ކޯވިޑް-19 ގެ ސަބަބުން މަރުވާ ސްރީލަންކާ މުސްލިމުންގެ ހަށިތައް ރާއްޖޭގައި ވަޅުލައިދިނުމަކީ ދީނީގޮތުން އަޅުގަނޑުމެން ކޮށްދޭންޖެހޭނެ ކަމެއް ނޫންކަމަށާއި އަދި އެކަން ކޮށްދީފިނަމަ އެކަން ވާނީ، އެޤައުމުގެ ސަރުކާރުން މުސްލިމުންނާ މެދު ޢަމަލުކުރަމުންދާ ގޮތަށް ކުރެވޭ ތާއީދަކަށްކަމުގައި ރައީސް މައުމޫނު ވިދާޅުވެއްޖެއެވެ.
ރައީސް މައުމޫން މިފަދައިން ވިދާޅުވެފައި މިވަނީ، ލަންކާގައި ކޮވިޑް-19 ޖެހިގެން ނިޔާވާ މުސްލިމުންގެ ހަށިތައް ރާއްޖެގެނެސް ވަޅުލުމަކީ އެމަނިކުފާނަށް ތާޢިދު ކުރެއްވޭނެ ކަމެއް ނޫންކަމަށް އިއްޔެ ވިދާޅުވި ވިދާޅުވުން ދިފާޢުކުރަށްވައި ދެވަނަ ފަހަރަށް މިއަދުގެ ވަގުތެއްގައި ކުރެއްވި އިތުރު ޓްވީޓެއްގައެވެ.
އަދުގެ ކޯލިޝަން ސަރުކާރުގެ މުހިންމު ބައިވެރިއަކަށް ވެވަޑައިގެންނެވުމުގެ އިތުރުން ޝަރުޢީ ޢިލްމުވެސް ލިބިވަޑައިގެންހުންނެވި ރައީސް މައުމޫން މި މައްސަލާގައި "ވަރުގަދަ" ސްޓޭންޑެއް ނަންގަވައި ފާޅުކަން ބޮޑުގޮތެއްގައި އެކަމާ ދެކޮޅުހައްދަވައި ބަސްތައް ވިދާޅުވަމުން ދާއިރު، ރާއްޖޭގެ ދީނީ ޢިލްމުވެރިންގެ އިތުރުން ސިޔާސީ ފަރާތްތަކުގެވެސް "ރައުޔު" ތަފާތުވެ މި މައްސަލާގައި ބޮޑެތި ދެބަސްވުންތައް އިއްޔެއާއި މިއަދުވެސް ހާމަކުރެވެމުން އެބަދެއެވެ.
މި މައްސަލައާ ގުޅިގެން އަވައްޓެރި ސްރީލަންކާގެ މުސްލިމް ޕާޓީއެއްކަމުގައިވާ "ސްރީލަންކާ މުސްލިމް ކޮންގްރެސް" ގެ ލީޑަރު ރަޢޫފް ޙަކީމް ކުރެއްވި ޓްވީޓެއްގައި ހާމަކުރަށްވާފައިވާ ގޮތުގައި، ސްރީލަންކާގެ މުސްލިމުން ބޭނުން ވަނީ އެޤައުމުގެ ސަރުކާރުގެ އެ ނިންމުން ބަދަލުކޮށް އެޤައުމުގެ މުސްލިމުން އެޤައުމުގައި ވަޅުލެވިގެން ދިއުންކަން ހާމަކޮށް، އެކަމުގައި އެހީތެރިވެދެއްވުމަށް ދިވެހި ސަރުކާރުގެ ކިބައިން އެދިވަޑައިގެންފައި ވެއެވެ.
ފާއިތުވެދިޔަ އޭޕްރީލް މަހުގައި ލަންކާ ސަރުކާރުން ނިންމާފައިވާ ޢަމަލުކުރަން މަޖްބޫރު ނިންމުމެއްގެ ދަށުން، ކޮވިޑް-19 ޖެހިގެން އެ ޤައުމުގައި މަރުވާ އެންމެންވެސް ޖެހެނީ އަންދާށެވެ. އަދި މިކަމަކީ އިސްލާމް ދީން ހުއްދަކުރާ ކަމެއްކަމަށް ނުވިނަމަވެސް ލަންކާގެ މުސްލިމުންގެ މައްޗަށްވެސް އެ ނިންމުން ތަންފީޒުކުރެވެމުން ދެއެވެ.
ލަންކާގެ ސަރުކާރުގެ މި ނިންމުމަކީ އިންސާނީ ޙައްޤުތަކާބެހޭ އަލިފުދާލުގެ މުޢާހަދާތަކާއިވެސް ޚިލާފަށް އަދި ސައިންޓިފިކް ގޮތުންވެސް އެއްވެސް ބުރަދަނެއް ނެތް ކަންކަމުގެ މައްޗަށް ބިނާކޮށް ދީނީ ތަޢައްޞުބުން ފުރިގެންވާ ނުފޫޒުގަދަ ބަޔަކު ނިންމާފައިވާ އަދި އެނިންމުމުގެ ސަބަބުން އެންމެ އަސާސީ އިންސާނީ ޙައްޤުތައްވެސް ނަފީކުރާ ނިންމުމެއްކަމަށް ބުނެ ބައިނަލް އަޤްވާމީ ބައެއް ޖަމާޢަތްތަކާއި ދުނިޔޭގެ ބޮޑެތި މީޑިއާތަކުގެ ފާޑުކިއުންވެސް ލަންކާގެ ސަރުކާރަށް އަމާޒުވަމުންގޮސް، ސްރީލަންކާގެ ސަރުކާރު "ޕްރެޝަރ" އަށް ވެއްޓެމުންދާކަންވެސް ފާހަގަކޮށްލެވެއެވެ.
