ރައީސް ޔާމީނުގެ "ގަނޫނީ" ޓީމުން ނަގާ ގާނޫނީ ނުކުތާތަކުގައި އޮށްޓަރެއް ނެތް!

ގާނޫނީ ނަޒަރިއްޔާތަކުން ރައީސް ޔާމީނުގެ ލީގަލް ޓީމްގެ މަސައްކަތް ދިރާސާ ކޮށްލުމަށްޓަކައި އަދި އެކަން ކިޔުންތެރިންނާ ހަމަޔަށް ތިރިކޮށްލުމަށްޓަކައި މިނޫހުން ގާނޫނީ ގޮތުން އިސްފަރާތްތަކަކާ މަޝްވަރާ ކޮށްލީމެވެ. ރައީސް ޔާމީނުގެ "ގާނޫނީ ޓީމް" ހައިކޯޓްގައި ނެންގެވި މާއްދާތައް، ދަށުކޯޓްގައި ނެގި މާއްދާތަކަށް ވުރެވެސް ފެންވަރުދައްކަމަށް ބައެއް ގާނޫނީ މާހިރުން މިނޫހާ ހިއްސާކުރެއްވިއެވެ. އަދި މިފަހުން   ދަށުކޯޓުގައި އޮތް "ފުއްގިރި" މައްސަލައިގައި ވަކީލުން ދެއްކެވި ވާހަކަތަކުން މިފަހުގެ ގާނޫނު އުގޫބާތާ އަދި އިޖުރާތްތައް ފުރިހަމައަށް ދޭހަ ނުވާކަން ފާހަގަކުރެއެވެ.

ދަށު ކޯޓްގައި އަދި ހައިކޯޓްގައި ރައީސް ޔާމީނު އަމިއްލަ ފުޅަށް ނަންގަވާ ޕޮއިންޓްތައްވެސް ގާނޫނީ ގޮތުން މާހަމަޖެހެއެވެ. ރައީސް ޔާމީނުގެ ވަކީލުންގެ ޓީމު ސިޔާސީ ވާހަކަތައް ދައްކަވާއިރު ކޯޓްގައި ރައީސް ޔާމީނު ސިޔާސީ ވާހަކައިގެ ބަދަލުގައި ގާނޫނީ ވާހަކަތައް ދައްކަވައެވެ. ކޯޓްގައި ރައީސް ޔާމީނު ދައްކަވާ ވާހަކަތައް ލޯޔަރުންގެ ނުކުތާތަކަށް ވުރެ ހަމަޖެހެއެވެ.

ހައިކޯޓަށް ހުށަހެޅުނު ކޭސްގައި އޮތީ "ކުއަންޓިޓީ" އެވެ. "ކޮލިޓީ" އެއްނޫނެވެ. އެއްފަހަރާ ގިނަ ޕޮއިންޓުތަކެއް ނަގާ އޮއްސާލުމުގެ ސަބަބުން މައްސަލައިގެ އިސްތިއުނާފްގައި ހިމެނޭ ހަރުދަނާ ޕޮއިންޓްތަކަށް ހިޔަނި އެޅިގެންދިޔައެވެ. އަދި ދަށުކޯޓްގައި އިޖުރާއީ ގޮތުން ހުރި މައްސަލަތައް ރަނގަޅަށް ނެގިފައި ނެތްކަމަށް ގާނޫނު ދިރާސާ ކުރާފަރާތްތަކުން މިނޫހާ ހިއްސާކުރިއެވެ.

ރައީސް ޔާމީނުގެ ގާނޫނީ ޓީމުގައި ހައިކޯޓް މައްސަލަ ލީޑު ކުރަން ކުރީގެ ނައިބުރައީސް ޑރ. ޖަމީލު ދާން ފެށުމުން ދެކަމެއް ފާހަގަވިއެވެ. އެއްކަމަކީ ޑރ.ޖަމީލު މިފަހުގެ ގާނޫނު އުގޫބާތަށް ނުފަރިތަކަމެވެ. އެހެނީ އެމަނިކުފާނު ލޯފާމް ހައްދަވައިގެން މިދިޔަ އަހަރުތަކުގައި ވަޑައިގަތީ ސިވިލް ކޯޓަށެވެ. މިހާރުވެސް ގިނަ ރިސޯޓްތަކަކާއި ސްޓޭޓްބޭންކް އޮފް އިންޑިއާގެ ސިވިލް މައްސަލަތަކުގައި ލޯޔަރުކަން ކުރައްވައެވެ. ދެވަނަ ކަމަކީ ޑރ. ޖަމީލު ވަކީލުންގެ ޓީމަށް ވަޑައިގެން ފަހުން މުޅި މައްސަލަ ސިޔާސީ ކުރުމެވެ. އަދި ގިނަ ޕްރެސް ކޮނފަރަންސް ތަކެއް ބޭއްވިއިރު މައްސަލައިގެ ބަދަލުގައި ސިޔާސީ ވާހަކަ ދައްކަވައެވެ. ރައީސް ޔާމީނުގެ ގާނޫނީ ޓީމްގެ ޕްރެސްކޮންފަރެންސްތަކެކޭ ޗެނަލްތޭރައިން އިން ގެނެސްދޭ 'ހަޖަމް' ޕްރޮގްރާމްއެކޭ އެއްފަދައެވެ. އެހެންކަމުން އާންމު ރައްޔިތުންނަށް ރައީސް ޔާމީނުގެ މައްޗަށް ދައުލަތުން ހުށަހަޅާ މައްސަލަތަކުގެ އުނި ނުކުތާތަކެއް ހާމަ ކޮށެއް ނުދެވެއެވެ.

ދުނިޔޭގެ އެހެން ޤައުމުތަކުގައިވެސް ސިޔާސީ ފަރާތްތަކުގެ ގާނޫނީ ޓީމްތަކަކީ ވަރަށް ޕްރޮފެޝަނަލް ބައެކެވެ. ގާނޫނީ ހަރުދަނާ ނުކުތާތައް ފާހަގަކޮށް އެފަރާތްތަކުން ރައްޔިތުންނަށް ކިޔައިދީ އާންމު މުޖްތަމައަށް ވިސްނައިދޭބައެކެވެ. ޕާޓީގެ މެންބަރުންނަށް ސިޔާސީ ގޮތުން ނުކުތާތައް ކިޔައިދެނީ ޕާޓީންނެވެ. މިދެބައި އެއްވުމުން އާންމުކޮށް އެންމެންވެސް މަސައްކަތްކުރާނީ އެކަކަށްވުރެ އަނެކަކު ސިޔާސީ ގޮތުން މަޝްހޫރުވެ ގަދަކުރާށެވެ. މިހެންވުމުން އެއްވެސް ޑިޕްލޮމަސީ އެއްނެތި ގާނޫނީ ޓީމްތަކުންވެސް ގާޒީންނާ ޖަދަލުކޮށް ވެރިންނަށް ހަޖޫޖަހާނެއެވެ. ހުރިހާ ގެއްލުމެއްވާނީ މައްސަލަ  ރައްދުވާ ފަރާތަށެވެ. މިމައްސަލަތަކުގައި ރައީސް ޔާމީނަށެވެ.