ދިވެހި މިކުޑަކުޑަ، އެހެނަސް މިނިވަން މުސްލިމު މިދައުލަތަށް ދިމާވެފައިވާ އެންމެ ބޮޑު ގޮންޖެހުމާއި ނުރައްކަލަކީ، މިކުޑަކުޑަ މުޖުތަމަޢުގެ ތެރޭގައި މިއަދު އުފެދިފައިވާ ސިޔާސީ ވާދަވެރިކަމާއި ހަލަބޮލިކަމެވެ. ތިމާމެން ތާއީދުކުރާ ފިކުރެއް ކުރިއަރުވައި، ބޭނުންވާ މަޞްލަޙަތުތައް ޙާޞިލުކުރުމަށް ކުރަމުންދާ މަސައްކަތްތައް ކުރިއަށްދަނީ ފަތުއަޑުކިޔާފައެވެ.
ވާދަވެރި ޒިންމާދާރު ސިޔާސީ ގިޔުގަނޑުން ބޭރުވެ، އެބަޔަކަށް ކުރެވުނުކަމެއް ކޮށްގެންނަމަވެސް ބޭނުންވާ މަޤްޞަދެއް ޙާޞިލުކުރުމުގެ ޘަޤާފަތަކާއި ހަމައަށް މިވަނީ ވާޞިލުވެފައެވެ. އިޤްތިޞާދީ ބަހުރުވައަކުން ބުނާނަމަ، "އޮޕަރޗިއުނިޓީ ކޮސްޓް" އަށް ކުޑަކޮށްވެސް ވިސްނާލުމެއް ނެތިއެވެ. އިނގިރޭސި ބަހުރުވައިން ބުނާނަމަ ކޮންމެކަމެއް "ކޮމްޕްރޮމައިޒް" ކޮށްގެންވިއަސް ވަރިހަމައެވެ. ދިވެހި މުސްކުޅި ނުވަތަ މިޘާލު ބަހުން ބުނާނަމަ "ޙަރާމްޖާދާ" ހެދިގެނެވެ.
މި ޟަޢީފު ގައުމުގެ ކުޑަ މުޖުތަމަޢުގެ ތެރޭގައި އަށަގެންފައި މިވާ "ސިޔާސީ ޑަރޯގާ" މިވަނީ އެހެން ހަރުފަތަކާއި ހަމައަށްވެސް ވާޞިލުވެފައި ކަމީ، އަދި އިންތިހާއަށް ނުރައްކަލުގެ ރަނގަބީލެކެވެ. ގާދޫކޮލުން ބޭރަށް ނުހަނު ބާރަށް ދެމެމުންދާ އޮއިވަރުގެ އަޑު އިވޭނަމައެވެ. އިސްލާމް ދީނުގެ ހިދާޔަތުގެ މަތިވެރި ނިޢުމަތާއި، ގެއްލިގެން ދިއުމުން މެނުވީ އަގުވަޒަން ނުކުރެވޭނެ މިނިވަންކަން ބޭރުއޮއިގައި ދެމެމުންދާ އަޑު އިވޭނަމައެވެ.
ތަފާތު އެކިއެކި މަންތަރުތައް ރޭވިގެން "އަޑީދައުލަތް" ތަށް ރުކުރުވާލުމަށް "ހަރުކަށި" އަދި "މަޑުކަށި" ފިކުރުތައް "ނޫކަށި" ތަކުގެ ތެރެއަށް ފާއްދާލުމަށް ރެޔާއި ދުވާލު ކެނޑިނޭޅި އެތެރެއިން ކުރަމުން ގެންދާ މަސައްކަތްތަކެވެ. އަމިއްލަ އާރެއް ބާރެއް އަދި ފުދުންތެރިކަމެއް ނެތް މިކުޑަކުޑަ ދައުލަތް، ބިޔަ ބޮޑެތި ދައުލަތްތަކުގެ މަދަދަށް އެދެންޖެހި ދިއްކޮށްލާ އަތުގައި ހިފަން އެއުރެން އެއް އަތް ދިއްކޮށްލާ ހިނދު އަނެއްއަތުން "ޖަހައިގަންނަން" އުޅޭ އެތީގެ ބޮޑުކަމާއެވެ.
