ޤާނޫނު ނަމްބަރު 18/2019 (ކުޑަކުދިންގެ ޢަދުލުގެ ޤާނޫނު) އަށް ޢަމަލުކުރަން ފެށުނުތާ އެންމެ ފަސް ދުވަހުގެ ތެރޭގައި އެޤާނޫނަށް ބޮޑެތި އިޞްލާޙުތަކެއް ހުށައެޅި، ރައްޔިތުންގެ މަޖްލީހުގެ އިއްޔަގެ ޖަލްސާއިން އެއިސްލާޙުތައް ފާސްކުރަށްވައިފިއެވެ.
ހިނގަމުން މިދާ ނަވާރަ ވަނަ ރައްޔިތުންގެ މަޖްލީހުން ފާސްކޮށް، ފާއިތުވެދިޔަ ނޮވެމްބަރު މަހުގެ 20 ވަނަ ދުވަހުގައި ޢަމަލުކުރެވެން ފެށުނު ކުޑަކުދިންގެ ޢަދުލުގެ ޤާނޫނަށް ބޮޑެތި އިސްލާޙުތަކެއް ގެނައުމުގެ ބޭނުމުގައި ބިލެއް ހުށައެޅިފައި ވަނީ، ފާއިތުވެދިޔަ ނޮވެމްބަރު މަހުގެ 25 ވަނަ ދުވަހުއެވެ.
ހިއުމަންރައިޓްސް ކޮމިޝަން އޮފް ދަ މޯލްޑިވްސްގެ މެމްބަރުކަންވެސް ކުރިން ކުރެއްވުމުގެ އިތުރުން ބައިނަލް އަޤްވާމީ އިންސާނީ ޙައްޤުތަކާބެހޭ ތަފާތު މަދަނީ ޖަމިއްޔާތަކާއި ގުނަވަންތަކުގައި މިހިނދުވެސް މަސައްކަތް ކުރަށްވަމުން ގެންދަވާ، ހިންނަވަރު ދާއިރާގެ މެމްބަރު ޖީހާން މަޙްމޫދު މަޖްލީހަށް ހުށައެޅުއްވި މި ބިލު، ހަމަ ހުށައެޅުއްވި ދުވަހުގެ ޖަލްސާއަށް އެޖެންޑާކުރެވި ބިލުގެ މަސައްކަތް މަޖްލީހުގައި ފެށިފައިވެއެވެ.
ހިއުމަން ރައިޓްސް އެންޑް ޖެންޑަރ ކޮމިޓީއަށް މިމަހުގެ 01 ވަނަ ދުވަހު ފޮނުވުނު މި ބިލުގެ އެންމެހައި މަސައްކަތްތައް 2 ދުވަހުގެ ތެރޭގައި ކޮމިޓީން އެއްކޮށް ނިންމެވުމަށްވެސް، މި ބިލު ހުށައެޅުއްވި މެމްބަރުކަމަށްވާ ހިންނަވަރު ދާއިރާގެ މެމްބަރު ޖީހާން މަޙްމޫދު މުޤައްރިރުކަން ކުރަށްވާ، ހިއުމަންރައިޓްސް ކޮމިޓީން ނިންމެވިއެވެ. އަދި، ބިލާ ގުޅޭގޮތުން ޚިޔާލު ހުށައެޅުމަށް ޢާންމުންނަށް ހުޅުވާލެވުނު އެއް ދުވަހުގެ މުއްދަތުގައި އެ ބިލަށް އެއްވެސް ޚިޔާލެއް ހުށައެޅިފައި ނުވާކަމަށްވެސް ބިލު ދިރާސާކުރެއްވި ކޮމިޓީން މަޖްލީހުގެ ތަޅުމަށް ފޮނުވި ރިޕޯޓުގައި ބަޔާންކުރަށްވާފައި ވާކަންވެސް ފާހަގަ ކޮށްލެވެއެވެ. .
ކުޑަކުދިންގެ ޢަދުލުގެ ޤާނޫނަށް އިޞްލާޙުގެނައުމަށް ފާސްކުރެވުނު މި ބިލު ޤާނޫނަކަށްވުމަށް ލާޒިމުކުރާ، ރައީސުލް ޖުމްހޫރިއްޔާ އެ ބިލެއް ތަޞްދީޤުކުރެއްވުމުގެ މަރްޙަލާގައިވާ މިހާރު ވާ މި ބިލުގައި ބުނެފައި ވަނީ، ޢުމުރުން 18 އަހަރު ފުރުމަށް ފަހުގައިވެސް ޢުމުރުން 18 އަހަރު ފުރުމުގެ ކުރިން، ކުއްޖަކު ކޮށްފައިވާކަމަށް ޝަރީޢަތަށް ސާބިތުވާ ކުށަކާ ގުޅިގެން މަރުގެ އަދަބު ދީގެން ނުވާނެކަމަށާއި، އަދި އެއްވެސް ޤާނޫނެއްގައި މަރުގެ އަދަބު ކަނޑައެޅިފައިވާ ކުށެއް، ކުޑަކުއްޖެއްގެ މައްޗަށް ސާބިތުވާ ޙާލަތުގައި އެކުށަށް ކަނޑައެޅިފައިވާ ދެން އޮތް އެންމެ ބޮޑު އަދަބެއްގެ ހަތަރު ބައިކުޅަ ތިންބަޔަށްވުރެ ބޮޑު ނޫން އަދަބަކަށް ބަދަލުކުރަންވާނެކަމަށެވެ.
އެހެންނަމަވެސް، މިހާރު އަދި ޢަމަލު ކުރެވެމުންދާ ކުޑަކުދިންގެ ޢަދުލުގެ ޤާނޫނުގެ 74 ވަނަ މާއްދާގައި ބުނެފައި ވަނީ، ކުޑަކުއްޖެއްގެ މައްޗަށް ކުރެވޭ ޖިނާއީ ކުށެއްގެ ދަޢުވާގެ ޝަރީޢަތް ފުރިހަމަކުރުމަށްފަހު، އެކުއްޖާއާމެދު ތުހުމަތުކުރެވޭ ކުށް އެކުއްޖާ ކޮށްފައިވާކަމަށް، އެ ކުށް ސާބިތުކުރުމަށް އޮންނަ ޤާނޫނީ މިންގަނޑުން ސާބިތުކުރެވިއްޖެނަމަ، އެކުއްޖާގެ މައްޗަށް އެ ކުށް ސާބިތުވާ ކަމަށް ކަނޑައަޅައި، ފަނޑިޔާރު މައްސަލަ ނިންމަންވާނެކަމަށެވެ.
ޖިނާއީ މަސްއޫލިއްޔަތު އުފުލަންޖެހޭ ކަންކަމާ ގުޅިގެން ކުޑަކުދިން ކަމުގައި މިހިނދު ޢަމަލުކުރެވެމުންދާ ޤާނޫނުގައި ކަނޑައަޅާފައި ވަނީ، މީލާދީގޮތުން ޢުމުރުން 15 އަހަރު ފުރި، އެހެންނަމަވެސް 18 އަހަރު ފުރިފައިނުވާ ކުޑަކުދިންނަށްކަންވެސް ފަހަގަކޮށްލެވެއެވެ.
