މަސްވެރިންނަށް ދިމާވާ ދަތިތަކަށް އެކަށީގެންވާ ޙައްލެއް ނުލިބުމާއެކު އެކަންކަމަށް އަޑުއުފުލައި ދިވެހި މަސްވެރިން ފެލިވަރުގައި ކުރަމުން ގެންދާ މުޒާހަރާ "ހަންމަތަ" ކުރުމަށް އިތުރު ފުލުހުން ފެލިވަރަށް ހިނގައްޖެއެވެ.
ހަމަނުޖެހުންތައް ކޮންޓްރޯލް ކުރުމަށް ފުލުހުން ބޭނުންކުރަށްވާ ޝީލްޑް ފަދަ ޚާއްސަ އާލާތްތަކާއެކު ފުލުހުން މިހިނދު ފެލިވަރަށް އަރާފައިވާކަމަށް މިނޫހަށް މައުލޫމާތު ދެއްވި ތަފާތު މަޞްދަރުތަކުން މިނޫހަށް ކަށަވަރުކޮށްދީފައި ވެއެވެ.
އަދި، މިކަމާ ގުޅިގެން އިތުރު މައުލޫމާތު ސާފުކުރުމަށް މިނޫހުން ފުލުހުންނާ ސުވާލުކުރުމުން ފުލުހުންގެ މީޑިއާ އޮފިޝަލް ވިދާޅުވެފައި ވަނީ، ސްޕެޝަލް ގިއަރސް އާއެކު އިތުރު ފުލުހުން ފެލިވަރަށް ނުދާކަމަށެވެ.
"ނަމަވެސް އިތުރު ފުލުހުން އެކޮޅުގައި މިހާރު ހަރަކާތްތެރިވަމުންދަނީ"
އިތުރު ފުލުހުން ފެލިވަރަށް ގޮސްފައިވާކަން ކަށަވަރުކޮށްދެއްވަމުން ފުލުހުންގެ މީޑިއާ އޮފިޝަލް ވިދާޅުވިއެވެ.
ފުލުހުން ފެލިވަރުގެ ޖެޓީ ކޯޑަން ކޮށްފައި ވަނިކޮށް މަސްވެރިން ވަނީ ފުލުހުންގެ ސަފު ފަހަނައަޅައި ރަށުތެރެއަށް އަރާފައެވެ. މާބޮޑު ހަމަނުޖެހުމެއް މިހާތަނަށް ހިނގާފައި ނުވިނަމަވެސް، 100 އެއްހައި މަސްވެރިން މިހިނދުވެސް ފެލިވަރުގައި އިޙްތިޖާޖުކުރަމުން އެބަގެންދެއެވެ.
މިއަދުގެ ވަގުތެއްގައި ފެލިވަރުގައި މަސްވެރިން ކުރަންފެށި މި އިޙްތިޖާޖުގައި މަސްވެރިން ކުރަމުން ގެންދާ ޑިމާންޑަކީ ރައީސް ޞާލިޙު މަސްވެރިންނާ ބައްދަލުކުރެއްވުމުގެ "ޑިމާންޑް" ކަންވެސް ފާހަގަކޮށްލެވެއެވެ.
