ދުނިޔޭގައި ހަލުވިކަމާއެކު ފެތުރެމުން ގޮސްފައިވާ އަދި މިހާރުވެސް ފެތުރެމުންދާ ޢާލަމީ ވަބާއެއްކަމުގައިވާ ކޮވިޑް-19 އިން ޙަޤީޤީ ރައްކާތެރިކަން ދުނިޔެއަށް ލިބިގެން ދާނީ، ދުނިޔޭގެ ހުރިހާ ޤައުމެއްވެސް އެ ބަލިން ސަލާމަތް ވުމުންކަމަށް، ފޮރިން މިނިސްޓަރު ޢަބްދު ﷲ ޝާހިދު ވިދާޅުވެއްޖެއެވެ.
މިނިސްޓަރު ޝާހިދު މިފަދައިން ވިދާޅުވީ، ދުނިޔޭގެ އެންމެހައި ޤައުމުތަކަށްވެސް ހަމަހަމަ އުޞޫލަކުން ކޮވިޑް-19 ވެކްސިން ލިބިގެންދިއުމާ ގުޅޭގޮތުން މަޝްވަރާކުރުމަށް އިއްޔެގެ ވަގުތެއްގައި އޮންލައިންކޮށް ބޭއްވުނު އަލިފުދާލުގެ 31 ވަނަ ޚާއްޞަ އެސެމްބްލީގައި ވަހަކަދައްކަވަމުންނެވެ.
"މިއީ މުޅި ދުނިޔެއާ ކުރިމަތިވެފައިވާ މައްސަލައެއް. މި މައްސަލައަށް ބޭނުން ވަނީ މުޅި ދުނިޔެއިން (ހޯދާ) ޙައްލެއް" ކަމަށް ވިދާޅުވުގެ އިތުރުން، ވައިރަސްތަކަކީ ބޯޑަރުތަކަށް ބަލާއެއްޗެއް ނޫންކަމަށް ވިދާޅުވެ މަޖާޒީގޮތުން މިސާލުނަންގަވައި، އެއްވެސް ޤައުމެއްގައި ވައިރަސް އުޅޭކަމުގައި ވާނަމަ ދުނިޔެއަށް ފެތުރިގެން ދިއުމުގެ ފުރުޞަތު އޮތްކަންވެސް، މިނިސްޓަރު ޝާހިދުގެ ވާހަކައިގައި ފާހަގަކުރަށްވާފައި ވެއެވެ.
އަލިފުދާލުގެ ގުނަވަނެއްކަމުގައިވާ، ދުނިޔޭގެ ޞިއްޙަތު ޖަމިއްޔާއިން ގެންދަނީ، ދުނިޔޭގެ ފަޤީރު އަދި ނިކަމެތި ޤައުމުތަކަށް ކޮވިޑް-19 ގެ ވެކްސިން ލިބޭކަން ކަށަވަރު ކުރުމުގެ ގޮތުން "ކޮވެކްސް" ނަމުގައި ޚާއްޞަ ޕްރޮގްރާމެއް ފައްޓަވާފައެވެ. ކޮވިޑް-19 ވެކްސިންގެ 2 ބިލިއަން ޑޯޒް މި ޕްރޮގްރާމުގެ ދަށުން ދަށުން ހޯދައި ދުނިޔޭގެ ނިކަމެތި ޤައުމުތަކަށް ފޯރުކޮށްދިނުމަށް ޑަބްލިޔު.އެޗް.އޯ އިން އަމާޒުހިފާފައި ވާއިރު، މި ޕްރޮގްރާމުގެ ދަށުން ފޯރުކޮށްދެވޭ ވެކްސިންގެ ފަހު 20 އިންސައްތަ އެއްހައި ވެކްސިން، ޤައުމުތަކަށް ފޯރުކޮށްދެވޭނެކަމަށް މި ޕްރޮގްރާމުގެ އެންމެފަހުގެ ރަސްމީ އަޕްޑޭޓްތަކުގައި މި މަހުގެ 1 ވަނަ ދުވަހު ހާމަކޮށްފައި ވާގޮތުން، 2022 ވަނަ އަހަރުގެ ފަހުކޮޅާއި ހަމައަށްވެސް އެކަން ދެމިގެން ގޮސްދާނެކަމަށްވެސް ލަފާކޮށްފައި ވެއެވެ.
ވެކްސިން އުފައްދާ މަޝްހޫރު ތަފާތު ކުންފުނިތަކުން ކޮވިޑް-19 ވެކްސިންގެ އެންމެފަހުގެ ޓެސްޓްތަކާއި އަޖުމަބެލުންތައް ކުރިއަށްގެންދާއިރު، ކޮވިޑް-19 ބައްޔަށް އުފައްދާފައިވާ އެންމެ ފުރަތަ ވެކްސިން ކަމުގައިވާ، ފައިޒަ އަދި ބައޮންޓެކް ގުޅިގެން އުފައްދާފައިވާ ކޮވިޑް ވެކްސިން ޢާންމުކޮށް ބޭނުންކުރުމުގެ ހުއްދަ، ފާއިތުވެދިޔަ ހަފްތާގެ ބުދަ ދުވަހުގައި، ދުނިޔޭގެ އެންމެ ފުރަތަމަ ޤައުމެއްގެ ގޮތުގައި އިނގިރޭސިވިލާތުގައި ދީފައި ވެއެވެ.
