ސޯޝަލް މީޑިއާ ނުވަތަ އިޖްތިމާޢީ މަންސަތަކާއެކު ބައެއް ނޫސްވެރިން ނޫސްވެރިކަމަށް ގެނުވި ކަންނެތްކަން ދޫކޮށްލަންޖެހޭކަމަށް އިންފޮމޭޝަން ކޮމިޝަނަރު ޙަސަން ފިޔާޒް މޫސާ ވިދާޅުވެއްޖެއެވެ.
ދައުލަތުގެ އިދާރާތަކުން މައުލޫމާތު ހޯދައި ލިބިގަތުމުގެ ފުރުޞަތު ފަހިކޮށްދިނުމަށް ހެދިފައިވާ ޚާއްޞަ ޤާނޫނެއްގެ ދަށުން ޤާއިމުކުރެވިފައިވާ އިންފޮމޭޝަން ކޮމިޝަނަރ މިފަދައިން ވިދާޅުވެފައި މި ވަނީ، ނޫސްވެރިން ޓްވީޓުން ޚަބަރު ހަދަމުން ގެންދާތީވެ އެކަމާމެދު ރައީސް ޞާލިޙް ކަންބޮޑުވުން ފާޅުކުރަށްވައި ދެއްކެވި ވާހަކަފުޅަށް އިޝާރާތް ކުރަށްވައި، އިއްޔަ ހެނދުނު ކުރެއްވި ޓްވީޓެއްގައެވެ.
އިންފޮމޭޝަން ކޮމިޝަނަރުގެ މި ޓްވީޓާއެކު ނޫސްވެރިންނާ ޢާންމުންގެވެސް ފާޑުކިޔުންތަކާއި ހިތްހަމަ ނުޖެހުންތައް އޮއްސާލާފައި ވާއިރު، ފިޔާޒުގެ ވާހަކައަށް ބައެއް ފަރާތްތަކުން ތާޢީދުކުރަށްވާފައި ވާކަންވެސް ފާހަގަކޮށްލެވެއެވެ.
"ތިހެން ބުނާއިރު ދައުލަތުގެ މުއައްސަސާތަކުން ނޫސްވެރިންނަށް މައުލޫމާތު ހޯދާން ދާން މިޖެހެނީ ކޯޓަށް. އިންފޮމޭޝަން ކޮމިޝަނާއި ކޯޓަށް ދާއިރުވެސް މިއުޅެނީ މައުލޫމާތު ނުދީގެން. އެޙާލަތުގައި ޚަބަރު ހޯދޭނެ ގޮތަކީ އެއީކަމަށްވާތީވެ އެގޮތަށް ޚަބަރު އެ ލިޔަނީ"
ކުރިން "ވަންއޮންލައިން" ގައި މަސައްކަތްކުރި ނޫސްވެރިއެއްކަމުގައިވާ ޢާއިދާ ޢަބްދުލް ޙަކީމް ފިޔާޒުގެ ޓްވީޓަށް ރައްދުދެމުން ކޮށްފައިވާ ޓްވީޓުގައި ބުނެފައި ވެއެވެ.
ވެރިކަންކުރާ މައި ޕާޓީ އެމްޑީޕީ އުފެއްދުމުގައިވެސް އިސްކޮށް މަސައްކަތް ކުރެއްވުމުގެ އިތުރުން އެޕާޓީއާއި ރައީސް ނަޝީދުގެ ސަރުކާރުގެ އިސްމަޤާމުތަކެއްވެސް ފުރުއްވާފައިވާ ފުރަހަނި ޝުޢައިބުވެސް ވަނީ ފިޔާޒުގެ ޓްވީޓަށް ރައްދުދެއްވާ މޭރުމަކުން ޓްވީޓުތަކެއް ކުރަށްވާފައެވެ.
