މިއަދަކީ ރާއްޖޭގެ 40 ވަނަ މަސްވެރިންގެ ދުވަހެވެ.
މަސްވެރިންގެ ދުވަސް މިއަދު ފާހަގަކުރާއިރު މަސްވެރިން ތިބީ ވަރަށް ހާލުގައެވެ. 40 ވަނަ މަސްވެރިންގެ ދުވަސް ދިވެހިންނާ ކުރިމަތިވީ ބާނާފައިވާ މަސްކޮޅު ކިރާލެވޭތޯ މަސްވެރިން އާދޭސް ކުރަމުންދާ ދަނޑިވަޅެއްގައެވެ. އެތައް ސެތޭކަ ޓަނަކާއެކު މަސްވެރިން ތިބީ މަސްކިރަން ކިއުގައެވެ. އައިސް ހޯދަން އެހާ އުނދަގުލެވެ. މަހުގެ އަގު ވެއްޓިއްޖެއެވެ. މިއީ މިއަދުގެ މަސްވެރިންގެ ހާލެވެ.
މަސްވެރިންގެ ދުވަހުގެ ގޮތުގައި ޚާއްޞަ ދުވަހެއް ސަރުކާރުން ފާހަގަ ކުރުމުގެ އެންމެ ބޮޑު ބޭނުމަކީ މުޖުތަމައުގައި މަސްވެރިން އަދާކުރާ ދައުރާއި މަސްވެރިން ކުރާ ބުރަ އަދި އަގުހުރި މަސައްކަތުގެ އަގު ވަޒަން ކުރުމެވެ.
"ކޮންމެއަކަސް މަސްވެރިކަމުގެ މުހިންމުކަމާ ދޭތެރޭ އަޅުގަނޑު މިމަޤާމުގައި މާގިނަ ވާހަކަތަކެއް ދައްކާކަށެއް ނުޖެހޭނެ. އޭގެ މުހިންމުކަން އެއީ ކޮންމެ ދިވެއްސަކަށް ރަނގަޅަށް އެނގޭނެކަމެއް. ދިވެހިރާއްޖެއާއި މަސްވެރިކަމާ ހުރިގުޅުން ދެންމެ މިނިސްޓަރ އޮފް ފިޝަރީޒްގެ ވާހަކަފުޅުގައި ބަޔާންކުރައްވައިފި. ދިވެހިންނަށް މަސްވެރިކަމާދޭތެރޭގައި ހުރިގުޅުންވެސް އެމަނިކުފާނު ބަޔާންކޮށްދެއްވައިފި. އެއީ އެއްވެސް މީހެއްގެ ބަޔާނަކަށް ބޭނުންވާ ކަމެއް ނޫނޭ އަޅުގަނޑު ދަންނަވާނީ. އެއީ އަޅުގަނޑުމެންގެ ލޭގައި ހިނގާ ކަމެކޭ، އަޅުގަނޑުމެންގެ އުފެދުމުގައި ހިމެނިފައިވާ ކަމެކޭ، އަޅުގަނޑުމެންގެ ޤައުމުގެ ފަސްގަނޑުގައި، އަޅުގަނޑުމެންގެ ޤައުމުގެ ވަށައިގެން މިވާ ކަނޑުގައި ހިމެނިފައިވާ ކަމެކޭ. އެހެންވީމާ، މަސްވެރިކަމާއި ދިވެހިންނާ، މަސްވެރިކަމާއި ދިވެހިރާއްޖެއާ އެއީ ދުވަހަކުވެސް ވަކިކުރެވޭނެ ދެ އެއްޗެއް ނޫން." މީގެ 40 އަހަރުން ފާހަގަކުރި ފުރަތަމަ މަސްވެރިންގެ ދުވަހުގެ ޖަލްސާގައި ރައީސް މައުމޫން ވިދާޅުވެފައިވެއެވެ.
އުފެދޭ ސުވާލަކީ މަސްވެރިންނަކީ އެހާ މުހިންމު ބައެއްގެ ގޮތުގައި މިއަދުގެ ސަރުކާރުން ދެކޭތޯއެވެ.
1981 ވަނަ އަހަރުން ފެށިގެންގެން 2011 ވަނަ އަހަރާ ހަމައަށް މަސްވެރިންގެ ދުވަސް ފާހަގަކުރަމުން އައީ ޑިސެމްބަރު މަހުގެ 10 ވަނަ ދުވަހުއެވެ. 2011 ވަނަ އަހަރު ރައީސް ނަޝީދުގެ ވެރިކަމުގައި މަސްވެރިންގެ ދުވަހަކީ އޮކްޓޫބަރ މަހުގެ 16 ވަނަ ދުވަހަށް ބަދަލު ކުރެއްވިއެވެ. ނަމަވެސް އޭގެފަހުން ޑރ. މުޙައްމަދު ވަހީދު ޙަސަން ވެރިކަމާ ހަވާލުވެވަޑައިގަތުމަށްފަހު ކުރިން އޮތް ގޮތަށް ޑިސެމްބަރ 10 ވަނަ ދުވަހަކީ ރާއްޖޭގެ މަސްވެރިންގެ ދުވަސްކަމުގައި އަލުން ހަމަޖެއްސެވިއެވެ.