ކަމުގެ ހަގީގަތް ނޭނގިނަމަވެސް އެކަމާއި އުފާ ފާޅުކޮށް އަތްޖަހައި "ދެފައި އެއްތާކުނުޖަހައި" އެއްބަޔަކު ދުވަމުންދާއިރު، އަނެއްބަޔަކު މިވަނީ "ދަތްދޮޅީގައި އަތްވިދި" ބޮޑުވާއިނގިލި އަނގަޔަށް ވަންނަ ހިސާބުގައެވެ.
އަޅުގަނޑުގެ ގަލަން "ފިރުކާލަން" ފެށި މަޤްޞަދަކީ، އެއްބަޔަކާއި ދިމާލަށް "ލާދީނީ" އޭ ގޮވުމެއް ނޫނެވެ. ނުވަތަ އެނެއްބަޔަކީ، "އަނިޔާވެރި" "ކޮރަޕްޓް" ބަޔެކޭ ބުނުމެއްވެސް ނޫނެވެ. ނުވަތަ ވަކި "ކަށްޓެއް" ހަރުކޮށް އެހެން ކަށިތައް މަޑުކޮށް ހެދުމެއްވެސް ނުމެ ނޫންމެއެވެ. ނުހަނު ނާޒުކު އަދި އެހާމެ ނުރައްކާތެރި ފައްތަރަކަށް މި ލޮބްވެތި ވަޠަން ގޮސްފައިވުމީ، އަޅުގަނޑަށް ލިބިފައިވާ ޚިޔާލު ފާޅުކުރުމުގެ މިނިވަންކަމާއި، އެނގިފައިވާ ކުޑަމިންވަރު ބަޔާންކޮށްދިނުން މަޖުބޫރުކުރި ކަމަކަށް ވީހިނދުއެވެ.
އެމްޑީޕީއަކަސް، ޕީޕީއެމަކަސް، ޖޭޕީއަކަސް، އަދި ޢަދާލަތު ޕާރޓީއަށް ނިސްބަތްވާ ރައްޔިތަކަސް، ތިޔަ ލޮބުވެތި އަޚާ ނުވަތަ އުޚްތަކީ ދިވެހި ދަރިއެއް ނޫންތޯއެވެ. މުސްލިމު ދަރިއެއް އެއް ނޫންތޯއެވެ. ސިޔާސީ އެއްވެސް ފިކުރަކަށް ނިސްބަތްވުމުގެ ކުރިން ތިޔަ އުޚްތާ ނުވަތަ އަޚާ ނިސްބަތްވީ ދިވެއްސަކަށް ނޫންހެއްޔެވެ. ވެގެންދިޔައީ މުސްލިމަކަށް ނޫންހެއްޔެވެ.
އަދި މި ދިވެހި ދައުލަތް، މިއަދާއި ހަމައަށްވެސް ރައްކާތެރިކަމާއި ކާމިޔާބާއެކު ދެމިގެންދިޔުމުގެ އެންމެބޮޑު ސިއްރަކީ މާތްވެގެންވާ އިސްލާމް ދީން ނޫންތޯއެވެ.
އާދޭހެވެ! މިޤައުމަށް ލިބިފައިވާ އެންމެ ބޮޑު ނިޢުމަތަކީ އިސްލާމް ދީންކަން ކަށަވަރެވެ. ޢަޞަބިއްޔަތުގެ ގޮވުންތަކާއި ހަވާނަފްސުގެ އެދުންތަށް ހިނދުކޮޅަކަށް ނަމަވެސް ދުރައްޖައްސާލައި، މާތް ﷲ ދެއްވި ބުއްދީގެ މަތިވެރި ނިޢުމަތުގެ ބޭނުންހިފައި ވިސްނާލުން ކިއެއްތޯއެވެ. ވިސްނާލީމުހެއްޔެވެ. ދިވެހި މުސްލިމް އެންމެހައި ލޮބުވެތި އަޚުންނާއި އުޚްތުންނޭވެ. ވިސްނާށެވެ. އަދިވެސް ވިސްނާށެވެ.