މީހަކު ކޮށްލާ ޓްވީޓަކުން އެމީހަކަށް މިއަދު ޖަލު ޖަޤީންވާކަމާއި، އެމީހެއްގެ ސޯޝަލް މީޑިއާގެ ހަރަކާތްތަކަށް ބަލާފައި ޤައުމުތަކަށް އަރާފައިބާ ވިސާ ދޫކުރާކަމާއި އަދި ވަޒީފާ ދިނުމުގައިވެސް އޭނާގެ ސޯޝަލް މީޑިއާގެ ޢަމަލުތަކަށް ބަލާކަން، ފިޔާޒަށް އެނގިލައްވާ ތޯ ޝުޢައިބު ކުރެއްވި ޓްވީޓެއްގައި އައްސަވާފައި ވޭމެއެވެ.
ފިޔާޒުގެ ވާހަކަތަކަށް ތާޢީދުކޮށްވެސް ބައެއް ފަރާތްތަކުން ވާހަކަދައްކާފައިވާއިރު އެފަދަ އެއްފަރާތަކީ ރައްޔިތުންގެ މަޖްލީހުގެ ވެލިދޫ ދާއިރާގެ މެންބަރު މުޙައްމަދު ޢަބްދުﷲ ޝަފީޤެވެ.
"ރަނގަޅު ވާހަކައެއް! ކަން ހިނގިގޮތް ބެލުމެއްނެތި، މައުލޫމާތު އޮޅުންފިލުވުމެއްނެތި، އޮފީސްތަކުން ފޮނުވި ފެކްސްއަކީ ޚަބަރުކަމުގައި ބެލި ޒަމާނެއްވެސް ދިޔަ"
ފިޔާޒުގެ ވާކަތަކަށް ތާޢީދުކުރެއްވުމުގެ އިތުރުން ނޫސްވެރިކަން ކުރިން އޮތް ޙާލަތަށް އިޝާރާތްކުރަށްވައި މެމްބަރު ޝަފީޤު ކުރެއްވި ޓްވީޓުގައި ވިދާޅުވެފައި ވެއެވެ.
ދައުލަތުގެ އިދާރާތަކާ މުޢާމަލާތް ކުރެވުމުގެ ރަސްމީ މަގަކީ އިޖްތިމާޢި މަންސަތަކެއް ނޫނެވެ. އެހެންނަމަވެސް ޒަމާނީ ޓެކްނޮލޮޖީއާއި އިންޓަރނެޓް ފަދަ ކަންކަން ކުރިއަރައި ޢާންމުވެފައިވާ މިންވަރާއިވެސް އެކު، ޚުދު ރަސްމީ އިދާރާތަކާ ރަސްމީ ހައިސިއްޔަތުން މުޢާމަލާތްކޮށްގެން ނަތީޖާ ނުނެރެވޭ ކަންކަމުގައި ޓްވީޓެއް ކޮށްލުމުން ނަތީޖާ ޙާޞިލުވަމުން ދާކަމީވެސް ޤަބޫލުކުރަންޖެހޭ ހަގީގަތެކެވެ.
ރަސްމީ އިދާރާތަކުގެ މީޑިއާ ގްރޫޕްތަކުގައި ނޫސްވެރިން ސުވާލުކޮށްގެން ތިބޭތާ ގަޑިއިރުތައް ވެގެން ދާއިރުވެސް މީޑިއާ އޮފިޝަލް "ކަހާތަން ހިރުވާވެސް ނުލައި" ހުރެދާއިރު، މުއްސައްސާގެ ވެރިންގެ ފަރުދީ ޓްވިޓަރ އަތްގަނޑުތަކުން އެމަޢުލޫމާތެއް ނޫސްވެރިން ސްކިޕް ކުރެއްވުމަށްފަހު ސީދާ ޕަބްލިކަށް ދޫކޮށްލައްވާ ފަހަރުތައް "މަދުން" ނަމަވެސް އަންނަކަންވެސް ފާހަގަކޮށްލެވެއެވެ.
