ދުނިޔެ ސިއްސުވާލި ކޮވިޑުގެ ރަނގަބީލުގެ އަޑު ރާއްޖެއިން މަޑުވާތީ އެކާމެދު އުފާކޮށް މާތްﷲ އަށް ހަމްދުކުރަށްވާކަމަށް ފަތުރުވެރިކަމާބެހޭ ވަޒީރު ޑރ. ޢަބްދުﷲ މަޢުޞޫމް ވިދާޅުވެއްޖެއެވެ.
ޑރ. މަޢުޞޫމް މިފަދައިން ވިދާޅުވެފައި މިވަނީ އިއްޔެގެ ވަގުތެއްގައި ކުރެއްވި ޓްވީޓެއްގައެވެ.
ކޮވިޑް-19 ގެ ރަނގަބީލުގެ އަޑު ރާއްޖޭގައި މަޑުވެގެން ދިޔަނަމަވެސް އެއަޑު އެއްކޮށް ނުކެނޑޭކަމަށާއި، އަދި ދުނިޔެއަށް ބަލާއިރު އެއަޑު ގަދަވަމުން ދާކަމަށްވެސް މިނިސްޓަރު މަޢުޞޫމުގެ މި ޓްވީޓުގައި ފާހަގަކުރަށްވާފައިވެއެވެ. އަދި، މާސްކުއެޅުމާއި ގައިދުރުކަން ބެހެއްޓުމުގެ އިތުރުން ގިނަގިނައިން އަތްދޮވުން ފަދަ ކަންކަން ކުރެއްވުމުގައި ސަމާލުވެތިއްބެމުމަށްވެސް ރައްޔިތުންނަށް އިލްތިމާސްކުރަށްވާފައި ވެއެވެ.
ކޮވިޑް-19 އަށް ފައްސިވަމުންދާ މީހުންގެ ޢަދަދު އިހުނާއަޅައި ބަލާއިރަށްވުރެ އިންތިހާއަށް ބޮޑުތަން ރާއްޖޭގައި މިހިނދު ވަނީ ދަށްވެފައެވެ. އަދި، ކޮވިޑް-19 އާ ގުޅިގެން އެއްކޮށް ހުއްޓުމަކަށް އައިސްފައި އޮތް ފަތުރުވެރިކަންވެސް ކުރީގެ ޙާލަތައް ރުޖޫޢަވަމުންދާތަން ފެންނަމުންދެއެވެ. މި ހަފްތާގައި ރާއްޖެއައި ފަތުރުވެރިންގެ އަދަދަށް ބަލާއިރު، ދުވާލެއްގެ މައްޗަށް 4000 އާއި 6000 ދެމެދުގައި ރިކޯޑުކުރެވިފައި ވޭމެއެވެ.
ރާއްޖޭގެ އިތުރުން ދުނިޔޭގެ ބައެއް ޤައުމުތަކުގައިވެސް ކޮވިޑް-19 ބަލި "ހަންމަތަ" ކުރެވިފައި ވާކަމަށް ޤަބޫލުކުރެވުނު ނަމަވެސް، އިނގިރޭސި ވިލާތުން ފެނިގެންދިޔަ ކޮވިޑް-19 ގެ އައު ވައްތަރު އެޤައުމުގައި އިންތިހާއަށް ހަލުވިކަމާއެކު މިހާރު ފެތުރެމުން ދާއިރު، ދުނިޔޭގެ އެހެން ޤައުމުތަކުންވެސް ކޮވިޑް-19 ގެ މިވައްތަރު ފެންނަން ފަށާފައި ވުމުން، މުޅި ދުނިޔެހެން އަނެއްކާވެސް މިވަނީ ނުތަނަވަސް ކަމެއްގެ ތެރެއަށް ވެއްޓިފައެވެ.
ކޮވިޑް-19 ގެ މި ނިއު ސްޓްރެއިން އިނގިރޭސި ވިލާތުގައި ފެތުރެމުން ދާތީވެ، ދުނިޔޭގެ އެންމެހައި ޤައުމުތަކަކުންހެން ވަނީ އެޤައުމުތަކަށް އިނގިރޭސި ވިލާތުން ދަތުރުކުރުން ހުއްޓާލާފައެވެ. އަދި ބައެއް ޤައުމުތަކުން ބައިނަލް އަޤްވާމީ ބޯޑަރުތައް އަނެއްކާވެސް އެއްކޮށް ބަންދުކޮށްފައި ވާކަންވެސް ފާހަގަ ކޮށްލެވެއެވެ.
