ކްރިސްމަސް ފާހަގަކުރުމުގެ ގޮތުން އެރަށުގައި އެއްވެސް ޙަރަކާތެއް ހިންގުމަކީ މަނާކަމެއްކަމަށާއި، އެފަދަ ކަމެއް ހިންގާނަމަ އެކައުންސިލުން އެކަމެއް ހުއްޓުވާނެކަމަށް އއ. މަތިވެރި ކައުންސިލުން ރަސްމީކޮށް ހާމަކޮށްފިއެވެ.
މަތިވެރި ކައުންސިލުން މިކަން ހާމަކޮށްފައި މިވަނީ އެކައުންސިލުން މިއަދު ޢާންމުކުރެއްވި ރަސްމީ އިޢުލާނެއްގައެވެ.
ލޯކަލް ޓޫރިޒަމް ތަރައްޤީވަމުން އަންނަ އަތޮޅެއް ކަމުގައިވާ އަލިފު އަތޮޅުގެ އުތުރުބުރީ މަތިވެރި ކައުންސިލުގެ މި އިޢުލާނުގައި ސަބަބެއްގެ ގޮތުގައި ބަޔާންކޮށްފައި ވަނީ، ދިވެހިރާއްޖެއަކީ ސައްތައިން ސައްތަ އިސްލާމީ ޤައުމަކަށްވެފައި "ކްރިސްމަސް" ފަދަ ޣައިރު ދީންތަކުގެ ޢީދުތަކަކީ އިސްލާމް ދީނާއި ރާއްޖޭގެ ޘަޤާފަތާއި އާދަކާދަޔާ ނުގުޅޭ ޙަރަކާތްތަކަކަށްވާތީ މީހުން ދިރިއުޅޭ އެއްވެސް ރަށެއްގައި ކްރިސްމަސް ފާހަގަކުރުމަކީ ދިވެހިރާއްޖޭގެ ޤާނޫނުތައް ތަންދޭ ކަމެއް ނޫންކަމެވެ.
"މިދެންނެވިފަދަ އެއްވެސް ޙަރަކާތެއް ހިންގުމަކީ މަނާކަމެއްކަމުގައި ދަންނަވަމެވެ. އަދި މިފަދަ ޙަރަކާތެއް މިރަށުގައި ހިންގާކަމުގެ މަޢުލޫމާތު މިކައުންސިލަށް ލިބިއްޖެނަމަ، އެކަންކަން މިކައުންސިލުން ހުއްޓުވާނެކަމުގައިވެސް ދަންނަވަމެވެ"
ކްރިސްމަސް ފާހަގަކުރުމަށް ހިންގާ ޙަރަކާތެއް އެކައުންސިލުން ހުއްޓުވާ ހިނދު ދިމާވެދާނެ އެއްވެސްކަމެއްގެ ޒިންމާ އެކައުންސިލުން ނުނަގާނެ ކަންވެސް ހާމަކޮށްފައިވާ އެ އިޢުލާނުގައި ވެއެވެ.
"ކްރިސްމަސް" ފާހަގަކުރުން ފަދަ ޣައިރު ދީންތަކުގެ އިޙްތިފާލުތައް ފާހަގަކުރުމަކީ ނުރައްކާތެރިކަން އިންތިހާއަށް ބޮޑު އަދި ނޭގި ނަމަވެސް ޝިރުކުގެ ނުބައި ފާފައިގެ ތެރެއަށް ވަދެގެންދާނެ ޢަމަލުތަކެއްކަމަށް ވީހިނދު، އެފަދަ ކަންކަމުން ދިވެހި އުންމަތުގެ އެންމެހައި ލޮބުވެތި މުސްލިމު އަޚުންނާއި އުޚްތުން ދުރުވެ ރައްކާތެރިވެ ތިއްބެވުމަށް، ރާއްޖޭގެ އެންމެހައި ދީނީ ޢިލްމުވެރިން ނިސްބަތްވެވަޑައިގަންނަވާ "ޢިލްމުވެރިންގެ ގުޅުން" ކޯލިޝަނުން ދާދިފަހުން އިލްތިމާސް ކުރަށްވާފައި ވޭމެއެވެ.
އަދި، އިސްލާމްދީނަށް ޙުރުމަތްތެރިކޮށް ހިތުމަށް މާތް ﷲ ގަންދީ ހުވާކުރައްވައި އެހުވާގެ މަތީގައި ދައުލަތް ހިންގެވުމާއި ދައުލަތުގެ އެކިއެކި މަޤާމުތަކާ ޙަވާލުވެގެން ތިއްބެވި އަދި އެމަތިވެރި ޒިންމާ އެބަޔަކާ މަތިކުރެވިގެންވާ ފަރާތްތަކާއި ސަލާމަތީ ބާރުތަކާ ޙައިސިއްޔަތު ލިބިގެންވާ މުއައްސަސާތަކުގެ ވެރިންނާއި މުވައްޒަފުންނަކީ "ކްރިސްމަސް" ފަދަ ދީނާ ޚިލާފު ކަންކަން ޢަމަލީގޮތުން ހުއްޓުވުމުގެ ބާރުލިބިގެންވާ ފަރާތްތައް ކަމަށްވާއިރު އެކަންކަން ޢަމަލީގޮތުން ހުއްޓުވުމުގެ ޒިންމާ ފުރިހަމައަށް ނެންގެވުމަށްވެސް، ޢިލްމުވެރިންގެ މި ބަޔާން ނިންމަވާލައްވަމުން ވެރިންނަށާއި ސަލާމަތީ ބާރުތަކަށްވެސް އިލްތިމާސްކުރަށްވައި ގޮވާލަށްވާފައި ވާކަންވެސް ފާހަގަކޮށްލެވެއެވެ.