ތިމާ ނިސްބަތްވާ ސިޔާސީ ފިކުރަކަށް މަދަދުވެރިވެ ނަސްރުދޭ ކޮންމެ ކަމަކާއި އަދި ބަޔަކާއި މެދު، އެކަމެއްގެ އާޚިރު މަޤްޞަދަކީ ނުވަތަ ނަތީޖާއަކީ ދީނާއި ނުވަތަ މިނިވަންކަމާ ފުށުއަރާ ކަމަކަށްވިޔަސް، ކޮނޑު ހުޅުން ނެއްޓޭވަރަށް ހަމަ "އަތްޖަހައި"، "ޕެކޭޖަކަށްފަހު ޕެކޭޖެއް" ހުސްވަމުން ދާއިރުވެސް މަދަދުދީ، ލައިކްޖަހައި ޝެއާރކޮށް ރީޓްވީޓް ކުރަށްވަމުން ތިޔަގެންދަވަނީ، މާތް ﷲ ދެއްވި ބުއްދީގެ މަތިވެރި ނިޢުމަތުގެ މައްޗަށް ހަވާނަފްސުގެ ގޮވާލުންތަކާއި އެދުންތަށް ވެރިވެގެންފައިވާ މިންވަރުނޫން ދެން ކޮންކަމަކާއިހުރެ ތޯއެވެ.
ޖެހިފައިވާ، ކޮވިޑް19 އަށް ވުރެވެސް ނުރައްކާތެރި "ސިޔާސީ ޑަރޯގާ" ގެ ބޮޑުކަމުން، އިސްލާމްދީނުގެ ނިޢުމަތުން މަޙްރޫމުވެގެން ހިނގައިދާނެ ފަދަ ޢަމަލެއް ކުރެވޭކަމުގެ އިޙްސާސްވެސް ނުކުރެވި އުޅެނިކޮށް، އިސްލާމްދީނުގެ ހިދާޔަތު ލިބުމުގެ މަތިވެރި ނަސީބުން އަޅުގަނޑުމެން މަޙްރޫމް ވެގެން ހިނގައިދާނެ ކަމާއިމެދު އެއްވެސް ވަރަކަށް ވިސްނާލީމުހެއްޔެވެ.ނުވިސްނޭ ކަމުގައި ވަނީނަމަ، ލޮބްވެތި އަޚާއެވެ.. އުޚްތާއެވެ. މިހިނދުން މިހިނދަށް، ވަގްތުން ވަގުތަށް އަދި ރަނުން ރަނަށް، ވިސްނަވާށެވެ. މިއަދު އަދި ވަގުތު އެބައޮތެވެ. މާދަމައަށް މަޑުނުކުރަށްވާށެވެ.
ތަފާތު ސިޔާސީ ފިކުރުގެތެރެއިން، ތަފާތު އެކި އެދުންތަށް ޙާޞިލުކުރުމަށް މަސައްކަތް ކުރިކަމުގައި ވިއަސް، އެފަދަ ކަންކަމުގެ ތެރެއިންވެސް އަޅުގަނޑުމެންނީ "ރެޑްލައިން" ނުވަތަ "ރަތް ރޮނގު" ން ކަނޑައެޅިފައިވާ އިންފާހަގަ ހުރަސްކޮށްދާ ބައެއްކަމުގައި ނުވަމާހެއްޔެވެ.
ބަވަނަަވެފައިވާ އަދުގެ ދުނިޔޭގައި ދެމެމުންދާ ގަދަފަދަ އޮއިވަރާއި ހުރެވެސްމެ، "ދީނީ މިނިވަން" ގެ ކެހިވެރި މަޅީގައި ޖެހެވިއްޖެނަމަ، ވެގެންދާނީ ދެބުޅާފެހި މީދަލަށް ވީވަރެވެ. އިސްލާމް ދީނެއްވެސް އަދި ޤައުމުގެ މިނިވަންކަމެއްވެސް އަތުނުވާނެކަން ކަށަވަރުވެސް މެއެވެ.
One Response
ވަ ރަށް ޢިބު ރަތްތެ ރި ސަޅި ލިއުމެއް….