ޑިމޮކްރެސީ ގެ ދަތުރުގައި ރާއްޖެ މާބޮޑަށްވެސް ފައްކާވެއްޖެކަމަށާއި ދިވެހިންގެ ސުލޫކު މާ ފުރިހަމަކަމަށް އިލެކްޝަން ކޮމިޝަންގެ މެންބަރު އިސްމާޢީލް ޙަބީބު ވިދާޅުވެއްޖެއެވެ.
މެންބަރު ޙަބީބު މިފަދައިން ވިދާޅުވެފައި މިވަނީ އެމެރިކާގެ ރިޔާސީ އިންތިޚާބުގެ އިލެކްޓޯރަލް ވޯޓު ރަސްމީކޮށް ފައިނަލްކުރުމުގެ އެންމެ ފަހުގެ މަރްޙަލާ އެޤައުމުގެ ޤާނޫނު ހަދާ މަޖްލީހުގައި ކުރިއަށްދަނިކޮށް އިންތިޚާބުން ބަލިވި ޓްރަމްޕްގެ ސަޕޯޓަރުން މަޖްލިސްކުރާ ގޭގެ ތެރެއަށް ގަދަކަމުންވަދެގަނެ ހިންގި ހަމަނުޖެހުންތަކަށް އިޝާރާތްކުރަށްވައި މީގެ އިރުކޮޅެއް ކުރިން ކުރެއްވި ޓްވީޓެއްގައެވެ.
ޑިމޮކްރެސީގެ ރޮނގުން މުޅި ދުނިޔެއަށް ނަމޫނާއެއްކަމަށް އަމިއްލައަށް ބުނުމުގެ އިތުރުން ގިނަ ބަޔަކުމެ ޤަބޫލުވެސްކުރާ ދުނިޔޭގެ "ސްޕަރ ޕަވަރު" އެމެރިކާގެ މިހާރުގެ ރައީސް ޑޮނަލްޑް ޓްރަމްޕް ވެރިކަން ދޫނުކުރެއްވުމަށް ހާކަމުންގެންދަވާ "ބޮޑާ" އެންމެފަހުން ހަމަނުޖެހުންތަކަކަށް ބަދަލުވެ ކޮންގްރެސްގެ ތަޅުމުގެ ތެރެއަށް އަންހެނެއްގެ ފުރާނަ ދުއްވާލަން ޖެހިގޮސްފައިވާއިރު، މެންބަރު ޙަބީބުގެ މި ޓްވީޓުގައި ޓްރަމްޕަށް ފާޑުވިދާޅުވުމަށްފަހު ރާއްޖޭގެ ކުރީގެ ރައީސުލް ޖުމްހޫރިއްޔާ މައުމޫނު ޢަބްދުލް ޤައްޔޫމަށް ތަޢުރީފުކުރަށްވާފައި ވެއެވެ.
މަޖުބޫރުވެވަޑައިގެން ނަމަހީވެސް ޒަމާނީ ޑިމޮކްރެސީއަށް އާނއެކޭ ވިދާޅުވުމަށްފަހުގައި 2004 ވަނަ އަހަރު އޭރުގެ ރައީސުލް ޖުމްހޫރިއްޔާ މައުމޫން ޢަބްދުލް ޤައްޔޫމް އިޢުލާނުކުރެއްވި "އިސްލާޙީ އެޖެންޑާ" އާއެކު ރާއްޖޭގެ "ޑިމޮކްރެސީ" ޙަޔާތަށް ރަސްމީ ސިފައެއް ލިބިގެންދިޔައެވެ. އަދި ޒަމާނީ ޑިމޮކްރެސީގެ ފެހި ޤާނޫނު އަސާސީއެއް ދިވެހިންނަށް ލިބި، "ކުޑަ ކާފު-ބޮޑު ކާފު" ގެ ވޯޓިން ނިޒާމަށްވެސް ބަދަލުއައިސް ރައްޔިތުންގެ "ސީދާ" ވޯޓަކުން އެއުރެންގެ އެންމެ އިސްވެރިޔާ ޢައްޔަނުކުރުމުގެ ބާރު ދިވެހީންނަށް ލިބިގެންވެސް ދިޔައެވެ.
ނަތީޖާއަކަށްވީ ރައީސް މައުމޫނުގެ "އޯކޭ" ދެއްވުމުން ދިވެހީންނަށް "ހައިސިއްޔަތު" ލިބިގެންދިޔަ ޒަމާނީ ޑިމޮކްރެސީގައި 2008 ވަނަ އަހަރުގައި ބޭއްވުނު އެފަދަ ފުރަތަމަ އިންތިޚާބުގައި، މުޅި ދުނިޔޭގެ ނިޞްބަތުންވެސް ދިގު މުއްދަތަކަށް ޤައުމުގެ އެންމެ އިސްވެރިޔާގެ މަޤާމު އަދާކުރެއްވި އެމަނިކުފާނަށް ނާކާމިޔާބީއާ ކުރިމަތިލައްވަން ޖެހިވަޑައިގެންނެވުމެވެ. އެހެންނަމަވެސް، އަދި ގިނަބަޔަކު އޭރު ދައްކަމުންގެންދިޔަ ވާހަކަތަކާއިވެސް ޚިލާފަށް، އެމަނިކުފާނު ދެއްކެވި މަންޒަރަކީ، 30 އަހަރުގެ ދިގު ވެރިކަމެއް ކުރެއްވި އެމަނިކުފާނުގެ އެންމެހައި ބާރުތަށް އިންތިޚާބީ އައު ރައީސަށް ނަޤުލުކުރެއްވުމުގައި ޗާލު ނަލަ ގޮތް މުޅި ދުނިޔެއަށް ދެއްކެވުމެވެ.
ނަސަންދުރާގެ ސީލިންގް މައްޗަށް ދާންދެން ކިތަންމެ ވޯޓު ފޮށިތަކެއް އެރުވުނުކަމަށް އޭރު އެކަން ކުރެއްވި "ބޭފުޅުން" ފަހަކާ ޖެހެންދެން "ސިއްރު" ކުރެއްވި ނަމަވެސް އެކަން ރައީސް މައުމޫނަށް އޭރުވެސް އެނގިވަޑައިގަންނަވާ ހިނދުވެސް އެންމެ ކުޑަމިނުން އިންތިޚާބު "އޮޅުވާލީ" އޭވެސް ވިދާޅުނުވެއެވެ.
އިލެކްޝަން ކޮމިޝަންގެ މެންބަރު އިސްމާޢީލް ޙަބީބު ވިދާޅުވެފެފައިވާ ބީދައިން، 30 އަހަރުވަންދެން ވެރިކަން ކުރެއްވި އަޅުގަނޑުމެންގެ ލޮބުވެތި ޒަޢީމުގެ އެދުވަހުގެ ހިތްވަރުފުޅަށް ސެލިއުޓް އެރުވުމަކީ "ޙައްޤު މިންވަރު" ކަން، އެމެރިކާގެ ކޮންގްރެސް ޢިމާރާތް ކެޕިޓޮލް ހިލްގައި މިއަދު ހިނގައިދިޔަ ހަމަނުޖެހުންތަކަށް އެކަނިމެ ބަލާލިނަމަވެސް، އެނގިގެން ދޭނޫންހެއްޔެވެ.
