ކޮވިޑް-19 ޖެހިގެން މަރުވާ މުސްލިމުންގެ ހަށިތައްވެސް އިންސެނެރޭޓަރަށް ލައި އެންދުމަށް ލަންކާގެ ސަރުކާރުން ނިންމި ނިންމުމަށް ބަދަލު ގެނެވެން ނެތްކަމަށް އެޤައުމުން ހާމަކޮށްފިއެވެ.
ދުނިޔޭގެ މަޝްހޫރު ބޮޑެތި މީޑިއާތަކުން މިއަދު ރިޕޯޓުކޮށްފައިވާ ގޮތުގައި، ބައިނަލް އަޤްވާމީ އާދޭސްތަކާއި ޚުދު އެޤައުމުގެ ފަންނީ މާހިރުންގެ ލަފާވެސް ބޮލާލައި ޖެހުމަށްފަހުގައި، ލަންކާގައި ކޮވިޑް-19 ޖެހިގެން ނިޔާވާ މުސްލިމުންގެ ހަށިތައްވެސް އެހެން ދީންތަކުގެ މީހުންނެކޭ އެއްގޮތަށް އެންދުމަށް އެޤައުމުން މީގެކުރިންވެސް ނިންމާފައިވާ ނިންމުން ދެމެހެއްޓުމަށް ލަންކާ ސަރުކާރުން މިއަދު ނިންމާފައިވެއެވެ.
"އިޖްތިމާޢީ، ޘަޤާފީ، ސިޔާސީ ނުވަތަ އެނޫންވެސް ފަރުދީ ސަބަބުތަކާހުރެ މިނިންމުން ބަދަލެއް ނުކުރެވޭނެ" ސްރީލަންކާގެ ހެލްތް މިނިސްޓަރު ޕަވިތްރާ ވިދާޅުވިކަމަށް އެ މިނިސްޓްރީގެ އޮފިޝަލަކާ ޙަވާލާދީ މީޑިއާތަކުން ރިޕޯޓްކޮށްފައި ވެއެވެ.
ކޮވިޑް-19 ފެތުރެން ފެށުމާއެކު އެބަލި ފެތުރުން ހުއްޓުވުމަށް އެޅޭ ފިޔަވަޅެއްކަމުގައި ދެކިގެން، ބަލީގައި މަރުވާ މީހުން ވަޅުލުމުގެ ބަދަލުގައި އެންދުމަށް ލާޒިމުކޮށް އެޤައުމުގައި ޤަވާޢިދެއް ހަދައި ތަންފީޒުކުރަން ފަށާފައި ވަނީ ފާއިތުވެދިޔަ މާރިޗް މަހުގައެވެ.
ކޮވިޑް-19 ބަލީގައި ނިޔާވާ މުސްލިމުންގެ ހަށިތައް އެންދުމަށް ލަންކާ ސަރުކާރުން މަޖުބޫރުކޮށް، އެކަން ކުރަމުން ގެންދާތީވެ އޯއައިސީގެ 50 ޤައުމުގެ އިތުރުން ދުނިޔޭގައި އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުގެވެސް ފާޑުކިޔުންތަކާއި "ފިއްތުން" ތައް އެޤައުމަށް އިންތިހާއަށް އަމާޒުވެގެން ދިޔުމާއެކު އެކަން "މަޑުޖައްސާލުމަށް" އެޤައުމުން ފާއިތުވެދިޔަ އަހަރުގެ ފަހުކޮޅުގައި ނިންމިކަމަށް މީޑިއާތަކުން ރިޕޯޓުކޮށްފައި ވެއެވެ.
އަދި، އެފާޑުކިޔުންތާކާއި ފިއްތުންތަކާހުރެ ލަންކާގައި ކޮވިޑް-19 ބަލީގައި މަރުވާ މުސްލިމުން އެންދުމުގެ ބަދަލުގައި އެހަށިތައް ރާއްޖެގެނެސް ވަޅުލުމުގެ އިންތިޒާމު ދެގައުމުގެ ސަރުކާރުން ގުޅިގެން ކުރިއަށް ގެންދާކަން ރާއްޖެއިން މީގެކުރިން ހާމަކޮށްފައި ވީނަމަވެސް، އެވިސްނުން ވަނީ ދޫކޮށްލާފައި ކަމަށް ލަންކާއިން ފަހުން ހާމަކޮށްފައި ވެއެވެ.
ކޮވިޑް-19 ޖެހިގެން މަރުވާ މީހުން ވަޅުލުމުގެ ސަބަބުން ފެނުގެ ފަށަލައަށް ވައިރަސް ފެތުރިގެން ބަލިފެތުރުމުގެ ފުރުޞަތު އޮތްކަމަށް އެޤައުމުގެ ބުޑިސްޓު ވެރިން ޤަބޫލުކުރުމާއެކު، އެކަމަށް ބާރުދޭ މުޢުތަބަރު އެއްވެސް ހޯދުމެއް މިހާތަނަށްވެސް ހޯދިފައި ނުވާއިރުއާއި އަދި ކޮވިޑް-19 ޖެހިގެން މަރުވާ މީހުން ވަޅުލުމަކުން ވައިރަސް ފެތުރުމަށް އެއްވެސް ފުރުޞަތެއް ނެތްކަން ޚުދު ދުނިޔޭގެ ޞިއްޙަތު ޖަމިއްޔާއިންވެސް ހާމަކޮށްފައި ވީނަމަވެސް މެއެވެ.
އަވައްޓެރި ސްރީލަންކާގައި ކޮވިޑް-19 ބަލި ޖެހިފައިވާ މީހުންގެ ޢަދަދު މިހާތަނަށް ބައި ލައްކައާ ކައިރިވާއިރު، އެ ބަލީގައި 222 މީހުން މަރުވެފައި ވެއެވެ. އަދި، ޑިސެމްބަރު މަހުގައި އެކަނިވެސް އެބަލީގައި މަރުވި 19 މުސްލިމެއްގެ ހަށިގަނޑު އެޤައުމުން އަންދާލާފައި ވާއިރު، އޭގެތެރޭގައި ތުއްތު ކުއްޖެއްގެ ހަށިގަނޑުވެސް ހިމެނޭކަން ފާހަގަކޮށްލެއެވެ.
(ބައިނަލް އަޤްވާމީ ނޫސްތައް)
