ރައީސް އިބްރާހީމް މުޙައްމަދު ސޯލިހުގެ ވެރިކަމަށް ދެ އަހަރު ފުރުނުއިރު، އެމަނިކުފާނު އެންމެ ފަހުރުވެރިކަމާއެކު ފާހަގަ ކުރައްވާފައިވަނީ ޚާރިޖީ ދާއިރާއިން ހާސިލްކޮށްފައިވާ ކާމިޔާބީތަކެވެ. އަދި އެމަނިކުފާނުގެ ގައުމާ މުހާތަބުކުރެއްވި ގިނަ ސްޕީޗުތަކުގައި ޚާރިޖީ ޓީމުގެ ކާމިޔާބު ފާހަގަކުރައްވާފައިވެއެވެ.
"ޚާރިޖީ ދާއިރާއަށް ބަލާއިރު، މިދިޔަ އަހަރަކީ، ދުވަސްތަކެއްގެ މެދުކެނޑުމަކަށްފަހު، ބައިނަލްއަޤްވާމީ ޢާއިލާގެ ތެރެއަށް، ރާއްޖެއަށް އަލުން ވަދެވުނު އަހަރެއް. މިދިޔަ އަހަރެއްހާ ދުވަހުގެ ތެރޭގައި، އަވަށްޓެރި އަދި ރަޙްމަތްތެރި ޤައުމުތަކާއެކު، ތަފާތު ދާއިރާތަކުން އެއްބަސްވުންތައް ޤާއިމުކުރެވި، ތަޢުލީމީ ފުރުޞަތުތަކާއި، މާލީ އެހީތެރިކަމާއި، ދަތުރުފަތުރުކުރުމުގެ އެތައް ލުއިފަސޭހަތަކެއް ލިބިއްޖެ'" މިއަހަރުގެ ރިޔާސީ ބަޔާން އިއްވަވަމުން ފެބްރުއަރީ މަހުގެ ތިން ވަނަ ދުވަހު ރައީސުލްޖުމްހޫރިއްޔާ ވިދާޅުވިއެވެ.
އެމަނިކުފާނުގެ ވާހަކަފުޅުގައި އެހިނދަށް ދިވެހި ޚާރިޖިއްޔާ ހާސިލުކޮށްފައިވާ ކަންކަން ވެސް ވަކިވަކިން ފާހަގަކުރެއްވިއެވެ؛ "އިންޑިޔާ، ރަޝިޔާ، ތައިލޭންޑް އަދި ޔޫ.އޭ.އީ. އަށް ވިސާއާ ނުލައި ދިވެހިންނަށް ދަތުރުކުރެވޭނެ އިންތިޒާމު މިހާރުވަނީ ހަމަޖެހިފައި. އޭގެ އިތުރުން، މޮރޮކޯއާއި ޗައިނާއަށް ދަތުރުކުރުމުގައިވެސް ވަރަށް އަވަހަށް އެ ލުއިފަސޭހަތައް ލިބޭނެ. ރާއްޖެއާއި ޖަރުމަނު ސަރުކާރާ ގުޅިގެން، ޝެންގަން ވިސާ ހޯދުމުގައި ދިވެހިންނަށް ލުއި ގޮތްތަކެއް ހޯދައިދިނުމަށް، ރާއްޖޭގައި ވިސާ އެޕްލިކޭޝަން ސެންޓަރެއް، އަންނަ މާރިޗް މަހުގައި ޤާއިމުކުރުމުގެ މަސައްކަތް އަންނަނީ ކުރެވެމުން. ބައިނަލްއަޤްވާމީ މުޖުތަމަޢުގެ ފުރިހަމަ އެހީތެރިކަމާއެކު، މި މަހުގެ ފުރަތަމަ ދުވަހުން ފެށިގެން، ދިވެހިރާއްޖެ އަނެއްކާވެސް މިވަނީ ކޮމަންވެލްތުގެ މެމްބަރު ޤައުމަކަށްވެފައި. ރައީސުލްޖުމްހޫރިއްޔާ ވިދާޅުވެފައިވެއެވެ.
