މިއަދު ރާއްޖެއިން ޖުމްލަ 94 މީހުން ކޮވިޑް 19 ވައިރަސްއަށް ޕޮޒިޓިވްވި ކަމަށް ހެލްތު ޕްރޮޓެކްޝަން އެޖެންސީން ހާމަކޮށްފިއެވެ.
އެޗް.ޕީ.އޭއިން ބުނީ، މިއަދު ގްރޭޓަރ ސަރަހައްދުން 49 މީހުން ޕޮޒިޓިވްވެ، ރަށްރަށުން 45 މީހުން ޕޮޒިޓިވްވި ކަމަށެވެ. އަދި ރަށްރަށުން ފެނުނު ކޭސްތަކުގެ ތެރޭގައި ރަށްފަޅު ހުރާއިން ރިޕޯޓްކުރި 42 ކޭސް ހިމެނޭ ކަމަށްވެސް އެޗް.ޕީ.އޭއިން ބުނެއެވެ. މިމީހުންގެ ތެރޭގައި ހިމެނެނީ 38 ދިވެހިންނާއި، 56 ބިދޭސީންނެވެ.
މި މީހުންނާއިއެކު ރާއްޖެއިން ބައްޔަށް ޕޮޒިޓިވްވި މީހުންގެ ޖުމްލަ އަދަދުވަނީ، 12،546 އަށް އަރާފައެވެ. އޭގެތެރެއިން 11،497 މީހުން ބަލި ރަގަޅުވެފައިވާއިރު، ބައްޔަށް ފަރުދޭ މީހުންގެ އަދަދުވަނީ 997 އަށް އިތުރުވެފައެވެ. އަދި ހޮސްޕިޓަލްތަކުގައި އެޑްމިޓްކޮށްގެން ފަރުވާދޭ މީހުންގެ އަދަދުވަނީ 80 އަށް މަތިވެފައެވެ.
ބަލި ޖެހުނު މީހުންނާއި ބައްދަލުވި މީހުންގެ ތެރެއިން 320 މީހުން އައިސޮލޭޝަން ފެސިލިޓީތަކަށް ބަދަލުކޮށްފައިވާއިރު، މިބަލީގައި މިހާތަނަށް 45 މީހުންވަނީ މަރުވެފައެވެ.
