ ތެރޭގައި އެންމެ ގިނައިން މީހުން ޕޮޒިޓިވްވި ދުވަހެއެވެ.