މިއަހަރުގެ ޤައުމީ ދުވަހުގެ މުނާސަބަތުގައި ގައުމާ މުހާތަބުކުރައްވާ ވާހަކަ ދައްކަވަމުން ރައީސުލްޖުމްހޫރިއްޔާ ވިދާޅުވި ގޮތުގައި "މިއަދުވެސް ރާއްޖޭގެ ލޮބުވެތި ރައްޔިތުންނަށް، ޔަޤީންކަމާއެކު ދަންނަވަން ބޭނުންވަނީ، ހުރިހާ ޤައުމުތަކަކާއެކުވެސް، ޚާރިޖީ ގުޅުންތައް އަޅުގަނޑުމެން ހަރުދަނާކުރަމުން މިއަންނަނީ، ވަރަށް މުހިންމު ދެ ކަމެއް ކަށަވަރުކުރަމުން"ނެވެ.
"ފުރަތަމަ ކަމަކީ، ރާއްޖޭގެ އަމިއްލަ މިނިވަންކަމާއި ސިޔާދަތު ފުރިހަމައަށް ރައްކާތެރިކުރުން. ދެވަނަ ކަމަކީ، އެ ގުޅުންތަކުގެ ސަބަބުން، ރައްޔިތުންނަށް ފައިދާއާއި ލާބަ ލިބޭނެކަން ކަށަވަރު ކުރުން. މި ސަރުކާރުގެ ފުރަތަމަ ދުވަހުން ފެށިގެން، މިއަދާ ހަމައަށްވެސް ތަންފީޒުކުރަމުން މި އަންނަނީ މި ސިޔާސަތު. މާތް ﷲގެ ވާގިފުޅާއެކު، ކުރިމަގުގައިވެސް ދަމަހައްޓާނީ ހަމަ މި ސިޔާސަތު" އެމަފުނިކުފާނު ވިދާޅުވި އެވެ.
"މި ސަރުކާރު ފެށުނުއިރު، ރާއްޖެ އޮތީ ބައިނަލްއަޤްވާމީ މުޖުތަމަޢުން ވަރަށް ބޮޑަށް އެކަހެރި ކުރެވިފައި. އެކަމުގެ ސަބަބުން، ދިވެހިރާއްޖެއަށާއި ދިވެހި ރައްޔިތުންނަށް ލިބެންހުރި، އެތައް މަންފާތަކަކާއި، އެތައް އެހީތަކެއް ލިބުމަށް ވަރަށް ބޮޑަށް ހުރަސްއެޅުނު. ނަމަވެސް މާތް ﷲގެ ވާގިފުޅާއެކު، އަޅުގަނޑުމެންގެ ޚާރިޖީ ގުޅުންތައް މިހާރު އަންނަނީ ބަދަހިވަމުން، އަދި އެކަމުގެ ފައިދާވެސް ދިވެހި ރައްޔިތުންނަށް ލިބެމުން. ކޯވިޑް-19ގެ ބަލިމަޑުކަން ރާއްޖެ ވަށައިލިއިރު، އަޅުގަނޑުމެންގެ ޚާރިޖީ ގުޅުންތައް އިޢާދަކުރެވި ބަދަހިވެފައިވާކަމީ، މާތް ﷲގެ މަދަދާއެކު، ދިވެހި ރައްޔިތުންނަށް ލިބުނު ވަރަށް ހެޔޮ ނަސީބެއް." ރައީސް ވިދާޅުވިއެވެ.
މިއަހަރުގެ ޖުމްހޫރީ ދުވަސްކަމުގައި 11 ނޮވެމްބަރު 2020 ވަނަ ތާރީޚުގައި ދިވެހި ގައުމާ މުޚާތަބުކުރައްވައި ދެއްކި ވާހަކަފުޅުގައި ޚާރިޖީ ދާއިރާއިން ދިވެހި ރާއްޖެ ހޯދާފައިވާ އަދި ހޯދަމުންދާ ކުރިއެރުންތައް ފާހަގަކުރައްވާފައިވެއެވެ.
