އިންތިޚާބުތަކާއި ދިމާކޮށް ސިޔާސީ ފަރާތްތަކުން ވާ ވަޢުދުތަކީ ނުފުއްދޭ ކަންކަމަށް ވެދިޔަނަމަވެސް އެއުރެންނަށް ލިބިގެންވާ "ހަކުޅި ކުރިއަށް" ކުޅުމުގެ ޤާބިލުކަމުގެ ސަބަބުން ރައްޔިތުންގެ ލޮލުގައި ތަކުރާރުކޮށްވެސް "އަނދުން" އެޅުވިގެން ދާކަމީ ހަގީގަތެއްކަމަށް ބައެއްފަހަރު ޤަބޫލުކުރަން މަޖުބޫރު ނޫންހެއްޔެވެ.
އެއް ހޮރަކުން ތިންހަތަރު ފަހަރަށްވެސް ކަށި ޖެހިތަނުން ނަގާ ދިލައިގައި އަތް އަޅައިގެން ހުރެމެ، މުއުމިނެއްގެ ގަޔަކަށް އެއް ހޮރަކުން ދެފަހަރަށް ކަށި ނުޖެހޭނެކަމަށް ބުނުމަކީ ވެސް ސިޔާސީ މައިދާނުގައި ރިޔާސީ ލީޑަރުންގެ ފުށުން އިވި ބާވެފައިވާ އަޑެއްނަމަވެސް، ނަބަވީ އިރުޝާދު ބުނެވިފައިވާ އެބުނެވުން ދޮގެއް ނުވާނެއެއެވެ. އަދި އެއުރެން ދީން ސިޔާސަތަކަށް ހަދަނީ ކަމުގައި މެނުވީ ހަމަ ނުވާނެއެވެ.
އައްޑޫ ރައްޔިތުން ނެރެމުންދާ "ހަތެއް ސުމެއް" ނަތީޖާއަކީ އެރައްޔިތުން އަމިއްލައަށް ބައިކޮޅަށް ޖަހާ ގޯލުތަކެއް ނޫންހެއްޔޭ ހިތަށް އަރާވަރަށް އެރައްޔިތުންވެސް ކޮންމެ އިންތިޚާބަކާ ދިމާކޮށް އެބަ "ގުނބޯ" ހެއްދޭ ނޫންހެއްޔެވެ. މާލޭގެ ޢިއްޒަތްތެރިން ޒަމާނުއްސުރެ ބުނެއުޅެމުންދާ ބަހެއްކަމުގައިވާ، ރާއްޖެތެރޭ މީހުންގެ "ފަސް ކުޅަނދު" މަދުވާނޭ ބުނެވޭ ބީދައިން ވާކަމެއްކަމުގައި ބަލައި ކުރިއަށް ދަމާހެއްޔެވެ.
މަސްވެރި ޕްލެޓް ފޯމުތަކާއި ގޭދޮށު މަސްފެކްޓްރީގެ ޒަރީޢާއިން ސީދާ މަސްވެރިންގެ ޖީބަށް ޑޮލަރު ވަންނާނެކަމުގެ "ދަޅަ" ދެއްކުނުނަމަވެސް، އެންމެފަހުން ބޭއްވުނު މަސްވެރިންގެ ދުވަހުގައި ގުޅީފަޅުގެ އިތުރުން ދާދިފަހުން ފެލިވަރާއި އިހަވަންދޫގައިވެސް މަސްވެރިން އުފުލާފައިވާ އަޑުތަކާއި ބަންޑުން ކޮށްލާފައިވާ އުދާސްތަކުން އިވިގެންދިޔައީ، މަސްވެރި ޕްލެޓް ފޯމުތަކުގެ ގޮތުގައި ފެލިވަރު ބޭރުގައި ފައްތިޔާ ޖަހައިގެން ހަފްތާ ދެހަފްތާ ތިބުމަށްފަހު ލިބޭ ކިޔުނަމްބަރަށް، ބޭނި ވިހި ތިރީސް ޓަނުގެ މަހުން ހައެއްކަ ޓަނު މަސް ކިރުވާލުމަށްފަހު ރަށަށް އައިސް "ގޭ ދޮށު މަސްފެކްޓަރީ" އަށް 6 ރުފިޔާއަށް މަސްކިރާލާ ވާހަކައެވެ.
މާފުށީގެ ހޮޓަލެއްގެ ބޭރު "ޑެކޯރޭޓް" ކޮށްލުމަށް ބެހެއްޓުނު "ގަހެއް" ކޯޓު އަމުރެއްގެ ދަށުން ފުލުހުންގޮސް "އުފުރާލުމާ" ގުޅިގެން ރާއްޖޭގެ ފަތުރުވެރިކަން ފުލުހުން "ފުނޑާލަނީ" ކަމަށްބުނެ ބަޔަކު ކަންބޮޑުވުން ފާޅުކޮށްފައި ވަނިކޮށް، ޝައިޚަކު ޓީވީއަށް އަރައި ޒައްޤޫމް ގަހަށްވުރެވެސް އެގަސް ނުބައިވެއްޖެކަމަށް ބުނެވިގެން ކަންބޮޑުވުން ފާޅުކުރަށްވައި ހިތާމަކުރަށްވައި ހެއްދިވިތާ ދުވަސްކޮޅެއް ނުވެ އުޅެނިކޮށް ދެން އިވިގެންދިޔައީ ގޭގެ "ކޮޓަރިން" ޑޮލަރު ހޯދައިދޭނެ ވާހަކައެކެވެ.
