ހަރުކަށި ފިކުރުގެ ބަޔަކު ރާވަމުން ދިޔަ ކަމަށް ތުހުމަތު ކުރެވޭ ޓެރަރިޒަމްގެ ހަމަލާ ދޭން އުޅުނު ކަމުގެ ތުހުމަތުގައި އިއްޔެ ހައްޔަރުކުރި ދެ މީހުންގެ ބަންދުގެ މުއްދަތު އިތުރުކޮށްފިއެވެ.
ފުލުހުންވަނީ، ޓެރަރިރަޒަމްގެ އަމަލަކާ ގުޅޭގޮތުން ފުލުހުންގެ އިންޓަލިޖަންސަށް ލިބުނު މައުލޫމާތުގެ މައްޗަށް ބިނާކޮށް އެއަމަލު ހުއްޓުވާ، ބަޔަކު ހައްޔަރުކޮށް، މިމަހުގެ 11 ވަނަ ދުވަހު އޮޕަރޭޝަނެއް ފަށާފައެވެ. މިއޮޕަރޭޝަންގެ ދަށުން އެދުވަހު 6 މީހުން ހައްޔަރުކުރިއެވެ. ފުލުހުން ބުނީ، އެމީހުންގެ ތެރެއިން 18 އަހަރުގެ މީހާ ފިޔަވައި ދެން ތިބި 5 މީހުންގެ ބަންދުގެ މުއްދަތު 15 ދުވަހަށް އިތުރުކޮށްދީފައިވާ ކަމަށެވެ. އަދި މިމައްސަލާގައި އިއްޔެ ހައްޔަރުކުރި 2 މީހުންގެ ބަންދުގެ މުއްދަތަށް 7 ދުވަސް ޖަހައިދީފައިވާ ކަމަށްވެސް ފުލުހުން މައުލޫމާތުދެއެވެ.
މިމައްސަލާގެ އިތުރު ތަފްސީލެއް ފުލުހުން އަދި ހާމައެއްނުކުރެއެވެ.
