ދުނިޔެ ސިއްސުވާލި ކޮވިޑް-19 ގެ ރަނގަބީލުގެ އަޑު ރާއްޖޭގައި މަޑުވެގެން ދިޔަނަމަވެސް އެއަޑު އެއްކޮށް ނުކެނޑޭކަމަށާއި، އަދި ދުނިޔެއަށް ބަލާއިރު އެއަޑު ގަދަވަމުން ދާކަމަށް ފަތުރުވެރިކަމާބެހޭ ވަޒީރު ޑރ. ޢަބްދުﷲ މަޢުޞޫމް ވިދާޅުވެއްޖެއެވެ.
ޑރ. މަޢުޞޫމް މިފަދައިން ވިދާޅުވެފައި މިވަނީ އިއްޔެގެ ހެނދުނުގެ ވަގުތެއްގައި ކުރެއްވި ޓްވީޓެއްގައެވެ.
ރާއްޖޭގައި ކޮވިޑް-19 ގެ ޙާލަތު ހަންމަތަކުރެވެމުން ދިޔަނަމަވެސް، އެބަލިން އެއްކޮށް މިންޖުވެފައި ނުވުމާއި، ދުނިޔޭގެ މަޝްރަޙައް ބަލާއިރު އެބަލީގެ ޙާލަތައް އަންނަ ބަދަލުތަކާއެކު އަލުން އުފެދިފައިވާ ކަންބޮޑުވުންތައް އިތުރުވަމުން ދާތީވެ އެކަމާމެދު ސަމާލުވެ، ބަލިން ތިމާއާއި އަދި އެހެނިހެން މީހުންގެވެސް ރައްކާތެރިކަމަށްޓަކައި މާސްކުއެޅުމާއި ގައިދުރުކަން ބެހެއްޓުމުގެ އިތުރުން ގިނަގިނައިން އަތްދޮވުން ފަދަ ކަންކަން ކުރެއްވުމުގައި ސަމާލުވެތިއްބެމުމަށްވެސް، ޑރ. މަޢުޞޫމުގެ ޓްވީޓުގައި ރައްޔިތުންނަށް އިލްތިމާސްކުރަށްވާފައި ވެއެވެ.
ރާއްޖޭގެ އިތުރުން ދުނިޔޭގެ ބައެއް ޤައުމުތަކުގައިވެސް ކޮވިޑް-19 ބަލި "ހަންމަތަ" ކުރެވިފައި ވާކަމަށް ޤަބޫލުކުރެވުނު ނަމަވެސް، އިނގިރޭސި ވިލާތުން ފެނިގެންދިޔަ ކޮވިޑް-19 ގެ އައު ވައްތަރު އެޤައުމުގައި އިންތިހާއަށް ހަލުވިކަމާއެކު މިހާރު ފެތުރެމުން ދާއިރު، ދުނިޔޭގެ އެހެން ޤައުމުތަކުންވެސް ކޮވިޑް-19 ގެ މިވައްތަރު ފެންނަން ފަށާފައި ވުމުން، މުޅި ދުނިޔެހެން އަނެއްކާވެސް މިވަނީ ނުތަނަވަސް ކަމެއްގެ ތެރެއަށް ވެއްޓިފައެވެ.
ކޮވިޑް-19 ގެ މި ނިއު ސްޓްރެއިން އިނގިރޭސި ވިލާތުގައި ފެތުރެމުން ދާތީވެ، ދުނިޔޭގެ އެންމެހައި ޤައުމުތަކަކުންހެން ވަނީ އެޤައުމުތަކަށް އިނގިރޭސި ވިލާތުން ދަތުރުކުރުން ހުއްޓާލާފައެވެ. އަދި ޤައުމުތަކުގެ ބައިނަލް އަޤްވާމީ ބޯޑަރުތައް އަނެއްކާވެސް އެއްކޮށް ބަންދުކުރަމުން ގެންދާކަންވެސް ފާހަގަ ކޮށްލެވެއެވެ.