ގޭގެ ކޮޓަރިން ޑޮލަރު ހޯދުމޭ ބުނެވޭ ބަހުގެ މާނަ ފަހުމުނުވެ ރައްޔިތު މީހުން އިޖްތިމާޢީ މަންސަތަކުގައި ޒާތްޒާތައް ފޮޓޯހަދައި ކެޕްޝަން ލިޔެގެން މައްލަވަކުރަމުން ދަނިކޮށް އަނެއްކާ މިއަދު އިވިގެން މިދިޔައީ އައްޑޫ ރައްޔިތުންގެ ޖީބަށް، ޑޮލަރެއްވެސް ނޫން، ސީދާ "ސްޓާރލިންގ ޕައުންޑް" ވަންނަ ވާހަކައެވެ. ފާއިތުވެ ދިޔަ ދެ ދިހައެއްހައި އަހަރުގެ ދިގު މުއްދަތުގައިވެސް އައްޑޫ ރައްޔިތުން ލައްވައި ބައިކޮޅަށް ޖެއްސުވި ގޯލުތައް މިފަހަރުވެސް އެއުރެން ޖަހާނެފަދަ ގޮތަކަށް "ގޭމް ޕްލޭން" ރޭވެނީއޭ ބުނާކަށް ނެތީމެވެ. އައްޑޫ ރައްޔިތަކަށްވެސް ނުވާތީމެއެވެ.
އިންޑިއާ ސަރުކާރުގެ އެހީގައި އައްޑޫގެ ފަސް ސަރަހައްދެއްގައި ލޯކަލް ޓޫރިޒަމް ތަރައްޤީކުރުމަށް ނިންމި "ރޯނު" ދެމިފައިވުމާއި އަދި އައްޑޫގެ ތަފާތު ސަރަހައްދުތަކުގައި "ގޭދޮށު މަސްފެކްޓަރީ" އަޅަން ކަނޑަޖެހުނުތާވެސް ދުވަސްކޮޅެއް ވެފައި ވީނަމަވެސް، އެއިން ކަމަކުން ރައްޔިތުންގެ ޖީބަށް ޑޮލަރު ނުވަނަސް، ޕައުންޑް ވަދެއްޖެނަމަ މާ މޮޅުތާއެވެ. ދުނިޔޭގެ ބާޒާރުގައި އަގުގެ ގޮތުން ބަލާއިރު ޑޮލަރަށްވުރެ ޕައުންޑުގެ އަގު ގައިމުމެ ދަށެއް ނުވާނެ ހިނދުއެވެ.
އިރުވައި މޫސުމުގައި "އަސްދަނޑިތައް" ލައްވާ ބީދައިން ނުވަތަ ހުޅަނގު މޫސުމުގައި "އޮއިވާލި" ފައިބާ ބީދައިން، އިންތިޚާބުތަކާ ދިމާކޮށް ވެވޭ ވަޢުދުތަކާއި ދެއްކޭ ހުވަފެންތައްވެސް އިވެމުން ފެންނަމުން ދާނެއެވެ. މެންދުރުގެ ގަދަ އަވީގައި ފެންނަ އަވާމެންދުރެއްތޯ ނުވަތަ ދުވާލު ހޭލައި ހުންނަހިނދު ބެލެމުންދާ ހުވަފެނެއްތޯ ކަށަވަރުކުރުމަށްފަހުގައި މެނުވީ، ގޮސް "ފޮށީ" ކައިރީގައި ހުއްޓެވިއްޖެނަމަ ބައިކޮޅަށް ޖެހޭ ގޯލުތަކަކަށް މެނުވީ "ހަތެއް ސުމެއް" ގެ ނަތީޖާ ދެންވެސް ނުވެދާނެ ނޫންހެއްޔެވެ.
ކުރިމަތީ ޖީބަށް ލާދެވުނު ޑޮލަރުވެސް އަދި އަދަށް ދާންދެންވެސް ނުފެނިގެން މުޅި ޤައުމުގެ މަސްވެރިން އުޅެން ޖެހޭއިރު، ފަހަތު ޖީބަށްލެވޭ ޕައުންޑެއް އައްޑޫ ރައްޔިތުންނަށް ފެންނާނެތޯ ހިތާއިހިތާ އެރައްޔިތުން ސުވާލުކޮށްލުން މުހިންމު ނޫންހެއްޔެވެ.
