އަވައްޓެރި ލަންކާގައި ކޮވިޑް-19 ޖެހިގެން މަރުވާ މުސްލިމުންގެ ހަށިތައް ރާއްޖޭގައި ވަޅުލައިދޭން ދިވެހިސަރުކާރުން ހުށައެޅުއްވި ހުށައެޅުން އަނބުރާ ގެންނަވައިފި ކަމަށް ލަންކާގެ ނޫސްތަކުން ރިޕޯޓުކޮށްފި އެވެ.
ލަންކާގެ މަޝްހޫރު އޮންލައިން ނޫސްތައްކަމުގައިވާ "ސަންޑޭ ޓައިމްސް" އާއި "ނިއުސް ސެންޓަރ" އިންވެސް މި ޚަބަރު މިއަދު ރިޕޯޓުކޮށްފައި ވާއިރު، އަސާސީ "މަޞްދަރު" ކަމުގައިވާ ސަންޑޭ ޓައިމްގައި ބުނެފައި ވަނީ، މި ހުށައެޅުމާ ގުޅިގެން އިތުރަށް ކުރިއަށް ނުދިއުމަށް ދިވެހި ސަރުކާރާއި އަދި ލަންކާ ސަރުކާރުންވެސް ނިންމަވާފައިވާ ކަމުގައެވެ.
ލަންކާގެ މުސްލިމުންގެ ހަށިތައް އެންދުމުގެ ބަދަލުގައި ރާއްޖޭގައި ވަޅުލުމާ ގުޅޭގޮތުން މަޝްވަރާ ކުރެވެމުން ދާކަން ހާމަކުރަށްވާފައި ވަނީ، ރާއްޖޭގެ ޚާރިޖީ ވަޒީރު ޢަބްދުﷲ ޝާހިދެވެ. އަދި އެކަމާ ގުޅިގެން ފޮރިން މިނިސްޓްރީން ނެރުއްވި ނޫސްބަޔާނެއްގައި، ސްރީލަންކާގެ ރައީސް ގޮތަބަޔާ ރާޖަޕަކްސާގެ އެ ހުށައެޅުއްވުމާ ގުޅިގެން ރާއްޖެއިން ވެދެވޭނެ އެހީތެރިކަމާ މެދު ކަމާބެހޭ ފަރާތްތަކާއެކު ރައީސް ޞާލިޙު މަޝްވަރާކުރަށްވަމުން ގެންދަވާކަން ހާމަކުރައްވާފައި ވެއެވެ.
އެހެންނަމަވެސް، މި މައްސަލާގައި ރާއްޖޭގެ ސިޔާސީ ފަރާތްތަކުންނާއި ދީނީ ޢިލްމުވެރިންވެސް އިންތިހާއަށް ޚިޔާލުތުވެ ބައެއްފަރާތްތަކުން ނުރުހުން ފާޅުކުރުމުގެ އިތުރުން، ރާއްޖޭގެ އެ ނިންމެވުން ބަދަލުކޮށްދެއްވުމަށް އެދި ސްރީލަންކާގެ މުސްލިމުން ތަމްސީލުކުރާ ގިނަ މަދަނީ ޖަމާޢަތްތަކުން ދިވެހި ސަރުކާރަށް ގޮވާލާފައި ވެއެވެ. އަދިހަމަ، ދުނިޔޭގެ ބޮޑެތި މީޑިއާތަކުންނާއި އަދި އިންސާނީ ޙައްޤުތަކަށް ވަކާލާތުކޮށް އަޑުއުފުލާ ބައިނަލް އަޤްވާމީ ޖަމާޢަތްތަކުންވެސް އެކަމާ ގުޅިގެން ލަންކާގެ ސަރުކާރަށް ބޮޑެތި ފާޑުކިޔުންތައް އަމާޒުކޮށްފައި ވެއެވެ.
މިކަންކަމުގެ ނަތީޖާއެއްގެ ގޮތުން، ކޮވިޑް-19 ބަލީގައި މަރުވާ މުސްލިމުންގެ ހަށިތައް އެންދުން ލަންކާއިން މިހިނދު "ހުއްޓާލާފައި" ވާއިރު، އެ ހަށިތައް ރާއްޖެ ގެނެސްގެން ވަޅުލުމާ ގުޅޭގޮތުން ދެޤައުމުން ކުރަމުން އައި މަޝްވަރާތައް ހުއްޓާލާފައި މިވާސަބަބަބީ، ދެ ޤައުމުގެ އިދިކޮޅު ސިޔާސީ ފަރާތްތަކުގެ އިތުރުން ބައިނަލް އަޤްވާމީ މުޖުތަމަޢު އިން ދެގައުމަށް ކުރިމަތިވީ ފާޑުކިއުންތަކާއި ކުރިމަތިކުރުވި ފިއްތުންތަކުގެ ސަބަބުން ދެޤައުމުގެ މަސްލަޙަތަށްވެސް ކޮށްފާނެ ނޭދެވޭ އަސަރެއްގެ ސަބަބުން ކަމަށްވެސް، ސަންޑޭ ޓައިމްސް ގައި ބުނެފައި ވެއެވެ.
ރާއްޖެއަކީ ސައްތައިން ސައްތަ އިސްލާމީ ޤައުމެއްކަމުގައި ވުމުންނާއި އަދި ސްރީލަންކާއާ އެންމެ ކައިރީގައި އޮތް އިސްލާމީ ދައުލަތަކީ ރާއްޖެކަމުގައި ވުމުން، ސްރީލަންކާގެ މުސްލިމުންނާމެދު ހިންގޭ ނޭއްގާނީ އަދި ލާއިންސާނީ ޢަމަލުތައް ހުއްޓުވުމުގައި ސަބަބަކަށް ވެވޭނެމަ އެކަން ކުރުމަކީ އިސްލާމީ މި ދައުލަތުގެ މައްޗަށް ލާޒިމުވާނެކަމެއްކަމާމެދު އެއްވެސް ޝައްކެއްނެތެވެ.
އެހެންނަމަވެސް، އެފަދަކަމެއް ކުރެވޭއިރު، އެޤައުމުގެ މުސްލިމުންނާ މަޝްވަރާކޮށް އެފަރާތްތަކުން ބޭނުންވާގޮތެއް އެޤައުމުގެ ސަރުކާރަށް ހުށައަޅައިގެން އެގޮތަކަށް ޢަމަލުކުރުމަށް ބާރު އެޅުމަށްފަހު އަދި އެފަދަ ކަމަކުން ނުކުމެދާނެ އެންމެހައި ނަތީޖާތަކަށް ރިޢާޔަތްކުރުމާއެކު މެނުވީ ދެޤައުމެއްގެ ދެމުދުގައި އެފަދަ ބޮޑުކަމެއް ނިންމިގެން ހިގައްޖެ ނަމަ، ދުރު މުސްތަޤުބަލަކަށް ވިސްނާއިރު މުސްލިމުންނާމެދު ނޭނގިތިބެ ނަމަހީވެސް ވެވޭ އިހާނެތިކަމަކަށްވެސް އެކަން ވެގެން ހިނގައިދާނެ ކަމަށް، ދެޤައުމުގެވެސް ބޮޑެތި ދީނީ ޢިލްމުވެރިންވެސް ފާހަގަކުރަށްވާފައި ވޭމެއެވެ.
