"ކްރިސްމަސް ޓްރީ" ނެގި ފުލުހުންގެ މައްސަލަ އިންޓެގްރިޓީ ކޮމިޝަނަށް ހުށައަޅަންޖެހޭ: ރައީސް ނަޝީދު

މާފުށީގެ ގެސްޓްހައުސްއެއްގެ ބޭރުގައި ބަހައްޓާފައި ހުރި "ކްރިސްމަސް ޓްރީ" ނަގައިގެން ގެންދިޔަ ފުލުހުންގެ މައްސަލަ ނޭޝަނަލް އިންޓެގްރިޓީ ކޮމިޝަން (އެންއައިސީ) އަށް ހުށައަޅަން ޖެހޭކަމަށް، ރައީސް ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވެފައި މިވަނީ، އަމިއްލަފުޅަށްވެސް އެއީ އެމަނިކުފާނު ކަމަށް ތަކުރާރުކޮށް ފާޅުގައި ވިދާޅުވެފައިވާ "އެލެކްސް އަޙްމަދު" ގެ ނަމުގައި ބޭނުންކުރަށްވަމުން ގެންދަވާ ޓްވިޓަރ އަތްގަނޑުން މިއަދު ކުރެއްވި ޓްވީޓެއްގައެވެ.

Must take the matter with NIC.

— Alex Ahmed (@anedhivehirajje) December 19, 2020

"ކްރިސްމަސް ޓްރީ" ނެގުމަށް ފުލުހުން ބޭނުންކުރެއްވި ކޯޓުއަމުރުގައި ޙަވާލާދީފައިވާ ޤާނޫނީ މާއްދާއަށް އިޢުތިރާޒުކުރަށްވައި ރައްޔިތުންގެ މަޖްލީހުގެ މާފަންނު އުތުރުދާއިރާގެ މެންބަރު އިމްތިހާޒް ފަހުމީ ކުރެއްވި ޓްވީޓަކަށް ކޮމެންޓްކުރަށްވައި ރައީސް ނަޝީދު މިފަދައިން މިއަދު ވިދާޅުވެފައި ވާއިރު، އެމަނިކުފާނު އިއްޔެ ކުރެއްވި ޓްވީޓެއްގައިވެސް މިމައްސަލާގައި ފުލުހުންނަށް ފާޑުވިދާޅުވެފައި ވެއެވެ. މުޅި ރާއްޖޭގެ ހުރިހާ ދިވެހިންގެ ޢާންމު ޙާލަތު ގުޅިފައި ހުރީ ޓޫރިސްޓް ވިޔަފާރިއާ ކަމަށާއި، ފުލުހުން އަޅާ ފިޔަވަޅުތަކުގެ ސަބަބުން ޓޫރިސްޓް ވިޔަފާރިއަށް ގެއްލުން ވެގެން ނުވާނެ ކަމަށް، ރައީސް ނަޝީދުގެ ނުރަސްމީ އެކައުންޓުން މި މައްސަލައާ ގުޅިގެން އިއްޔެ ކުރެއްވި ޓްވީޓުގައި ވިދާޅުވެފައި ވެއެވެ.

އެމްޑީޕީގެ ޗެއަރ ޕާރސަންގެ މަޤާމުގެ އިތުރުން ރައްޔިތުންގެ މަޖްލީހުގެ ޖުޑީޝަރީ ކޮމިޓީގެ މުޤައްރިރުކަންވެސް ކުރަށްވާ މެންބަރު އިންތިޔާޒްގެ ޓްވީޓުގައި ކޯޓު އަމުރާމެދު ސުވާލު އުފައްދަވައި ވިދާޅުވެފައި ވާނީ، އެ އަމުރުގައި ފުލުހުން/ކޯޓުން ޙަވާލާދެއްވާފައިވާ ޤާނޫނު އެންމެ ރަނގަޅު ނޫންކަމުގައެވެ.

މެންބަރު އިންތިގެ ޓްވީޓުގައި ހިމަނުއްވާފައިވާ އަމުރުގައި ޙަވާލާދެވިފައިވާ ޤާނޫނަކީ، ދިވެހިރާއްޖޭގެ ޤާނޫނުލްޢުޤޫބާތުގެ 617 ވަނަ މާއްދާގެ (ހ) ގެ 4 ވަނަ ނަމްބަރެވެ. އެ ނަމްބަރުގައި ބުނަނަނީ، އެއްވެސް މީހަކު، ދިވެހި ރައްޔިތުންގެ ދީނީ އެއްބައިވަންތަކަން ނަގާލުމަށް މަސައްކަތް ކުރުމާއި، މީހުންގެ މެދުގައި ދީނީގޮތުން ބައިބައިވުން އުފެދޭ ބާވަތުގެ ވާހަކަ ދެއްކުމާއި، އެފަދަ ގޮތްގޮތަށް ޢަމަލުކުރުމަކީ ޖިނާއީ ކުށެއްކަމުގައެވެ.

މާފުށްޓަކީ ލޯކަލް ޓޫރިޒަމް ނުވަތަ ގެސްޓްހައުސް ވިޔަފާރި ފުޅާދާއިރާއެއްގައި ކުރެވެމުން އަންނަ މީހުންދިރިއުޅޭ ރަށަކަށް ވާއިރު، ފަތުރުވެރިންގެ ފުށުން ނުވަތަ ގެސްޓްހައުސްތަކުން، ދިވެހިންގެ ދީނީ ޘަޤާފަތާއި ބީރައްޓެހި އަދި ދިވެހިރާއްޖޭގެ ޤާނޫނުތަކާއި ޤަވާޢިދުތަކާވެސް ޚިލާފު ޢަމަލުތައް މަދުންނަމަވެސް ދޭތެރެއަކުން ފެންމަތިވަމުން ދިއުމާއެކު އެފަދަ ޢަމަލުތަކާގުޅިގެން ފުލުހުން އަދާކުރަށްވާ ޤާނޫނީ ޒިންމާއާ މެދު ހިތްހަމަނުޖެހި މަދު ފަރާތްތަކުން ފުލުހުންނަށް އަމާޒުކޮށް ނުރުހުން ފާޅުކުރުމުގެ އިތުރުން ރަސްމީ އިދާރާތަކަށް ފުލުހުންގެ މައްސަލަ މީގެކުރިންވެސް ހުށައަޅިނަމަވެސް، ދާދިފަހުން ރައްޔިތުންގެ މަޖްލީހުން ނިންމެވި މިފަދަ މައްސަލައެއް ފުލުހުންނާ އެއްކޮޅަށް ނިމިފައި ވާކަންވެސް ފާހަގަ ކޮށްލެވެއެވެ.