"މިދިޔަ ދެ އަހަރު ވެސް، ބައިނަލްއަޤްވާމީ ދާއިރާއިން، ރާއްޖެއަށް ބޮޑެތި ކުރިއެރުންތަކެއް ހާސިލުކުރެވުނު. މި ދާއިރާއިން އެންމެ ފާހަގަކޮށްލެވެނީ، ހީނަރުވެފައި އޮތް ޚާރިޖީ ގުޅުންތައް އަލުން ހަރުދަނާކުރެވި، ބައިނަލްއަޤްވާމީ މުޖުތަމަޢާއެކު ގާތް ގުޅުމެއް އުފެދިގެންދިޔަކަން. އޭގެ ހެޔޮ ނަތީޖާވެސް އަންނަނީ ފެންނަމުން،" ރައީސުލްޖުމްހޫރިއްޔާ ވިދާޅުވިއެވެ.
މީގެ އިތުރުން ކޮވިޑާ ގުޅިގެން ބޭއްވި ނޫސްވެރިންގެ ބައްދަލުވުންތަކުގައާއި ޤައުމާ މުހާތަބުކުރައްވާ ދެއްކެވި ވާހަކަފުޅުތަކުގައިވެސް ދިވެހި ޚާރިޖިއްޔާގެ ހީވާގި ނަމޫނާ އަދި ކާމިޔާބު މަސައްކަތަކަށް ޝުކުރު އަދާކުރައްވާފައިވެއެވެ.
ދިވެހި ޚާރިޖިއްޔާގެ ކާމިޔާބުގެ ވާހަކަ ދައްކާއިރު، މިކަންކަމުގެ އެންމެ އިސް މޭސްތިރިއަކީ ކޮން ބޭފުޅެއްތޯއެވެ؛ އެއީ ދިވެހި ޚާރިޖީ ވަޒީރު އަބްދުﷲ ޝާހިދެވެ.
އޮނަރަބުލް ޝާހިދުގެ މަސައްކަތްޕުޅު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ ފާހަގަކުރައްވާފައެވެ. އެމަނިކުފާނު ވިދާޅުވިގޮތުގައި ކެބިނެޓުގައި ހިމެނިވަޑައިގެންނަވާ އެމްޑީޕީގެ ވަޒީރުންގެ ތެރެއިން އެންމެ ކާމިޔާބު އަދި ވަޢުދުތައް ރަނުން ރަނަށް ތަންފީޒުކުރައްވަމުންގެންދަވާ ވަޒީރަކީ އަބްދުﷲ ޝާހިދެވެ.
ކޮވިޑުގެ އެންމެ ނުރައްކާ ދުވަސްވަރު، ދިވެހި ޚާރިޖިއްޔާގެ ޓީމުންކުރި މުހިއްމު މަސައްތްތައް ދިވެހި މީޑިޔާތަކުން ތަކުރާރުކޮށް ފާހަގަކޮށްފައިވެއެވެ.
ކުރުކޮށް ފޮނިކޮށް ބުނެ ނިންމާލަމާތޯއެވެ؛ އޮނަރަބަލް އަބްދުﷲ ޝާހިދަކީ މޮޅު ހިންގުންތެރިއެކެވެ. ކުޅަދާނަ ޓީމު ލީޑަރެކެވެ. ހުށިޔާރު ޑިޕްލޕޮމެޓެކެވެ. ޖެހިލުންކުޑަ، ހިކުމަތްތެރި ސިޔާސީ ލީޑަރެކެވެ. އެހެންކަމުން ސަރުކާރަށް ދެ އަހަރުވީއިރު އެންމެ ކާމިޔާބު ވަޒީރުގެ މަގާމު ލިބެނީ އެމަނިކުފާނަށެވެ.
