މިޔަރުގެ ސަބަބުން ލިބޭ ގެއްލުން ދަނީ އިތުރުވަމުން ކަމަށާއި ކިތަންމެ ދުވަހަކު 50 ކިލޯ ބަރުދަނުގެ ކަންނެލި އެބަ ކާލާކަމަށް ބުނެ ބޮޑުކަންނެލީގެ މަސްވެރިންގެ ޔޫނިއަންއިން ކަންބޮޑުވުން ފާޅުކޮށްފިއެވެ.
ބޮޑުކަންނެލީގެ މަސްވެރިންގެ ޔޫނިއަނުން ކަންބޮޑުވުން ފާޅުކޮށްފައި މިވަނީ، ޅ. އަތޮޅުގެ ކަނދުފައްޗެއްގެ ކައިރީގައި މިއަދު މަސްބާނަމުން ދިޔަ ދޯންނަކުން މޫދަށް ވެއްޓުނު މަސްވެރިއެއް ހަމަ ވެއްޓުމާއެކު އޭނާގެ ގައިގާ މިޔަރު ހިފައި ބޮޑެތި ޒަހަމްތަކެއް ލިބި ނުރައްކާތެރި ޙާލަތަކަށް ދިއުމުގެ ސަބަބުން ކުއްލި ޙާލަތުގައި ނައިފަރަށް ގެންދެވި އިތުރު ފަރުވާދެވެމުންދާ ދަނޑިވަޅެއްގައި ދާދި ދެންމެ ކުރި ޓްވީޓެއްގައެވެ.
ކަނޑަށް ވެއްޓުނު މަސްވެރިޔަކަށް މިޔަރެއްގެ ހަމަލާ، އަވަސް ފަރުވާއަށް ގެންދަނީ, މިޔަރުގެ ސަބަބުން ލިބޭ ގެއްލުން ދަނި އިތުރުވަމުން، ކިތަންމެ ދުވަހަކު 50 ކިލޯގެ ކަންނެލި މެދުން ކަލާ އެބަ! https://t.co/A5EyFEZnzh
— Bodu Kanneli Masveringe union (@FishermensUnion) December 24, 2020
މިޔަރުގެ މަސްވެރިކަމަކީ މީގެ ކުރިން ރާއްޖޭގައި ކުރެވެމުން އައި މަސްވެރިކަމެއް ނަމަވެސް މިހިނދު އެކަން މަނާކޮށްފައިވުމުން މިޔަރުތަކާ ހުރެ މަސްވެރިކަން ކުރުމަށް އުނދަގޫތައް ކުރިމަތިވަމުން އާދެއެވެ. ބުރަ މަސައްކަތާއެކު މަސްވެރިން ބާނަމުންދާ ބޮޑެތި ގޮދާ ފެނުން މައްޗަށް ހެޔޮކޮށް ނުކެނޑެނިސް ކާލުމާއި، ބާނައިގެން ދޯންޏަށް ނަގަން ގެންނަ ބޮޑެތި ކަންނެލީގެ މެދުން ބައެއް ކާލުމުގެ އިތުރުން މަސްވެރިންނަށް ޙަމަލާދިނުމުގެ ޙާދިސާތަކާވެސް މަސްވެރިން ކުރިމަތިލާން ޖެހުން މިހާރު އިތުރުވަމުން ދާކަން ފާހަގަކޮށްލެވެއެވެ.
