10 އަހަރަށްފަހު މަޝްހޫރު ތަބަލާ އާމިރާ އިސްމާއީލް އެނބުރީ ސްކްރީނަށް އަތުވެއްޖެއެވެ.
ގިނަ ދުވަސްތަކަކަށްފަހު އާމިރާ ފެނިގެންދާނީ ވަރަށް ތަފާތު ވީޑިއޯ ލަވަޔަކުންނެވެ. މި ލަވަޔަކީ ދެހާހުގެ ކުރީކޮޅު އޭރުގެ އެންމެ މަޝްހޫރު ލަވަކިޔުންތެރިޔާ އަލީ ރަމީޒް ކިޔާފައިވާ "ޔާރު ތިއޭ މިހިތުގެ ޝިފާ" މިލަވައެވެ. މިލަވަޔަކީ އޭރުވެސް ފެށިގެން މިހާތަނަށްވެސް އާންމުންގެ މެދުގައި ވަރަށް މަޤްބޫލް ލަވައެވެ. މި ލަވައިގެ ވީޑިއޯއާއެކު މިލަވަ އިތުރަށް ފުރިހަމަވެންދާނެ ކަމަށް ލަވައިގެ ޕްރޮޑިއުސަރު އުންމީދު ކުރެއެވެ.
އާމިރާގެ އެންމެ މަޝްހޫރު ދުވަސްވަރު ކުއްލިގޮތަކަށް ފިލްމީ ދާއިރާއިން ގެއްލުނު ސަބަބާ ބެހޭގޮތުން އިރުވަރު ނޫހުން އާމިރާ އާ ސުވާލުކޮށްލީމެވެ.
"ލައިފްގަ އެކި މީހުންނަށް އަންނާނީ އެކި ޗޭންޖަސްތައް ދެއްތޯ. ލައިފް ވަރަށް ބިޒީ ޝެޑިއުލް އަކަށް ދިޔައީ ދަރިފުޅުގެ ކަންތަކާއި އަދި މިކަހަލަ ބައެއް ކަންތައްތަކާ ހެދި. އަސްލު ދިރިއުޅުން ވަރަށް މުހިންމުވާނެތާ. ލައިފްގެ ކަންތައްތަކަށް ހުރިހާ ވަގުތެއް ހުސްކުރީ." އާމިރާ ބުންޏެވެ.
20 ފީޗާ ފިލްމާއި 03 ކުރު ފިލްމުގެ އިތުރުން ޓީވީ ސީރީޒްތަކުން ހުނަރުވެރި އެކްޓިންއެއް ދެއްކި އާމިރާ އަކީ ހިތްގައިމު އެތައް ލަވަތަކަކުން ފެނިގެން ގޮސްފައިވާ ކުޅަދާނަ ފަންނާނެކެވެ. އާމިރާގެ އަލުން ފިލްމީ ދާއިރާއަށް އައުމަކީ އާމިރާގެ ސަޕޯޓަރުންނަށާއި ފިލްމީ ދާއިރާއަށް ލިބިގެންދާނެ ބޮޑު ކުރިއެރުމެކެވެ. އާމިރާ ބުނީ ވަގުތުވީ ވަރަކުން ކުރިއަށް އޮތް ތާންގައި ފިލްމީ ދާއިރާއިން ފެންނާނެކަމަށެވެ.
މި ލަވައަކީ މަޝްހޫރު އެކްޓަރު ޒިޔާގެ "ސިޒާސް ޕްރޮޑަކްޝަންގެ އުފެއްދުމެކެވެ. އާމިރާއާއެކު މި ލަވައިގައި ހަރަކާތްތެރި ވާނީވެސް ޒިޔާއެވެ. މިލަވަޔަކީ ޒިޔާގެ ފަރާތުން އާންމުންނަށް ދޭ ހަދިޔާއެއްކަމަށް ޒިޔާ ބުންޏެވެ.
"މިލަވަ ހުރިހާ ޗެނަލްތަކަށް އަޅުގަނޑު ހަދިޔާ މި ކުރަނީ. އަދި ސޯޝަލް މީޑިއާ މެދުވެރިކޮށްވެސް އާންމުންނަށް މި ލަވަ ބަލާލެވޭނެ. މިއީ ޝިޒާސް ޕްރޮޑަކްޝަނުން ދޭ ހަދިޔާއެއް. މިލަވަ ޚާއްޞަވާ ސަބަބުތައް ވަރަށް ގިނަ. މިސާލަކަށް ގިނަ ދުވަސްތަކަކަށް ފަހު އާމިރާ އެނބުރި އައުން. އަދި 13 އަހަރަށްފަހު މަޝްހޫރު ޑައިރެކްޓަރު ގޮޅާ އައްޔަ އަލުން ފިލްމީ ދާއިރާއާ ގުޅި ކުރި ފުރަތަމަ މަސައްކަތް މީ. މިލަވައިގެ އިތުރުން ނާއްކޮއާއެކު ކުޅެފައިވާ އާ ވީޑިއޯ ލަވައެއް އަންނަ ހަފްތާގައި އެބަ ލޯންޗް ކުރަން. އަދި އިތުރު ފިލްމު ތަކުގެ މަސައްކަތްވެސް އެބަ ކުރަން." ޒިޔާ ބުންޏެވެ.
އާމިރާއާއި ޒިޔާގެ "ޔާރު ތިޔޭ މިހިތުގެ ޝިފާ" މި ލަވަ ޑައިރެކްޓްކޮށް ކެމެރާ ކޮށްފައިވަނީ މަޝްހޫރު އަލީ ރަޝީދު (ގޮޅާ އައްޔަ)އެވެ. ގޮޅާ އައްޔަ އަކީ މަޝްހޫރު ފިލްމު ތަކެއް ޑައިރެކްޓްކޮށް އަދި އެތަކެއް ފިލްމު ތަކެއް ކެމެރާ ކޮށްފައިވާ ކުޅަދާނަ ކެމެރާ މަނެކެވެ.
